នៅពេលក្លាយជាឪពុកម្តាយគេផ្ទាល់យើងនឹងដឹងថាពាក្យទូន្មាន ឬអ្វីឪពុកម្តាយរបស់យើងបានធ្វើនិងប្រដែរប្រដៅមានហេតុផលសមរម្យជាងអ្វីដែលយើងធ្លាប់បានគិតនិងសរសើរពួកគាត់។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ពិតណាស់ទោះបីជាឈានមកដល់សម័យទំនើបដូចបច្ចុប្បន្នក៏ដោយ ក៏យើងមិនអាចប្រកែកបានទេថាពាក្យប្រៀនប្រដៅជាច្រើនដែលធ្លាប់ប្រើកាលមុននៅតែជាដំបូន្មានល្អៗអាចយកមកប្រើសម្រាប់ទូន្មានដល់ជំនាន់ក្រោយ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីពាក្យទូន្មានមួយចំនួនដែលមានប្រយោជន៍យកមកពិចារណាប្រើបន្ត ៖

១. អ្នកនឹងទទួលបានអ្វីដែលត្រូវការប្រសិនបើចេះគួរសម

នៅពេលចង់បានអ្វីពីនរណាម្នាក់​គួរណាចេះប្រើប្រាស់ពាក្យគួរសមពោរពេញដោយការគោរពនិងមិនត្រូវទាមទារហួសហេតុពេកទេ។ កុមារតូចៗក៏ត្រូវរៀនឬទទួលបានការអប់រំអំពីការបង្ហាញឥរិយាបទសមរម្យនៅពេលពួកគេចង់បានអ្វីមួយពីឪពុកម្តាយនិងចេះដឹងគុណចំពោះអ្វីដែលពួកគេទទួលបានហើយត្រូវរៀនទទួលស្គាល់អ្វីដែលមិនអាចទទួលបានផងដែរ។ កុមារមិនគួរត្រគោះបោះបោកដើម្បីទទួលបានអ្វីដែលពួកគេចង់បាននោះឡើយជាពិសេសជាមួយឪពុកម្ដាយ។

២. វាជារឿងសំខាន់ណាស់ដែលមនុស្សត្រូវស្គាល់ពីតម្លៃនៃប្រាក់សូម្បីត្រឹមមួយកាក់មួយសេន

នៅពេលដែលយើងបណ្តោយឱ្យក្មេងទទួលបានអ្វីគ្រប់យ៉ាងដែលពួកគេទាមទារ នៅក្នុងជីវិត ពួកអាចនឹងក្លាយជាទំរើសហើយចេះតែចង់ទាមទារនេះនោះដែលប្រសើរមុនទៀតសម្រាប់ជិវិតពួកគេ។ ទោះបីជាជានៅតូចក៏ដោយកុមារគួរតែរៀនពីសារៈសំខាន់នៃការចាយវាយ ពួកគេគួរចេះសន្សំសំចៃសម្រាប់អ្វីដែលពួកគេចង់បាន ឬសម្រាប់ប្រើប្រាស់នៅពេលពួកគេចាស់ទៅ។ ពិតណាស់ មិនមែនឪពុកម្ដាយគ្រប់រូបចង់ឱ្យកូនរស់នៅពឹងផ្អែកតែមកលើខ្លួនទោះបីពួកពេញវ័យហើយនោះទេ ជាពិសេស គឺរឿងហិរញ្ញវត្តុតែម្ដង។

​៣. ចេះទាញយកប្រយោជន៍ពីការសិក្សារៀនសូត្រ

ការអប់រំ គឺមានសារៈសំខាន់ណាស់សម្រាប់ជួយកូនៗលោកអ្នកឱ្យសំរេចបានគោលដៅជីវិតមិនថាពួកគេចង់ធ្វើអ្វីក៏ដោយ។ ទោះពួកគេត្រូវទៅរៀននៅមហាវិទ្យាល័យឬសាលាវិជ្ជាជីវៈណាក៏ដោយ ឱពុកម្តាយគួរបង្រៀននិងលើកទឹកចិត្តឱ្យកូនៗរៀនធ្វើលំហាត់កិច្ចការផ្ទះដោយខ្លួនឯង ចេះរក្សាឥរិយាបទល្អក្នុងថ្នាក់ ហើយមានទំនួលខុសលើអ្វីដែលពួកគេធ្វើខុសក្នុងថ្នាក់។

