សម្រាប់គូស្វាមីភរិយាទូទៅ ពេលរៀបការរួចថ្មីថ្មោងជាពេលដែលរំភើប និងមានក្តីសុខបំផុត ក្នុងជីវិត។ ពួកគេច្រើនតែចេញទៅក្រេបទឹកឃ្មុំនៅក្រៅប្រទេស ឬតំបន់រមណីយដ្ឋានក្នុងស្រុក ដើម្បីសាងស្នេហ៍ផ្អែមល្ហែម និងដើម្បីបង្កើតអនុស្សាវរីយ៍មិនអាចមិនបំភ្លេចបានមួយជីវិត។
តែជាអកុសល កូនក្រមុំជនជាតិម៉ាឡេស៊ី ម្នាក់ឈ្មោះ ហ្វាទីន នួស៊ីយ៉ាហ៊ីរ៉ា យូស៊ុហ្វ (Fatin Nursyahirah Yusuf) អាយុ ២៤ ឆ្នាំដែលរស់នៅក្នុងទីក្រុងប៉េតាលីង ចាយ៉ា (Petaling Jaya) ប្រទេសម៉ាឡេស៊ី បែរជាបាត់បង់ជីវិតទាំងមិនដាច់អាល័យក្រោយរៀបការមិនទាន់ទាំង បាន ២៤ ម៉ោងផង។
នាងបានរៀបការជាមួយប្តីឈ្មោះ អាហ្សាម (Azzam) កាលពីព្រឹកថ្ងៃសុក្រសប្តាហ៍មុន។ គួរឱ្យសោកស្តាយ នាងបានបាត់បង់ជីវិតដោយសារជំងឺមហារីកនៅព្រឹកថ្ងៃបន្ទាប់ដោយសារ ជំងឺមហារីកសាច់ដុំដំណាក់កាលទី៤។
បងប្រុសរបស់នាងឈ្មោះ ស៊ូគួ យូស៊ុហ្វ (Shukur Yusuf) អាយុ ៣០ ឆ្នាំនិយាយថា ប្អូនស្រីរបស់គាត់ត្រូវបានបញ្ជូនទៅកាន់មន្ទីរពេទ្យបន្ទាប់ពីធ្វើពិធីបួងសួងរួចកាលពីថ្ងៃសុក្រ នៅពេលនាងកាន់តែពិបាកដកដង្ហើមខ្លាំង។
នៅក្នុងផូសហ្វេសប៊ុកដ៏ក្តុកក្ដួលមួយ ដែលត្រូវបានគេចែករំលែកតៗគ្នា គាត់សរសេរថា “ព្រះជាម្ចាស់ស្រឡាញ់នាងណាស់ ហើយនាងបានចាកចេញពីពួកយើងកាលពីព្រឹកថ្ងៃសៅរ៍ ដោយមានម៉ាក់ អាបា (ប្តី) និងខ្ញុំនៅក្បែរនាង”៕
ប្រភព៖ rasmeinews.com