បើសិនជាអ្នកដឹងថា នរណាម្នាក់មានជំងឺរលាកសន្លាក់ហ្គោដ អ្នកប្រហែលជាមានគំនិតថាវាមានការឈឺចាប់ប៉ុណ្ណាហើយនៅពេលដែលជំងឺនេះធ្វើទុក្ខម្តងៗ។ ជំងឺនេះតែងកើតឡើងភាគច្រើនលើបុរស ប៉ុន្តែស្រ្តីក៏អាចមានបញ្ហានេះដែរក្រោយពីរ៉ាំងរដូវរួច។ នៅពេលកើតជំងឺរលាកសន្លាក់ហ្គោដ អ្នកទំនងចាអាចមានការឈឺចាប់ខ្លាំងនៅសន្លាក់កែងជើង ជង្គង់ ប្រអប់ដៃ និងផ្នែកផ្សេងៗទៀតដែលហើម និងរលាក។ ថ្វីបើមានថ្នាំប្រឆាំងនឹងការរលាកដែលអាចជួយប្រឆាំងជំងឺនេះក៏ដោយ តែការព្យាបាលដោយខ្លួនឯងមួយចំនួនប្រហែលជាអាចជួយអ្នកបានដែរ។ ខាងក្រោមនេះគឺជាវិធីព្យាបាលដោយខ្លួនឯងដែលអ្នកអាចធ្វើបាន និងគួរតែសាកល្បងហើយនៅពេលមានជំងឺរលាកសន្លាក់ហ្គោដ៖
មើមខ្ញី
មធ្យោបាយមួយក្នុងការបំបាត់ជំងឺរលាកសន្លាក់ហ្គោដគឺប្រើមើមខ្ញី។ មើមខ្ញីត្រូវបានគេដឹងថា មានភ្នាក់ងារប្រឆាំងនឹងការរលាក ហើយច្រើនតែប្រើរួមគ្នាក្នុងការព្យាបាលជំងឺរលាកសន្លាក់ហ្គោដតែម្តង។ អ្នកអាចបន្ថែមមើមខ្ញីក្នុងរបបអាហារប្រចាំថ្ងៃដើម្បីជួយទប់ស្កាត់ការធ្វើទុក្ខរបស់ជំងឺនេះបាន។ អ្នកក៏អាចញ៉ាំតែខ្ញីផងដែរ។ ក្រៅពីនេះ អ្នកអាចយកកាកខ្ញីនេះទៅស្អំនៅសន្លាក់ដែលហើមបានថែមទៀតផង។
ក្រូចឆ្មា
អ្នកក៏អាចប្រើក្រូចឆ្មាដើម្បីជួយដោះស្រាយបញ្ហារលាកសន្លាក់ហ្គោដបានដោយសារតែវាសម្បូវីតាមីន C និងមានប្រសិទ្ធភាពជាថ្នាំបញ្ចុះទឹកនោមបែបធម្មជាតិ។ ទឹកនោមអាចជួយដល់ការបញ្ចុះអាស៊ីអ៊ុយរិកបាន ហើយក៏អាចបន្ថយការហើមនៅសន្លាក់ថែមទៀត។ ការប្រើប្រាស់ធាតុផ្សំនេះជាទៀងទាត់អាចជួយទប់ស្កាត់ការធ្វើទុក្ខជំងឺរលាកសន្លាក់ហ្គោដបាន។ ដើម្បីប្រើវិធីនេះបាន ចូរច្របាច់ក្រូចឆ្មាមួយចំហៀងចូលទៅក្នុងទឹកមួយកែវ ហើយរោយម្សៅសូដាខ្លះចូលទៅក្នុងទឹកនោមហើយលាយវាឲ្យសប់។ ចូរទុកវាចោលប្រហែលពីរបីនាទី ចាំញ៉ាំវាមួយថ្ងៃពីរដង។
ទឹកខ្មេះផ្លែប៉ោម
ទឹកខ្មេះផ្លែប៉ោមប្រហែលជាមធ្យោបាយដ៏សាមញ្ញបំផុតដែលអ្នកអាចប្រើដើម្បីបំបាត់ការឈឺចាប់ផង និងហើមក្នុងសន្លាក់ផង។ ជាតិអាស៊ីតក្នុងទឹកខ្មេះផ្លែប៉ោមមានប្រយោជន៍ណាស់ក្នុងការបន្ថយការរលាកដែលបង្កជាការឈឺចាប់របស់ជំងឺរលាកសន្លាក់ហ្គោដ។ អ្នកគ្រាន់តែត្រូវការទឹកខ្មេះផ្លែប៉ោមមួយស្លាបព្រាកាហ្វេ ចាក់ចូលទៅក្នុងទឹកមួយកែវ ហើយញ៉ាំវាមួយថ្ងៃពីរដងប៉ុណ្ណោះ៕