​កាល​ពី​ពេល​ថ្មី​ៗ​នេះ តារា​សម្ដែង​ដ៏​ល្បី​របស់​ប្រទេស​ថៃ​ម្នាក់ ត្រូវ​បាន​ឃាត់​ខ្លួន​ ក្រោយ​រក​ឃើញ​ថា​មាន​ពាក់ព័ន្ធ​នឹង​ការ​បោកប្រាស់​លុយ​តាម Bitcoin ជិត ១០០០ លាន​បាត។

តារា​សម្ដែង Jiratpisit Jaravijit ដែល​ទទួល​បាន​ភាព​ល្បីល្បាញ​តាម​រយៈ​រឿង​ភាគ​ទូរទស្សន៍ “Bad Romance The Series”, “Nang Ai” និង “Naew Sutthai” នោះ ត្រូវ​គេរាយការណ៍​ថា បាន​ផ្សំ​គំនិត​គ្នា​ជាមួយ​ជន​ ៦​រូប​ផ្សេង​ទៀត ដើម្បី​បោកប្រាស់​ជន​បរទេស​ម្នាក់​រស់​នៅ​ប្រទេស​ហ្វាំងឡង់ ឲ្យ​ដាក់​ប្រាក់​ចំនួន ៧៨៧ លាន​បាត (ជាង ២៤ លាន​ដុល្លារ) ទៅ​ក្នុង Bitcoin ដោយ​សន្យា​ថា​នឹង​ចាប់​ផ្ដើម​ជំនួញ​លើ Bitcoin នេះ​ជាមួយ​គ្នា។

ជន​រង​គ្រោះ​សញ្ជាតិ​ហ្វាំងឡង់​រូប​នោះ មាន​ឈ្មោះ​ថា Aarni Otava Saarimaa អាយុ ២២​ឆ្នាំ បាន​ដាក់​ពាក្យ​បណ្ដឹង​ទៅ​កាន់​អាជ្ញាធរ​ប្រទេស​ថៃ​កាល​ពី​ថ្ងៃ​ទី ៣០ ខែ​មករា រយៈពេល ៦ ខែ​ក្រោយ​លោក​ធ្វើ​កិច្ច​សន្យា​ជាមួយ​នឹង​តារា​សម្ដែង Jiratpisit និង​បក្សពួក​របស់​លោក​។

ក្រោយ​ធ្វើ​ការ​ស៊ើប​អង្កេត​រួច​មក ខាង​ប៉ូលិស​បាន​ចេញ​លិខិត​ឃាត់​ខ្លួន តារា​សម្ដែង​រូប​នេះ និង​បក្សពួក​របស់​គេ ដែល​ក្នុង​ចំណោម​នោះ​មាន​បងប្អូន​បង្កើត​របស់​លោក ២ នាក់​ផង​ដែរ។ ជន​សង្ស័យ​ ៤ នាក់​ផ្សេង​ទៀត ត្រូវ​បាន​ឲ្យ​ដឹង​ថា ជា​សហគ្រិន​នៅ​ឯ​ទីផ្សារ​ភាគហ៊ុន​របស់​ប្រទេស​ថៃ។ បើ​តាម​ប៉ូលិស​បាន​បញ្ជាក់​ដែរថា ជន​សង្ស័យ​ខ្លះ បច្ចុប្បន្ន​មិន​បាន​នៅ​ក្នុង​ប្រទេស​ថៃ​នោះ​ទេ។

គួរ​បញ្ជាក់​ដែរ​ថា តារា​សម្ដែង​ Jiratpisit Jaravijit ត្រូវ​បាន​ប៉ូលិស​ឃាត់​ខ្លួន​កាល​ពី​ថ្ងៃ​ព្រហស្បតិ៍ នៅ​ឯ​ផ្សារ​ទំនើប Major Cineplex Ratchayothin ក្នុង​ទីក្រុង​បាង​កក ខណៈ​លោក​កំពុង​ថត​ខ្សែ​ភាពយន្ត៕ ​

ប្រភព៖ sabay.com.kh