តាមព័ត៌មានដែល Sabay ទទួលបានពីប្រភពមួយនាយប់មិញនេះ ម្ចាស់បទ “កុំទ្រាំស្នេហ៍អ្នកក្រដូចបង” ស៊ឹម សុវណ្ណារ៉ុង បានជួបគ្រោះថ្នាក់ចរាចរណ៍ដ៏រន្ធត់មួយ នៅលើកំណាត់ផ្លូវពីបន្ទាយមានជ័យ ដោយគ្មានអ្នកណាដឹង។
ប្រភពពីមិត្តភ័ក្ដិជិតស្និទ្ធម្នាក់របស់ ស៊ឹម សុវណ្ណារ៉ុង បានបង្ហើបថា ហេតុការណ៍អកុសលនេះ បានកើតឡើងកាលពីសប្ដាហ៍មុននៅវេលាម៉ោង ២រំលងអាធ្រាត។ គ្រោះថ្នាក់នោះ បានកើតឡើងក្រោយពីដំណើរវិលត្រឡប់របស់ សុវណ្ណារ៉ុង ពីការប្រគំតន្ត្រីនៅខេត្តបន្ទាយមានជ័យ ក្នុងគោលដៅសំដៅទៅខេត្តសៀមរាបវិញ។
ពេលនោះ តារាចម្រៀងមិនបានបើកបរដោយខ្លួនឯងទេ ប៉ុន្តែមានតៃកុងឡានម្នាក់ផ្សេងជាអ្នកបើក ហើយរូបគេអង្គុយពីក្រោយ។ ប្រភពបន្តថា ពេលមកដល់ភូមិសាស្ត្រស្រុកព្រះនេតព្រះខេត្តបន្ទាយមានជ័យ នៅចំណុចមួយដែលល្បីថាមានជើងកប(កន្លែងដែលមានគ្រោះថ្នាក់ញឹកញាប់) តៃកុងឡាន របស់ណារ៉ុង ទំនងងងុយដេក ហើយក៏រេចង្កូតចេញពីផ្លូវ ហើយក្រឡាប់ជាច្រើនត្រឡប់ធ្លាក់ចូលទៅក្នុងស្រះទឹកនៅក្បែរផ្លូវតែម្ដង។
រថយន្តម៉ាក នីសាន់ណាវ៉ារ៉ា ជិះដោយតារាចម្រៀង បានខូចខាតយ៉ាងដំណំក្នុងហេតុការណ៍ដ៏រន្ធត់ខាងលើ។ ប៉ុន្តែសំណាងល្អ តារាចម្រៀងមកពីខេត្តបាត់ដំបងរូបនេះ រួមទាំងអ្នកបើកបរផង មិនមានគ្រោះថ្នាក់អ្វីធ្ងន់ធ្ងរទេ គ្រាន់តែពួកគេមានអារម្មណ៍មិននឹងហ្ន៎ ដោយការតក់ស្លុត។
រូបភាព៖ ហ្វេសប៊ុក ស៊ឹម សុវណ្ណារ៉ុង
“រាប់ថាទឹកដោះម្ដាយថ្លៃហើយ ណារ៉ុង មិនត្រូវរបួសអីខ្លាំងទេបង ប៉ុន្តែគេនៅមានអារម្មណ៍តក់ស្លុតខ្លាំង ក្រោយគ្រោះថ្នាក់នោះ។ ហើយឡានដែលគេខំសន្សំលុយទម្រាំទិញបាន ឥឡូវខូចចង់ខ្ទេចហើយ!”។ ប្រភពថ្លែង។
ជុំវិញបញ្ហាខាងលើ ស៊ឹម សុវណ្ណារ៉ុង ចាប់ផ្ដើមដោយការស្ទាក់ស្ទើរ បានប្រាប់តាមសារសំឡេងថា រូបគេ បានជួបគ្រោះថ្នាក់មែន។ “អឹម…អឹម…បាទបង…ហើយបងឯងដឹងពីណាមក…គ្រោះថ្នាក់មែន តែសំណាងដែរ ខ្ញុំអត់ត្រូវអីខ្លាំង!”។
ដូចនឹងការបង្ហើបប្រាប់ពីប្រភពខាងលើ សុវណ្ណារ៉ុង កាលនោះ គឺលោកធ្វើដំណើរក្នុងទិសដៅទៅសៀមរាប ហើយមកដល់កន្លែងកើតហេតុ ក៏ជួបគ្រោះថ្នាក់តែម្ដង។ “ពេលរៀបចេញដំណើរមក ខ្ញុំបានសួរអ្នកបើកបរដែរថា បងឯងអត់ទេអ្ហី? ហើយគាត់ប្រាប់ថា រៀងអស់កម្លាំងបន្តិចដែរ ព្រោះបើកបរជាប់២-៣ថ្ងៃហើយ។ អីចឹងខ្ញុំក៏ឲ្យគាត់សម្រាកមួយសន្ទុះ ទើបចេញដំណើរមក ប៉ុន្តែមកដល់កន្លែងនោះ ក៏ជួបគ្រោះថ្នាក់តែម្ដង”។ ស៊ឹម សុវណ្ណារ៉ុង ថ្លែង។
ម្ចាស់បទ “កុំទ្រាំស្នេហ៍អ្នកក្រដូចបង” ប្រាប់ទៀតថា លោកខិតសន្សំយ៉ាងលំបាក ទម្រាំទិញបានរថយន្តខាងលើដែលមានតម្លៃជាង១ម៉ឺនដុល្លារ មិនគួរណាមកជួបគ្រោះដូច្នេះ។ សុវណ្ណារ៉ុង បានចំណាយប្រាក់អស់ប្រមាណ ៥ពាន់ដុល្លារដើម្បីជួសជុលឡានដែលខូច។ ផ្សំនឹងចំរដូវភ្លៀង មិនសូវមានការងារផង លោក ប្រាប់ថា ពេលនេះលោកចាប់ផ្ដើមប្រឈមនឹងជីវភាព។
ស៊ឹម សុវណ្ណារ៉ុង គឺជាអតីតជយលាភីលេខ១ការប្រឡងភេសជ្ជៈកូកាប្រចាំខេត្តព្រៃវែង។ លោក ចាប់ផ្ដើមល្បីឈ្មោះខ្លាំងកាលពីឆ្នាំ ២០១៧ តាមរយៈបទ “កុំទ្រាំស្នេហ៍អ្នកក្រដូចបង”៕
ប្រភព៖ sabay.com.kh