ខាងក្រោមនេះ យើងខ្ញុំនឹងបង្ហាញអ្នកពីគ្រួសារដែលអាចអប់រំចេញជាកូនដែលពូកែបាន។ តើមានអ្វីខ្លះទៅ?
1. គ្រួសារដែលចេះគ្រប់គ្រងអារម្មណ៍របស់ខ្លួនបានល្អ នឹងអាចអប់រំចេញកូនដែលមិនមានចរិតឆេវឆាវ ព្រោះកូនតែងរៀនតាមអ្នកជានិច្ច។ ដូចនេះ បើអ្នកចង់ឲ្យកូនមានចរិតល្អ អ្នកគួរតែធ្វើជាតម្រាប់ល្អដល់គេ ដោយមិនគួរឆាប់មួលម៉ៅនៅចំពោះមុខកូនឡើយ។
2. គ្រួសារដែលចេះនិយាយតាមសម្រួល កូនក្នុងគ្រួសារនោះនឹងក្លាយជាបុគ្គលដែលមិនប្រើកំហឹងដើម្បីដោះស្រាយបញ្ហា។ គេនឹងប្រើសន្តិវិធី ដោយនិយាយតាមសម្រួល ដើម្បីប្រឈមមុខនឹងបញ្ហាទាំងឡាយ។ ដូចនេះ គេនឹងមានអ្នកស្រឡាញ់ពេញចិត្តច្រើនជាមិនខានឡើយ។
3. គ្រួសារដែលចេះព្រលែងដៃពីកូន ដោយធ្វើឲ្យកូនមានភាពឯករាជ្យ មិនធ្វើឲ្យកូនគ្រប់រឿង នោះកូនអ្នកនឹងឆ្លាតខ្លាំងណាស់ ហើយមានភាពរឹងមាំទៀត ព្រោះអ្នកបានអប់រំគេឲ្យបែបនេះតាំងពីតូច។ ដូចនេះ ធំឡើង គេនឹងមិនចាំបាច់ពឹងលើអ្នក ក៏អាចរស់នៅបានល្អដែរ។
4. គ្រួសារដែលចូលចិត្តមើលសៀវភៅ នឹងធ្វើឲ្យកូនក្លាយជាបុគ្គលដែលពូកែមួយរូប ព្រោះកូនរៀនតាមអ្នកតាំងពីតូច។ ដូចនេះ នៅពេលដែលគេធំឡើង ចំណង់ចំណូលចិត្តរបស់គេ គឺអានសៀវភៅតែម្តង ដោយអ្នកមិនចាំបាច់បង្ខំឡើយ។
5. គ្រួសារដែលម្តាយឪពុកត្រូវគ្នា មិនឈ្លោះគ្នា ហើយអាចរស់នៅចុះសម្រុងនឹងគ្នា នោះកូននឹងអាចរីកលូតលាស់ក្នុងគ្រួសារដែលមានភាពកក់ក្តៅ។ ដូចនេះ នៅពេលដែលគេដឹងក្តី គេនឹងក្លាយជាបុគ្គលដែលជោគជ័យបាន ព្រោះគេធំធាត់ក្នុងគ្រួសារដែលល្អ៕