ប្តីប្រពន្ធជនជាតិឥណ្ឌា វ័យក្មេងមួយគូត្រូវបានគ្រួសារខាងស្រីចាប់ពង្រត់ដោយចុងកាណុងកាំភ្លើង ហើយធ្វើទារុណកម្មយ៉ាងសាហាវដោយសារតែពួកគេទាំងពីរហ៊ានរៀបការដោយគ្មានការអនុញ្ញាតពីសាច់ញាតិ។
បុរសវ័យ ២៣ ឆ្នាំត្រូវគេចាប់ចងភ្ជាប់នឹងបង្គោលភ្លើង ហើយវាយដំច្រំធាក់ ចំណែកឯប្រពន្ធរបស់ ខ្លួនអាយុ ២១ ឆ្នាំត្រូវគេចាប់សម្រាតសម្លៀកបំពាក់ ហើយកាត់សក់ខ្ទេចខ្ទីព្រមទាំងបង្ខំឱ្យពួកគេ ផឹកទឹកនោមទៀតផង។
ហេតុការណ៍នេះបានកើតឡើងនៅស្រុកអាលីរ៉ាចពួ (Alirajpur) រដ្ឋម៉ាឌីយ៉ា ប្រាដេស (Madhya Pradesh) ប្រទេសឥណ្ឌា កាលពីពេលថ្មីៗនេះ ហើយត្រូវបានជនល្មើសម្នាក់ក្នុងចំណោមនោះ ថតបង្ហោះចែករំលែកតាមបណ្តាញទំនាក់ទំនងសង្គម។
យោងតាមប្រព័ន្ធផ្សព្វផ្សាយក្នុងស្រុកឱ្យដឹងថា ប្ដីប្រពន្ធវ័យក្មេងនេះបានធំដឹងក្តីនៅភូមិជាមួយគ្នា ហើយបានរៀបការកាលពីខែឧសភា ឆ្នាំនេះប្រឆាំងបំណងប្រាថ្នារបស់គ្រួសារខាងស្រី។
បន្ទាប់មក កូនកំលោះបានព្យាយាមសម្រុះសម្រួល ដោយសុខចិត្តបង់ថ្លៃបណ្ណាការ (ថ្លៃទឹកដោះ) មានពពែ ២ ក្បាល និងប្រាក់ ៧០.០០០ រូពី (ប្រមាណ ១.០២០ ដុល្លារ) ប៉ុន្តែគ្រួសារខាងស្រី នៅតែមិនពេញចិត្ត។
ពួកគេបានរើចេញពីមូលដ្ឋានដើម្បីរកការងារធ្វើនៅកន្លែងផ្សេង ប៉ុន្តែទើបតែត្រឡប់មកលេងស្រុក កាលពីសប្ដាហ៍មុន ហើយក៏មានរឿងបែបនេះកើតឡើងតែម្តង៕
ប្រភព៖ sabay.com.kh