តារាចម្រៀង ព្រាប សុវត្ថិ បានវិវត្តខ្លួនមកជាវិនិយោគិនដីឡូ គួរឲ្យភ្ញាក់ផ្អើលពីខែមុន ឥឡូវក៏មានតម្រុយលេចចេញមកថា មានតារាចម្រៀងម្នាក់ទៀត គឺលោក អ៊ីណូ ក៏បានហក់ចូលមកប្រឡូកក្នុងជំនួញពុះដីឡូលក់កំពុងពេញនិយមនេះដែរ។
តម្រុយនេះ បានលេចចេញនៅលើបណ្ដាញសង្គមនាមួយរយៈថ្មីៗ ក្រោយពេលគេឃើញ តារាចម្រៀងសាន់ដេ បានបង្ហោះព័ត៌មានពីការលក់ដីឡូបន្តបន្ទាប់ ដែលគេកម្រឃើញពីមុនមក។ ជាមួយគ្នា ប្រិយមិត្តលោកជាច្រើន បានសម្ដែងការភ្ញាក់ផ្អើល។ សកម្មភាពនោះ បាននាំឲ្យមានការចោទជាសំណួរថា តើម្ចាស់បទ “កើតជាមនុស្សដូចគ្នា តែសំណាងខុសគ្នា” គ្រាន់ជាអ្នកលក់ទទួលប្រាក់កុំមីស្យុងពីថៅកែដីឡូរូបណាមួយ ឬក៏លោកវិនិយោគដោយផ្ទាល់?
បន្ថែមពីលើនេះ មានប្រភពមួយក៏បានអះអាង ពីវត្តមានរបស់ អ៊ីណូ ញឹកញាប់នារយៈកាលចុងក្រោយនេះ ទៅកាន់តំបន់ភ្នំបាសិត ទីកន្លែងដែលសកម្មភាពពុះដីឡូលក់ កំពុងផុសផុលខ្លាំង។ វត្តមាននេះ ត្រូវបានប្រភពពីអ្នកស្រុកភ្នំបាសិត បច្ចុប្បន្នបម្រើការនៅភ្នំពេញម្នាក់ បង្ហើបថា តារាចម្រៀងមកពីខេត្តបាត់ដំបងរូបនេះ បានវិនិយោគទិញដីឡូដោយផ្ទាល់ មិនមែនជាការផ្សព្វផ្សាយលក់បន្តដើម្បីប្រាក់កម្រៃជើងសារនោះទេ។
“កម្រៃជើងសារអីបង តាមដឹង គេ(អ៊ីណូ) ទិញខ្លួនឯង ពុះលក់ខ្លួនឯងតើ…ហើយលឺថា គេមិនមែនទិញតែមួយកន្លែងទេ អាចមានច្រើននៅបាសិតហ្នឹង”។ ប្រភពថ្លែង។
ទំហំវិនិយោគជំនួញដីធ្លីរបស់តារាចម្រៀងខាងលើ ប្រភព បានធ្វើការប៉ាន់ប្រមាណថា អាចមានទំហំច្រើនជាង ១០ម៉ឺនដុល្លារអាមេរិកឯណោះ។ យ៉ាងណាក៏ដោយ រូបគេពិតមិនដឹងថា អ៊ីណូ បានប្រាក់ពីប្រភពណាខ្លះ ទៅវិនិយោគធំដុំមួយនេះទេ។
ពាក់ព័ន្ធដំណឹងនេះ អ៊ីណូ បានឆ្លើយប្រាប់តាមសារអេឡិចត្រូនិកយ៉ាងខ្លីថា លោកពិតជាបានវិនិយោគខ្លះៗលើគម្រោងដីឡូនោះមែន។ “បាទ…បាទ ប្អូនទិញមែនតើបង…!”។ យ៉ាងនេះក្ដី លោកមិនបានឆ្លើយតបបន្តទៀតទេ ចំពោះការចោទសួរជុំវិញចំនួនទុន រួមទាំងប្រភពទុនដែលត្រូវបានយកប្រើប្រាស់ក្នុងការវិនិយោគនេះដូចគ្នា ដោយលោកសុំសិទ្ធិមិនអធិប្បាយលើចំណុចនេះ។
នេះមិនមែនជាលើកទី១ទេ ដែល អ៊ីណូ បានបង្ហាញវត្តមានក្នុងជំនួញលក់អចលនទ្រព្យ ពោលគឺកាលពីប្រមាណ ២ឆ្នាំមុនលោក ក៏ធ្លាប់ប្រឡូកក្នុងវិស័យនេះដែរ ប៉ុន្តែថា កាលណោះ គឺលោកឈរឈ្មោះឲ្យសាច់ញាតិម្នាក់ លក់សំណង់ផ្ទះល្វែង។
ប៉ុន្តែលោកបានឈប់ពីការងារនោះវិញ ដោយសារតែលោករវល់នឹងការងារសិល្បៈខ្លាំងពេក។ ដោយឡែកការវិនិយោគថ្មីនេះ គឺជាការវិនិយោគខ្លួនឯង ក្រោយមើលឃើញថា ជំនួញនេះ កំពុងផុសផុលខ្លាំង ហើយទីផ្សារកំពុងមានតម្រូវការ៕
ប្រភព៖ sabay.com.kh