គួរអាន! អាហារអ្វីខ្លះជាប្រភពដ៏ប្រសើរនៃ “ម៉ាញ៉េស្យូម”?

មិនគួរធ្វេសប្រហែសមើលរំលងឡើយ កង្វះជាតិម៉ាញ៉េស្យូមអាចបង្កបញ្ហាសុខភាពធ្ងន់ធ្ងរគួរឱ្យព្រួយបារម្ភជាច្រើន ខណៈដែលដំណើរការមុខងារមួយភាគធំក្នុងរាងកាយពឹងផ្អែកលើវារួមបញ្ចូលទាំងប្រព័ន្ធភាពស៊ាំ សុខភាពបេះដូង មុខងារសាច់ដុំនិងជាលិកា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)  ថាតើអាហារអ្វីខ្លះជាប្រភពដ៏ប្រសើរនៃជាតិម៉ាញ៉េស្យូម? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារមួយចំនួនដែលមានផ្ទុកសម្បូរទៅដោយម៉ាញ៉េស្យូម ៖

១. បន្លែបៃតង

ក្រៅពីជាប្រភពដ៏ល្អបំផុតមួយនៃជាតិម៉ាញ៉េស្យូមហើយនោះ បន្លែបៃតងក៏មានផ្ទុកសម្បូរទៅដោយជាតិរ៉ែនិងវីតាមីនចាំបាច់ជាច្រើនផ្សេងទៀតផងដែរ។ ដូច្នេះកុំភ្លេចរួមបញ្ចូលបន្លែបៃតងក្នុងរបបអាហារប្រចាំថ្ងៃដើម្បីរក្សាបាននូវសុខភាពរឹងមាំ។

២. ផ្លែបឺរ

ជាប្រភពដ៏ប្រសើរបំផុតមួយផ្សេងទៀតនៃជាតិម៉ាញ៉េស្យូម។ ផ្លែបឺរទំហំមធ្យមមួយផ្លែមានផ្ទុកជាតិម៉ាញ៉េស្យូមដល់ទៅ ៥៨ មីលីក្រាមឯណោះ។

៣. គ្រាប់ធញ្ញជាតិនិងគ្រាប់ពូជ

អ្នកអាចទទួលទានគ្រាប់ធញ្ញជាតិនិងគ្រាប់ពូជជាអាហារសម្រន់ ឬរួមបញ្ចូលក្នុងរបបអាហារប្រចាំថ្ងៃដើម្បីទទួលបានជាតិម៉ាញ៉េស្យូមគ្រប់គ្រាន់។ ទោះជាយ៉ាងណាមិនគួរទទួលទានលើសពីមួយក្ដាប់ដៃពេញក្នុងមួយថ្ងៃឡើយ។

៤. ត្រី

ក៏ជាកំពូលអាហារដែលមានផ្ទុកសម្បូរទៅដោយជាតិម៉ាញ៉េស្យូមផងដែរ ពិសេសត្រីសម្បូរខ្លាញ់។ ក្រៅពីម៉ាញ៉េស្យូមត្រីសម្បូរខ្លាញ់ក៏ជាប្រភពដ៏ល្អបំផុតមួយនៃអាស៊ីតខ្លាញ់អូមេហ្កា ៣ និងវីតាមីន D ។

៥. សូកូឡាខ្មៅ

ការទទួលទានសូកូឡាខ្មៅ ១ ជ្រុងអាចផ្ដល់ឱ្យរាងកាយនូវជាតិម៉ាញ៉េស្យូម ៩៥ មីលីក្រាមឯណោះ។ ទោះជាយ៉ាងណាត្រូវប្រាកដថាអ្នកបានជ្រើសរើសសូកូឡាខ្មៅដែលមានផ្សំឡើងពីកាកាវយ៉ាងហោចណាស់ ៧៥ ភាគរយ និងមិនត្រូវទទួលទានច្រើនពេកឡើយ៕