កាលពីពេលថ្មីៗនេះ បុរសជនជាតិចិន វ័យ៥៧ឆ្នាំម្នាក់ ត្រូវគេថតបានស្ពាយប្រពន្ធពិការនៅលើខ្នងរបស់ខ្លួន ចុះពីលើកំពូលភ្នំ Huangshan ដែលជាតំបន់បេតិកភណ្ឌពិភពលោក ស្ថិតនៅភាគអាគ្នេយ៍ ខេត្ត Anhui ប្រទេសចិន។
បើតាមវីដេអូឃ្លិបដែលថតកាលពីថ្ងៃអាទិត្យ ទី២២ ខែកក្កដា ឆ្នាំ២០១៨ កន្លងទៅនេះ បានបង្ហាញឲ្យឃើញ លោក Wang Xiaomin ដើរចុះជណ្ដើរភ្នំដ៏ល្បីមួយរបស់ប្រទេសចិន ជាមួយនឹងភរិយាវ័យ ៥៣ឆ្នាំ ដែលចងជាប់នៅក្រោយខ្នង។
លោក Wang បាននិយាយថា «ពិភពលោកនេះពិតជាធំណាស់ ហើយខ្ញុំចង់នាំនាងមើលវា ដូច្នេះនាងនឹងមិនស្ដាយក្រោយឡើយ។ ខ្ញុំចង់ធ្វើឲ្យជីវិតនាងកាន់តែមានន័យ»។
គួរបញ្ជាក់ថា ប្រពន្ធរបស់លោក Wang ដែលមិនបានបញ្ចេញឈ្មោះ ត្រូវរកឃើញថាកើតជំងឺរ៉ាំរ៉ៃ Motor Neurone Disease (MND) កាលពី៥ឆ្នាំមុន។ អាការៈនេះធ្វើឲ្យប៉ះពាល់យ៉ាងខ្លាំងដល់សរសៃប្រសាទនៅក្នុងខួរក្បាល និងខួរឆ្អឹងដែលទទួលខុសត្រូវក្នុងការបញ្ជូនសារ ដើម្បីប្រាប់សាច់ដុំឲ្យធ្វើអ្វីមួយ។
ទោះបីជាយ៉ាងណា លោក Wang បានបន្ថែមថា «ខ្ញុំដឹងថា នាងមិនមានសង្ឃឹមច្រើនឡើយ ដែលអាចជាពីអាការៈនេះ ដូច្នេះទើបខ្ញុំនាំនាងដើរលេងដើម្បីមើលពិភពលោក»។ យ៉ាងណាមិញ ប្ដីប្រពន្ធដែលមិនមានកូននេះ បានធ្វើដំណើរជាច្រើនកន្លែងរួចមកហើយ៕
ប្រភព៖ sabay.com.kh