សំណួរមួយលានដុល្លាដែលម្តាយ ឬស្រ្តីមានផ្ទៃពោះភាគច្រើនតែងតែចង់សួរ និងចង់ដឹងនោះគឺថា តើកូនក្នុងផ្ទៃខ្ញុំនេះជាស្រី ឬប្រុស? អ្នកខ្លះក៏មិនចង់ដឹងថាទារកក្នុងផ្ទៃជាភេទអ្វីដែរ សំខាន់ឲ្យតែទារកមានសុខភាពល្អទៅបានហើយ ចាំកូនកើតមកស្រីឬប្រុសក៏បានដែរឲ្យតែជាកូនមានសុខភាពល្អ។ ប៉ុន្តែខ្លះទៀតគឺមិនចង់ចាំបែបនេះទេ គឺចង់ដឹងឲ្យបានលឿនតាមតែអាចធ្វើទៅបាន។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ពិតណាស់ មានតែគ្រូពេទ្យទេទើបអាចជឿជាក់ថា ជាអ្នកកំណត់ដឹងពីភេទរបស់ទារក។ ដូច្នេះតាមរយៈការថតអេកូ តើពេលណាទើបយើងអាចដឹងថា កូនក្នុងផ្ទៃជាភេទប្រុសឬស្រីទៅ?
នៅពេលនិយាយដល់ការពិនិត្យរកមើលភេទរបស់ទារក វាមិនមែនមានតែតេស្តមួយទៀតដែលយើងអាចធ្វើបាននោះ។ ដូច្នេះបើសិនជាអ្នកចង់ដឹងអំពីភេទកូន គ្រូពេទ្យអាចប្រើវិធីធ្វើតេស្តច្រើនប្រភេទខុសៗគ្នាទៅតាមដំណាក់កាលនៃការមានផ្ទៃពោះរបស់អ្នក ប៉ុន្តែសម្រាប់ស្រុកយើងវិញ ការធ្វើតេស្តដែលពេញនិយមបំផុតនោះគឺការថតអេកូតែម្តង។
ការថតអេកូគឺជាការធ្វើតេស្តពិនិត្យសុខភាពពេលមានផ្ទៃពោះមួយប្រភេទ ដែលតម្រូវឲ្យអ្នកគេងលើគ្រែ និងប្រើឧបករណ៍ដើម្បីដាក់លើពោះហើយបង្ហាញរូបភាពនៅលើកញ្ចក់ទូរទស្សន៍ម៉ាស៊ីននេះ។ តេស្តនេះគឺប្រើប្រាស់រលកសម្លេងដើម្បីបង្កើតជារូបភាពរបស់ទារក ហើយក៏ច្រើនតែប្រើដើម្បីពិនិត្យការលូតលាស់ និងសុខភាពរបស់ទារកផងដែរ។ ចាប់តាំងពីការថតអេកូបង្កើតជារូបភាពរបស់ទារកមក វាក៏អាចបង្ហាញអំពីភេទរបស់ទារកបានដែរ។ គ្រូពេទ្យភាគច្រើនកំណត់កាលវិភាគថា អាចមើលឃើញភេទរបស់កូននៅជុំវិញសប្តាហ៍ទី ១៨ ទៅ ២១ ប៉ុន្តែភេទប្រហែលជាកំណត់ដឹងលឿនជាងនេះទៀតប្រហែល សប្តាហ៍ទី ១៤ អាស្រ័យទៅតាមបទពិសោធន៍របស់គ្រូពេទ្យ ជាពិសេសភាពជំនាញនៃការអូសអេកូតែម្តង។
វាតែងតែមិនមានភាពសុក្រិត ១០០ភាគរយឡើយ។ ទារកអ្នកអាចនឹងមានជំហរពិបាកមើល ដែលធ្វើឲ្យគ្រូពេទ្យពិបាកនឹងមើលឃើញប្រដាប់ភេទច្បាស់ណាស់។ បើសិនជាគ្រូពេទ្យថតអេកូមិនអាចមើលឃើញលិង្គទេ នោះបញ្ជាក់ថាកូនអ្នកមានភេទស្រី តែបើមើលឃើញលិង្គ នោះគឺជាភេទប្រុស។ ប៉ុន្តែកំហុសតែងតែអាចកើតមានជានិច្ច។
ជំនឿផ្សេងៗ
ទោះបីជាយ៉ាងណាក៏ដោយ អ្នកខ្លះតែងមានជំនឿទៅលើចាស់ៗបូរាណលើការទាយដឹងអំពីភេទរបស់ទារកក្នុងផ្ទៃ។ តាមចាស់ៗនិយាយថា បើសិនជាអ្នកចេះតែឃ្លានជាប់ក្នុងពេលមានផ្ទៃពោះ នោះអ្នកប្រហែលជាមានកូនប្រុសហើយ។ រឿងនេះត្រូវបានគេជឿថា វាមានការបញ្ចេញអ័រម៉ូនតេស្តូស្តេរ៉ូន ដែលជាអ័រម៉ូនភេទប្រុស និងធ្វើឲ្យចំណង់អាហារកើនឡើងលើម្តាយ។
មានជំនឿមួយទៀតនិយាយថា កាលណាចង្វាក់បេះដូងទារកលោតខ្ពស់ ឬច្រើនជាង ១៤០ ដងក្នុងមួយនាទី មានន័យថាអ្នកមានកូនស្រីហើយ។ មួយវិញទៀត បើសិនជាអ្នកចេះតែឧស្សាហ៍ភ្លេចភ្លាំង នោះអ្នកកំពុងតែមានកូនស្រីហើយ។ អ្នកខ្លះទៀតជឿថា អ្នកកំពុងតែមានកូនប្រុសបើសិនជាពោះអ្នកស្ថិតនៅខាងក្រោម ខណៈពេលដែលកូនស្រីមានពោះស្ថិតនៅខាងលើ។(អាន:ថ្នាំងងុយគេង ពេលអ្នកគួរប្រើ) ខណៈពេលដែលនេះគឺជាជំនឿរបស់ចាស់ៗពីដើម តែវានៅមិនទាន់មានអំណះអំណាងបែបវិទ្យាសាស្រ្ត ឬស្រាវជ្រាវទាក់ទងនឹងជំនឿនេះនៅលើយទេ។ មធ្យោបាយតែមួយគត់ដើម្បីដឹងថាអ្នកមានកូនស្រីឬប្រុសនោះគឺធ្វើការណាត់ជួបដើម្បីពិនិត្យជាមួយគ្រូពេទ្យ៕