​ប្រដាប់ប្រដា​ហ្វឹកហាត់​ផ្ទាល់ខ្លួន​របស់​វីរបុរស​ក្បាច់គុន​កុង​ហ្វូ ប្រ៊ូ​ស លី (​លី​សៀវ​ឡុង​) នឹងត្រូវ​ដាក់លក់​ឡាយ​ឡុង​នៅក្រោម​ដង​ញញួរ​នៅ​ចុងខែ​នេះ ក្នុងការ​ដាក់លក់​ជា​ប្រវត្តិសាស្ត្រ​មួយ ដែល​នឹង​ធ្វើឱ្យ​អ្នកគាំទ្រ​ក្បាច់គុន​កុង​ហ្វូ​នៅ​គ្រប់​ទីកន្លែង​ស្រក់ទឹកមាត់​ចង់បាន​។​

​ប្រដាប់ប្រដា​ហាត់ ដែល​កាន់កាប់​ដោយ​មិត្ត​ជិតស្និទ្ធ​ម្នាក់​របស់​ប្រ៊ូ​ស លី គឺ លោក ហឺប ជែក​សុន ត្រូវបាន​គេ​រំពឹងថា​នឹង​លក់​ឡាយឡុង​ក្នុងតម្លៃ​យ៉ាងហោចណាស់ ៦៥.០០០ ដុល្លារ​។​

​ជែក​សុន​គឺជា​សិស្ស​ជំនា​ន់ទី ១ នៃ​សាលា​ក្បាច់គុន​កុង​ហ្វូ Jeet Kune Do ដែល​បង្កើតឡើង​ដោយ​លី សៀវ​ឡុង និង​ជា​អ្នកបង្កើត​សម្ភារៈ​ហ្វឹកហាត់​ក្បាច់គុន​ផ្ទាល់​របស់​លី​។​

​ប្រដាប់ប្រដា​ហ្វឹកហាត់​ជាច្រើន​នៅក្នុង​ការលក់​ដេញថ្លៃ​នេះ​ត្រូវបាន​បង្កើតឡើង​ដោយ​លោក​ជែក​សុន​ផ្ទាល់ ដើម្បី​ជួយ​ក្នុងការ​ហ្វឹកហាត់​ដ៏​ខ្លាំងក្លា​របស់​លី ព្រោះ​ឧបករណ៍​ស្តង់ដារ​មិនអាច​ទប់​ជាប់​នឹង​កម្លាំង​របស់គាត់​បាន​ឡើយ​។​

​បន្ទាប់ពី​ការស្លាប់​របស់លោក​លី សម្ភារៈ​ហ្វឹកហាត់​ទាំងនេះ​ត្រូវបាន​ប្រគល់​ឱ្យទៅ​លោក​ជែក​សុន​វិញ ហើយ​ឥឡូវនេះ​វា​ត្រូវបាន​ដាក់លក់​នៅលើ​ទីផ្សារ​ដោយ​កូនប្រុស​របស់គាត់​គឺ​លោក ម៉ាក អា​ស្តុ​ន ជែក​សុន​។​

​ក្នុងចំណោម​វត្ថុ​ដែល​នឹង​ដាក់លក់​ដេញថ្លៃ​នោះ ក៏មាន​នាឡិកាដៃ​ម៉ាក Timex របស់​លី​សៀវ​ឡុង​ផងដែរ (​តម្លៃ ១២.០០០​ដុល្លារ​)៕

ប្រភព៖ rasmeinews.com