ជួយចែករំលែក! របៀប​ប្រើប្រាស់ “ក្រូចឆ្មារ” បំបាត់ស្ត្រេស

ភាគច្រើននៃពួកយើងសុទ្ធតែស្គាល់និងឧស្សាហ៍ទទួលទានក្រូចឆ្មារ ប៉ុន្តែដឹងទេថាអាហារនេះអាចជួយបំបាត់ស្ត្រេសបាន? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរបៀបប្រើប្រាស់ក្រូចឆ្មារដើម្បីបំបាត់ស្ត្រេស ៖

១. ប្រើជាគ្រាប់បាល់បំបាត់ស្ត្រេស

ធ្លាប់ដឹងទេថាអ្នកអាចប្រើក្រូចឆ្មារជាគ្រាប់បាល់បំបាត់ស្ត្រេសបានដោយគ្រាន់តែញី ឬរំកិលវាលើផ្ទៃរឹងណាមួយ? ដើម្បីកាត់បន្ថយស្ត្រេសអ្នកអាចដាក់ក្រូចឆ្មារ ២ ផ្លែលើតុ ឬផ្ទៃរាបស្មើណាក៏បាន បន្ទាប់មកញីក្រូចឆ្មារចុះឡើងជាមួយបាតដៃទាំងសងខាង។

២. ប្រើជាឧបករណ៍ម៉ាស្សាជើង

អ្វីដែលអ្នកត្រូវធ្វើ គឺប្រើបាតជើងជាន់ថ្នមល្មមលើក្រូចឆ្មារដែលដាក់លើផ្ទៃរាបស្មើ ឬកម្រាលឥដ្ឋរួចរំកិលចុះឡើង។ វិធីនេះក៏អាចជួយបំបាត់ស្ត្រេសបានមួយកម្រិតផងដែរ។

៣. ប្រើជាផលិតផលផ្ដល់ក្លិនក្រអូប

ក្លិននៃក្រូចឆ្មារមានប្រសិទ្ធភាពបំបាត់ស្ត្រេសបានយ៉ាងប្រសើរ។ ដូច្នេះប្រសិនបើមា​នស្ត្រេសខ្លាំង អ្នកអាចសាកល្បងហិតក្លិនសំបកក្រូចឆ្មារដើម្បីបន្ធូរអារម្មណ៍ខ្លះ។

៤. ប្រើជាភេសជ្ជៈបង្កើនថាមពល

ទោះបីជាការទទួលទានទឹកធម្មតា ១ កែវ គឺគ្រប់គ្រាន់ដើម្បីទទួលបានអារម្មណ៍ស្រស់ស្រាយទប់ទល់នឹងភាពស្ត្រេស។ ប៉ុន្តែអ្នកក៏អាចបង្កើនលក្ខណៈសម្បត្តិកាត់បន្ថយស្ត្រេសនៃទឹកធម្មតាបានដោយបន្ថែមទឹកក្រូចឆ្មារស្រស់ចូល។ បើប្រៀបធៀបនឹងភេសជ្ជៈកីឡា ឬភេសជ្ជៈប៉ូវកម្លាំងផ្សេងទៀត ទឹកក្រូចឆ្មារជាភេសជ្ជៈធម្មជាតិល្អចំពោះសុខភាពជាង។

៥. ប្រើជាភេសជ្ជៈធម្មជាតិជំនួសកាហ្វេ

ជាតិកាហ្វេអ៊ីនក្នុងកាហ្វេពេលខ្លះអាចនឹងបណ្ដាលឱ្យអ្នកមានអារម្មណ៍កាន់តែស្ត្រេសថែម! ដូច្នេះដើម្បីជាការប្រសើរអ្នកអាចទទួលទានទឹកក្រូចឆ្មារក្ដៅឧណ្ហៗជំនួសវិញ។ អ្វីដែលអ្នកត្រូវធ្វើ គឺគ្រាន់តែបន្ថែមទឹកក្រូចឆ្មារម្ខាងក្នុងទឹកក្ដៅឧណ្ហៗ ១ ពែង រួចកូរឱ្យសព្វ សឹមទទួលទាន។ អ្នកក៏អាចបន្ថែមទឹកឃ្មុំបន្តិចចូលដើម្បីបង្កើនរសជាតិផងដែរ។

៦. ជាភេសជ្ជៈពង្រឹងប្រព័ន្ធភាពស៊ាំ

ស្ត្រេសក៏ជាកត្តាចម្បងមួយដែលបណ្ដាលឱ្យប្រព័ន្ធភាពស៊ាំចុះខ្សោយផងដែរ។ ប៉ុន្តែកុំបារម្ភ! ក្រូចឆ្មារមានផ្ទុកសម្បូរទៅដោយវីតាមីន C ដែលជាសារធាតុប្រឆាំងអុកស៊ីតកម្មជួយពង្រឹងប្រព័ន្ធភាពស៊ាំ។ ដូច្នេះកុំភ្លេចរួមបញ្ចូលវាក្នុងរបបអាហារប្រចាំថ្ងៃ៕