ជាធម្មតាការសប្បាយចិត្តរបស់មនុស្សយើងគឺកើតឡើងដោយសារតែក្នុងខ្លួនមានអ័រម៉ូនសប្បាយចិត្ត Serotonin ច្រើន។ វាគឺជាអ្វីដែលអាចជួយឲ្យមនុស្សយើងមានអារម្មណ៍ល្អ។ បើសិនជាអ្នកមានអារម្មណ៍តក់ស្លុត ឬបាក់ទឹកចិត្តជាប់ មានន័យថាក្នុងខ្លួនមិនមានអ័រម៉ូន Serotonin គ្រប់គ្រាន់តែ។ យ៉ាងណាមិញ បើសិនជាអ្នកចង់ឲ្យខ្លួនឯងសប្បាយចិត្តកាន់តែច្រើន យកល្អគួរតែព្យាយាមធ្វើរឿងទាំងឡាយណាដែលអាចបង្កើនចំនួនអ័រម៉ូន Serotonin ក្នុងខ្លួន តាមវិធីដូចខាងក្រោមនេះ៖
ញ៉ាំកាហ្វេ
តាមការស្រាវជ្រាវរបស់អ្នកវិទ្យាសាស្រ្តចំពោះសត្វកណ្តុរបានឲ្យដឹងថា កាហ្វេអាចបង្កើនចំនួនអ័រម៉ូន Serotonin ក្នុងខួរក្បាលបាន។ ភេសជ្ជៈដ៏ល្អមួយនេះក៏អាចជួយឲ្យខួរក្បាលប្រើប្រាស់អ័រម៉ូន Serotonin បានកាន់តែល្អដែរ។ ដូច្នេះកុំបារម្ភច្រើនអី គ្រាន់តែញ៉ាំកាហ្វេមួយពែងប៉ុណ្ណោះនៅពេលមានអារម្មណ៍មិនល្អ ក៏ជួយអ្នកឲ្យសប្បាយចិត្តវិញបានដែរ។ ប៉ុន្តែ ចូរកាត់បន្ថយការញ៉ាំកាហ្វេវិញបើសិនជាអ្នកកំពុងតែមានជំងឺថប់អារម្មណ៍ដោយសារតែជាតិកាហ្វេអ៊ីននេះអាចធ្វើឲ្យអាការៈអ្នកកាន់តែធ្ងន់ធ្ងរបានដូចជា ការញ័រខ្លួន និងបេះដូងលោតញ៉ាប់។
ចេញទៅខាងក្រៅផ្ទះ
ថ្វីបើការពិតនិយាយថា ការប៉ះពាល់នឹងពន្លឺព្រះអាទិត្យច្រើនអាចធ្វើឲ្យស្បែកឆាប់ចាស់ និងប្រឈមកាន់តែខ្ពស់នឹងមហារីកស្បែកក៏ដោយ វានៅតែមិនមែនជារឿងល្អឡើយដែលអ្នកត្រូវសង្ងំនៅក្នុងផ្ទះរហូតនោះ។ នេះដោយសារតែ ព្រះអាទិត្យគឺជាប្រភពដ៏ឆ្លាតវៃមួយនៃវីតាមីន D ដែលវាសំខាន់ក្នុងការសំយោគអ័រម៉ូន Serotonin ក្នុងខួរក្បាលផង។ យ៉ាងណាមិញ ចូរចៀសឲ្យឆ្ងាយពីពន្លឺព្រះអាទិត្យនៅចន្លោះម៉ោង ១០ព្រឹក ទៅ ៤ល្ងាច ព្រោះតែវាជាពេលវេលាដែលក្តៅខ្លាំង ប៉ុន្តែអ្នកក៏អាចប្រើឡេការពារកម្តៅថ្ងៃបានដែរបើសិនជាចៀសមិនរួច។
ដើរចុះដើរឡើង
យោងទៅតាមអ្នកជំនាញបានឲ្យដឹងថា អ្នកដែលកំពុងតែយកឈ្នះការថប់អារម្មណ៍ និងបាក់ទឹកចិត្តគួរតែហាត់ប្រាណជាទៀតទាត់។ នេះដោយសារតែ វាអាចជួយបង្កើនចំនួនអ័រម៉ូន Serotonin ក្នុងខួរក្បាល ហើយក៏ជម្រុញដល់អារម្មណ៍កាន់តែល្អដែរ។ វាក៏ជួយជម្រុញដល់ការជឿជាក់លើខ្លួនឯង និងផ្តល់គំនិតវិជ្ជមានដល់រូបសម្បត្តិខ្លួនឯងទៀត។ វាមិនបាច់ត្រូវការហាត់ប្រាណក្នុងក្លិបរាល់ថ្ងៃដើម្បីមានអារម្មណ៍ល្អទេ ប៉ុន្តែការដើរធម្មតាៗយ៉ាងហោចណាស់ ២០នាទីក្នុងមួយថ្ងៃក៏ជាលំហាត់ប្រាណដ៏ល្អរួចទៅហើយ។
ញ៉ាំប្រូតេអ៊ីន
ចូរប្រាកដថា អ្នកបានបញ្ចូលអាហារសម្បូរជាតិប្រូតេអ៊ីនក្នុងរបបអាហារប្រចាំថ្ងៃហើយ។ អ្នកជំនាញខាងអាហារូបត្ថម្ភនិយាយថា ប្រុតេអ៊ីនគឺជារបស់ដ៏សំខាន់សម្រាប់សំយោគអ័រម៉ូនជាច្រើន ហើយក្នុងនោះក៏មាន Serotonin ផងដែរ។ ប្រភពប្រូតេអ៊ីនដែលអាចជួយសំយោគអ័រម៉ូននេះបានល្អបំផុតគឺសត្វដូចជា ស៊ុត សាច់មាន់ មាន់ទោ និងសាច់គោ។
ម៉ាស្សា
យើងទាំងអស់គ្នាសុទ្ធតែដឹងហើយថា ការម៉ាស្សាអាចធ្វើឲ្យមានអារម្មណ៍ល្អ។ អ្នកជំនាញនិយាយថា អារម្មណ៍ល្អនឹងជួយបង្កើនការផលិតអ័រម៉ូន Serotonin ដូច្នេះ វានឹងកាន់តែមានអារម្មណ៍អស្ចារ្យថែមទៀត។ ពិតណាស់ វាមិនគ្រាន់តែនិយាយថា ការម៉ាស្សាអាចជួយបង្កើនចំនួនអ័រម៉ូនសប្បាយចិត្តទេ តែសកម្មភាពផ្សេងៗទៀតដែលអាចធ្វើឲ្យអ្នកសើចបាន ក៏ជារឿងល្អថែមទៀតដែរ។ ក្រៅពីនេះ ការម៉ាស្សាមិនគ្រាន់តែជួយបង្កើនចំនួនអ័រម៉ូន Serotonin ទេ តែក៏ជួយបន្ថយស្រ្តេសដែរ៕