ថ្មីៗនេះ គេសង្កេតឃើញមានការចែករំលែកលើហ្វេសប៊ុកតៗគ្នាជាច្រើន ពីផេករបស់តារាល្បីៗអន្តរជាតិ ដូចជា Dwayne (The Rock), Tyler Jr. និងតារាល្បីៗ ដទៃទៀត ដោយផេកតារាទាំងនោះ បានបង្ហោះការផ្សងសំណាងទឹកប្រាក់រាប់ពាន់ដុល្លារឲ្យអ្នកប្រើប្រាស់ហ្វេសប៊ុក ( Facebook User) នោះមានឱកាសឈ្នះរង្វាន់ជាទឹកប្រាក់សុទ្ធពីការចែករំលែក និងបញ្ចេញមតិ (comment) ពាក្យ Win win។
សូមមើលឧទាហរណ៍ជាក់ស្ដែងខាងក្រោម៖
ផេកក្លែងក្លាយ
ការផ្សងសំណាងបែបនេះ សុទ្ធសឹងតែជាការបោកប្រាស់ ដើម្បីបោកបញ្ឆោតយក Like និង Share គេហទំព័រ(Page) របស់ជនខិលខូចតែប៉ុណ្ណោះ។
– ផេកពិតប្រាកដ មានសញ្ញាធីកពណ៌ខៀវ ដែលបញ្ជាក់ថាជាគណនីពិត (Verify) ពីក្រុមហ៊ុន Facebook
ក្រោយពីការចែកចាយជុំវិញបញ្ហានេះ នាយកដ្ឋានប្រឆាំងបទល្មើសបច្ចេកវិទ្យា (Anti Cyber Crime Department) នៃក្រសួងមហាផ្ទៃ បានដាស់តឿនដល់ពលរដ្ឋ អ្នកប្រើប្រាស់ហ្វេសបុកទាំងអស់ ឲ្យមានការប្រុងប្រយ័ត្ន ចំពោះការផ្សព្វផ្សាយ ដូចជាការឈ្នះរង្វាន់ផ្សេងៗតាមប្រព័ន្ធ បណ្តាញសង្គម ដូចជា Facebook ឬ វេបសាយ។ អាស្រ័យហេតុនេះ សូមបងប្អូន កុំចុច like ឬ share ផេកក្លែងក្លាយ ព្រោះវាអាចនាំមកនូវផលវិបាកដូចជា:
ខាតបង់ពេលវេលា
គេអាចប្រមូលយកទិន្នន័យរបស់យើងទៅប្រើប្រាស់ក្នុងការបោកប្រាស់ផ្សេងៗ ដូចជា Vishing (ការតេបោកប្រាស់តាមទូរស័ព្ទ) ជាដើម
ការចុច like ឬ share មិនត្រឹមតែជួយផ្សព្វផ្សាយព័ត៌មានមិនពិតនោះទេ ហើយថែមទាំង បង្ហាញថាយើង គាំទ្រការផ្សព្វផ្សាយព័ត៌មានមិនពិតទាំងនោះផងដែរ។
មួយវិញទៀត សូមបងប្អួនប្រជាពលរដ្ឋទាំងអស់យកចិត្តទុកដាក់ចំពោះអ៊ីម៉ែល សារតាមរយៈទូរស័ព្ទដៃ សារតាមរយៈ Facebook ឬក៏តាមកម្មវិធីផ្សេងៗទៀតដែលតម្រូវឲ្យបងប្អួន ចុចលើតំណភ្ជាប់(Link) ដើម្បីចូលទៅផ្លាស់ប្តូរអ៊ីម៉ែល និងពាក្យសម្ងាត់ ព្រោះនេះគឺជាវិធីបោកបញ្ឆោតរបស់ក្រុម Hacker ដើម្បីលួចយកទិន្នន័យរបស់បងប្អូន៕
ប្រភព៖ sabay.com.kh