តារាចម្រៀងជើងចាស់របស់ថៃ Tik Shiro បានបាត់មុខលើឆាកតន្ត្រីអស់រយៈពេលជាយូរគិតមកទល់បច្ចុប្បន្ន ហើយពេលនេះលោកបានវិលមកវិញ ដោយនាំនូវព័ត៌មានអស្ចារ្យជូនប្រទេសដល់ទៅ២ គឺ កម្ពុជា និងថៃ។
លោក Tik Shiro ដែលជាកំពូលតារាចម្រៀងរបស់ប្រទេសថៃ បានវិលមកអង្រួនពិភពសិល្បៈជាថ្មីដោយនាំមកនូវបទចម្រៀងដែលជាស្នាដៃថ្មីមានចំណងជើងថា “Sad Man” រួមជាមួយវត្តមានពិសេស គឺតារាចម្រៀងល្បីរបស់កម្ពុជា ខេមរៈ សេរីមន្តផងដែរ។
តាមរយៈការផ្ដល់សម្ភាសកាលពីថ្ងៃទី ២៤ ខែកក្កដា ឆ្នាំ ២០១៨ ម្សិលមិញនេះ Tik Shiro បាននិយាយថា៖ “នេះគឺជាប្រវត្តិសាស្ត្រមួយទៀតរបស់កម្ពុជា និងថៃ ដែលមានឱកាសរួមគ្នាច្រៀងក្នុងបទចម្រៀងតែមូយ មានដល់ទៅ២ភាសាបែបនេះ”។
ជាមួយគ្នានោះ លោកក៏មានគម្រោងធ្វើដំណើរមកកាន់ប្រទេសកម្ពុជាឆាប់ៗ ជាមួយលោក ខេមរៈ សេរីមន្ត ដើម្បីរៀបចំការងារផ្សេងៗ ទាក់ទងនឹងគម្រោងថ្មីៗរបស់ពួកគេ ហើយក៏នឹងមានការប្រគំតន្ត្រីពិសេសដែរ៕
ប្រភព៖ sabay.com.kh