តារាចម្រៀងនិងជាអ្នកនិពន្ធបទចម្រៀងអាមេរិក នាង ដេមី ឡូវ៉ាតូ ត្រូវបានដឹកទៅមន្ទីរពេទ្យនៅទីក្រុងឡូសអ៊ែនជែឡេស រដ្ឋកាលីហ្វ័រញ៉ា កាលពីថ្ងៃអង្គារទី២៤កក្កដា ដោយសារបែកថ្នាំ (សេពហេរ៉ូអ៊ីនហួសកម្រិត)។
ប្រភពនានាបានចង្អុលបង្ហាញថា នាងឡូវ៉ាតូ អាយុ ២៥ ឆ្នាំត្រូវគេប្រទះឃើញសន្លប់បាត់ស្មារតី និងព្យាបាលជាមួយថ្នាំ Narcan ជាការព្យាបាលបន្ទាន់សម្រាប់ការបែកថ្នាំ នៅផ្ទះរបស់នាងនៅតំបន់ហូលីវូដហ៊ីល នៅរសៀលថ្ងៃអង្គារ។ បន្ទាប់មក គេបានដឹកនាងទៅមន្ទីរពេទ្យ។ តាមដឹង នៅមួយយប់មុននោះ នាងបានចេញក្រៅដើម្បីអបអរខួបកំណើតរបស់មិត្តភក្តិ។
ទស្សនាវដ្តី People ដែលដកស្រង់ប្រភពជិតស្និទ្ធជាមួយនាងឡូវ៉ាតូ បានឱ្យដឹងថា នាង “មានស្ថានភាពនឹងនរ” នៅក្នុងមន្ទីរពេទ្យ ប្រហែលមួយម៉ោងបន្ទាប់ពីព័ត៌មាននៃការចូលពេទ្យរបស់តារាចម្រៀងរូបនេះបានបែកធ្លាយ។ មិនយូរប៉ុន្មាន ម្តាយមីងរបស់នាង លោកស្រី កេរីសសា ដាន់ បានបង្ហោះតាមហ្វេសប៊ុកថា នាង “ដឹងខ្លួននិងអាចងើបបានវិញហើយ”៕
ប្រភព៖ rasmeinews.com