ខាងក្រោមនេះ យើងខ្ញុំនឹងបង្ហាញអ្នកពីចំណុចដែលអាចបញ្ជាក់បានថា ម្តាយក្មេកអ្នកពេញចិត្តនឹងអ្នកឬទេ។ តើមានអ្វីខ្លះទៅ?

1.    ដំណាក់កាលមានផ្ទៃពោះ ជាពេលដែលលំបាកបំផុតសម្រាប់ស្ត្រី ព្រោះពោះកាន់តែធំទៅៗពីមួយថ្ងៃទៅមួយថ្ងៃ ដោយពិបាកក្នុងការបំពេញការងារខ្លាំងណាស់។ ដូចនេះ បើក្នុងពេលដែលអ្នកមានផ្ទៃពោះ ម្តាយក្មេកអ្នកមិនសួរពីសុខទុក្ខអ្នកសូម្បីតែមួយម៉ាត់ មានន័យថា គេមិនទុកអ្នកក្នុងកែវភ្នែកឡើយ ទើបគេធ្វើព្រងើយកណ្តើយ។

2.    ប្រសិនជាក្រោយពេលដែលអ្នកសម្រាលកូនរួច ម្តាយក្មេកជួយមើលថែទាំអ្នក និងកូនក្រោយសម្រាលបានមួយខែ នោះមានន័យថា គេទុកអ្នកជាសមាជិកគ្រួសារ។ ប៉ុន្តែ បើគេមិនព្រមជួយ ដោយបានតែមាត់ អាចបញ្ជាក់បានថា អ្នកគ្រាន់តែឧបករណ៍ដែលគេប្រើមកដើម្បីជួយបង្កើតចៅស្នងត្រកូលនោះទេ។

3.    ម្តាយក្មេកដែលស្រឡាញ់ និងពេញចិត្តអ្នក នឹងមិនកាន់ជើងចៅទេ នៅពេលដែលអ្នកកំពុងតែអប់រំកូន។ ប៉ុន្តែបើគាត់លូកដៃ ហើយស្តីឲ្យអ្នកនៅចំពោះមុខចៅ នោះមានន័យថា អ្នកមិនមែនជាសមាជិកដែលគាត់គិតថាសំខាន់ឡើយ។ ដូចនេះ ឆ្លងតាម៣ចំណុចនេះ អ្នកនឹងអាចមើលដឹងពីចិត្តរបស់ម្តាយក្មេកអ្នកបានច្បាស់៕