ប្រសិនជាមានសំណួរមួយសួរអ្នកថា រវាងប្តីដែលមានលុយ តែមិនសូវមកផ្ទះ ហើយប្តីដែលគ្មានលុយ ប៉ុន្តែចេះមើលថែទាំគ្រួសារបានល្អ។ តើអ្នកនឹងជ្រើសរើសមួយណាទៅ?
មាននារីមួយចំនួននឹងអាចជ្រើសរើសប្តីដែលមានលុយ ព្រោះគេចង់រស់នៅសុខស្រួល ទោះបីជាស្វាមី នៅឬមិននៅជិតខ្លួនក៏ដោយ។ គេចង់ឲ្យអ្នកដទៃស្ងើចសរសើរ ដោយមានអ្នកបម្រើឆ្វេងស្តាំ។ ប៉ុន្តែមាននារីមួយចំនួនទៀត ក៏សុខចិត្តរៀបការជាមួយស្វាមីដែលគ្មានលុយ តែចេះមើលថែទាំគ្រួសារ ព្រោះគេគិតថា មានថ្ងៃណាមួយ ប្តីគេនឹងអាចរកបានចំណូលធំ ដោយសារតែការខំប្រឹង។ និយាយតាមត្រង់ទៅ អ្វីដែលនារីរំពឹងចង់បាន រមែងជាស្នេហាដែលស្រស់ស្អាតមួយ ដោយត្រូវការបុរសដែលទន់ភ្លន់ចំពោះគេតែប៉ុណ្ណោះ។ គេចង់បានតែស្វាមីដែលអាចកំដរគេធ្វើម្ហូប ញ៉ាំបាយជាមួយគ្នា បោសសម្អាតជាមួយគ្នា កំដរគេដើរហាត់ប្រាណ និងដើរផ្សារជាមួយគ្នា ដោយមិនទុកគេចោល ទោះក្រ ក៏សប្បាយចិត្តដែរ។ ជាពិសេស គេក៏រំពឹងចង់ឲ្យអ្នកអាចទម្លាក់ទូរស័ព្ទចុះនៅពេលដែលនៅជិតគេផងដែរ។ ម្យ៉ាងទៀត គេក៏មិនចង់ឲ្យអ្នករ៉ាប់រងរឿងទាំងឡាយក្នុងគ្រួសារតែម្នាក់ឯងដែរ ដោយគេចង់ប្រឈមមុខជាមួយនឹងអ្នកដើម្បីដោះស្រាយ។ ថ្វីត្បិតតែស្នេហាងាយស្រួល ប៉ុន្តែអាពាហ៍ពិពាហ៍មិនងាយឡើយ។ ដូចនេះ អ្នកគួរតែចេះថែរក្សាមនុស្សដែលគេងគ្រែជាមួយអ្នក ទើបអាចកាន់ដៃគ្នាដើរដល់ចាស់។ អ្នកគួរតែចាំថា ថ្វីត្បិតតែគ្មានលុយមិនអាចធ្វើអ្វីបាន ប៉ុន្តែលុយក៏មិនមែនទិញបានទាំងអស់ដែរ ជាពិសេស សុភមង្គល៕