ចូលចិត្តញ៊ាំ “ប៊ិគួក” អត់? អាហារមើមនេះល្អណាស់ចំពោះសុខភាព

ប៊ិគួកជាអាហារមើមមួយប្រភេទដែលងាយនឹងរកទិញបានណាស់ក្នុងប្រទេសកម្ពុជា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះបីភាគច្រើននៃពួកយើងស្គាល់និងឧស្សាហ៍ទទួលទានមើមប៊ិគួកយ៉ាងណាក៏ដោយ ក៏ប្រហែលជាមិនធ្លាប់ចាប់អារម្មណ៍អំពីអត្ថប្រយោជន៍ដ៏ប្រសើររបស់អាហារមើមនេះចំពោះសុខភាពឡើយ។ ដូច្នេះថ្ងៃនេះវេបសាយសុខភាព  Health.com.kh នឹងបង្ហាញឱ្យដឹងពីផលល្អៗនៃការទទួលទានប៊ិគួក ៖

១. ពង្រឹងសុខភាពបេះដូង

នេះក៏ព្រោះតែមើមប៊ិគួកគ្មានផ្ទុកកូឡេស្តេរ៉ូលឡើយដូច្នេះការទទួលទានវាមិនបង្កបញ្ហាស្ទះសសៃឈាមនោះទេ។ ម្យ៉ាងវិញទៀតប៊ិគួកមានផ្ទុកសម្បូរទៅដោយសារធាតុប្រឆាំងអុកស៊ីតកម្ម ប៉ូតាស្យូម និងជាតិសសៃដែលជួយបញ្ចុះកម្រិតនៃកូឡេស្តេរ៉ូល ព្រមទាំងទប់ស្កាត់បញ្ហាសម្ពាធឈាមឡើងខ្ពស់បានយ៉ាងប្រសើរ។ ហើយដូចដែលបានដឹងកន្លងមកកម្រិតនៃកូឡេស្តេរ៉ូលមិនល្អនិងសម្ពាធឈាមឡើងខ្ពស់ជាកត្តាចម្បងនៃបញ្ហាជំងឺបេះដូង។

២. ធ្វើឱ្យការរំលាយអាហារកាន់តែមានលក្ខណៈប្រសើរឡើង

ប៊ិគួកជាប្រភពដ៏ល្អបំផុតមួយនៃជាតិសសៃនិងជាតិទឹកដែលមានប្រសិទ្ធភាពជួយសម្រួលដល់ដំណើរការនៃការរំលាយអាហារ រួមទាំងចលនាពោះវៀន។ ការទទួលទានប៊ិគួកជាប្រចាំអាចជួយទប់ស្កាត់បញ្ហាទល់លាមកគួរឱ្យកត់សម្គាល់។ ការទទួលទានប៊ិគួកក៏ល្អសម្រាប់អ្នកដែលចង់ស្រកទម្ងន់ផងដែរ។ នេះក៏ព្រោះតែប៊ិគួកមានផ្ទុកកាឡូរីទាបបំផុត ហើយបរិមាណខ្ពស់នៃជាតិទឹកនិងជាតិសសៃដែលអាហារមើមនេះមានផ្ទុកជួយឱ្យឆាប់ឆ្អែតនិងឆ្អែតបានយូរ។

៣. ពង្រឹងប្រព័ន្ធភាពស៊ាំរាងកាយ

ការទទួលទានប៊ិគួកអាចជួយពង្រឹងប្រព័ន្ធភាពស៊ាំរាងកាយតាមរយៈការបង្កើនបរិមាណនៃបាក់តេរីល្អក្នុងពោះវៀន។ លើសពីនេះទៅទៀតប៊ិគួកមានផ្ទុកសម្បូរទៅដោយវីតាមីន C ដែលចាំបាច់សម្រាប់ពង្រឹងប្រព័ន្ធភាពស៊ាំរាងកាយឱ្យកាន់តែខ្លាំងក្លាឡើង។ វីតាមីន C ក៏ល្អសម្រាប់សុខភាពស្បែកផងដែរដោយជួយការពារកោសិកាស្បែកមិនឱ្យទទួលរងការបំផ្លាញពីសំណាក់រ៉ាឌីកាល់សេរី៕