ការរលាកស្បែកដោយសារតែពន្លឺព្រះអាទិត្យអាចកើតឡើងនៅពេលដែលអ្នករស់នៅ ឬធ្វើការនៅក្រោមកម្តៅព្រះអាទិត្យខ្លាំងជាពិសេសចន្លោះម៉ោង ១០ព្រឹក ដល់ម៉ោង ៤រសៀលតែម្តង។ ដូច្នេះតើអ្នកត្រូវធ្វើអ្វីខ្លះទៅដើម្បីឲ្យរបួសនេះឆាប់ជា និងកុំឲ្យមានបញ្ហាកាន់តែច្រើនកើតឡើងទៀត? យកល្អអ្នកគួរតែចៀសវាងរឿងមួយចំនួនដូចខាងក្រោមនេះខណៈពេលដែលកំពុងតែព្យាបាលស្បែកដែលរលាកដោយសារព្រះអាទិត្យ។

ភ្លេចញ៉ាំទឹក

ការដែលរលាកស្បែកដោយសារពន្លឺព្រះអាទិត្យអាចងាយនឹងធ្វើឲ្យរាងកាយខ្សោះជាតិទឹកណាស់។ រឿងនេះកើតឡើងជាពិសេសបើសិនជាការរលាកនោះកើតឡើងច្រើនលើរាងកាយ និងខ្លាំងក្លា។ ហេតុដូច្នេះហើយ ការញ៉ាំទឹកបន្ថែមកាន់តែច្រើនក្នុងមួយថ្ងៃគឺជារឿងសំខាន់បំផុតបើសិណជាអ្នកមានបញ្ហារលាកស្បែកដោយសារពន្លឺព្រះអាទិត្យ។ ប៉ុន្តែមិនខ្វល់ថាអ្នករលាកឬអត់ទេ ការញ៉ាំទឹកមួយថ្ងៃបាន ២លីត្រជារៀងរាល់ថ្ងៃនៅតែជារឿងសំខាន់ដដែលដែលអ្នកគួរតែធ្វើឲ្យបាន។ 

ស្លៀកពាក់សម្លៀកបំពាក់តឹងៗ

វាមិនមែនជាគំនិតដ៏ល្អមួយដែលអ្នកត្រូវស្លៀកពាក់ខោអាវតឹងៗនៅពេលមានការរលាកស្បែកដោយសារតែពន្លឺព្រះអាទិត្យឡើយ ដោយសារតែវានឹងគ្រាន់តែធ្វើឲ្យមិនមានផាសុកភាពប៉ុណ្ណោះ។ រាងកាយនឹងព្យាយាមធ្វើឲ្យរបួសនេះជាតាមរយៈការបង្កើនលំហូរឈាមទៅចិញ្ចឹមកន្លែងដែលមានបញ្ហា ធ្វើឲ្យវាក្តៅ និងក្រហម។ ការពាក់ខោអាវតឹងៗអាចធ្វើឲ្យបញ្ហានេះកាន់តែធ្ងន់ធ្ងរថែមទៀតទេ។ 

ប្រើគ្រឿងផាត់មុខលុបបំបាត់កន្លែងរលាក

ការលុបបំបាត់កន្លែងរលាកដោយប្រើគ្រឿងសម្អាងនៅលើខ្នង និងដៃអាចជួយបំបាត់ការឈឺចាប់ ឬប៉ះពាល់នឹងការឈឺចាប់បានមែន ប៉ុន្តែវាអាចធ្វើឲ្យស្បែកនោះកាន់តែមានបញ្ហាថែមទៀតទេ។ បើសិនជាអ្នកមានគម្រោងធ្វើបែបនេះមែន ចូរគិតម្តងទៀតទៅ។ អ្នកជំនាញនិយាយថា ការលាបគ្រឿងសម្អាងពីលើកន្លែងរលាកអាចបន្ថយល្បឿននៃការជាសះរបស់វា ហើយក៏ធ្វើឲ្យមានការបង្ករោគផងដែរ។ 

លាបជែលប្រទាលកន្ទុយក្រពើដែលមានក្លិនក្រអូប

មធ្យោបាយព្យាបាលស្បែកដែលរលាកដោយសារពន្លឺព្រះអាទិត្យដ៏មានប្រសិទ្ធភាពបំផុតមួយគឺការលាបជែលប្រទាលកន្ទុយក្រពើ។ សម្រាប់អ្នកដែលមិនអាចរករុក្ខជាតិនេះបាន អ្នកអាចប្រើផលិតផលជែលនេះដែលលក់តាមទីផ្សា។ យ៉ាងណាមិញ ចូរជ្រើសរើសជែលដែលគ្មានគ្រឿងផ្សំណាផ្សេងក្រៅពីនេះ ជាពិសេសជែលដែលមានក្លិនក្រអូបតែម្តង ព្រោះវាគ្រាន់តែអាចធ្វើឲ្យអាការៈរលាកស្បែកនោះកាន់តែធ្ងន់ធ្ងរប៉ុណ្ណោះ៕