៤. អ្នកគួរណាចេះផ្ញើសារអរគុណ

វាជាការប្រសើរនៅពេលដែលយើងបង្ហាញនរណាម្នាក់ឱ្យគេដឹងថាយើងយកចិត្តទុកដាក់។ ដូច្នេះការបង្រៀនកូន ឬក្មេងៗឱ្យចេះនិយាយនិងសរសេរផ្ញើពាក្យអរគុណបន្ទាប់ពីទទួលបានអំណោយអ្វីមួយក៏ជាដំបូន្មានដ៏ប្រសើរបំផុតផងដែរ។ ក្មេងៗត្រូវដឹងថាពួកគេគួរតែចេះដឹងគុណនិងគោរពដល់មនុស្សជាទីស្រឡាញ់របស់ពួកគេ។

៥. មនុស្សគ្រប់គ្នាសុទ្ធតែធ្លាប់ធ្វើខុស អ្វីដែលសំខាន់ គឺត្រូវរៀនពីកំហុស

មនុស្សគ្រប់រូបសុទ្ធតែធ្លាប់ធ្វើខុសដូច្នេះវាមិនជាបញ្ហាអ្វីឡើយ។ រឿងដ៏សំខាន់បំផុតមួយទៀតដែលកុមារត្រូវដឹង គឺអំពីការចេះទទួលកំហុសដែលខ្លួនបានធ្វើហើយចេះកែប្រែវិញ។ ដើម្បីផ្ដល់ជាមេរៀន ឬបទពិសោធន៍នោះឪពុកម្ដាយមិនត្រូវការពារកូនៗគ្រប់ពេលសូម្បីតែនៅពេលពួកគេខុស ឬធ្វើអ្វីមិនត្រឹមត្រូវក៏ហើយដោយ។ ឧទាហរណ៍ប្រសិនបើពួកគេភ្លេចធ្វើកិច្ចការសាលា អ្នកមិនគួរធ្វើជំនួសពួកគេនោះទេ។

៦. ប្រសិនបើប្រព្រឹត្តខុសនឹងត្រូវទទួលពិន័យ

ប្រសិនបើអ្នកធ្លាប់ប្រាប់កូនៗថាពួកគេនឹងត្រូវទទួលពិន័យនៅពេលមិនស្ដាប់បង្គាប់ ប៉ុន្តែពួកគេនៅតែធ្វើនោះអ្នកគួរចេះដាក់ទោសកូនខ្លះទៅតាមអ្វីដែលអ្នកធ្លាប់បានប្រាប់គេជាមុនរួចទៅហើយ។ ឪពុកម្ដាយមិនគួរដើរតួជាមិត្តធម្មតាជាមួយកូនគ្រប់ពេលនោះទេ ក៏ព្រោះក្មេងៗអាចចេញទៅក្រៅសេពគប់បង្កើតមិត្តភក្តិបាននៅរាល់ពេលចេញទៅក្រៅ ! ឪពុកម្ដាយ គឺជាអ្នកដែលអប់រំប្រដៅកូនឱ្យដឹងថាសកម្មភាពមួយចំនួនរបស់ពួកគេអាចនឹងមានផលវិបាក ឬបង្កផលអវិជ្ជមានត្រឡប់មកវិញគ្រប់ពេល។

៧. អាហារពេលល្ងាចគួរត្រូវបានទទួលទានជាលក្ខណៈគ្រួសារ

អាហារពេលល្ងាចបែបលក្ខណៈគ្រួសារ គឺជាពេលវេលាដ៏ល្អសម្រាប់សមាជិកគ្រប់រូបបានអង្គុយជុំគ្នា ហើយជជែកលេងទៅវិញទៅមកបង្កើនភាពស្និតស្នាល។ លើសពីនេះទៅទៀតអាហារពេលល្ងាចជុំគ្នានៅផ្ទះក៏ជាពេលវេលាដ៏សាកសមសម្រាប់បង្រៀនកូនៗអំពីទម្លាប់នៃការញ៉ាំអាហារសុខភាពល្អនិងត្រឹមត្រូវផងដែរ។

៨. ការងារផ្ទះជួយកសាងចរិកលក្ខណៈល្អប្រសើរ

ដោយសារតែការងារសាលាមានសារៈសំខាន់ ឪពុកម្តាយសឹងតែគ្រប់រូបមិនរំពឹងឱ្យកូនៗរបស់ខ្លួនមកជួយធ្វើកិច្ចការផ្ទះផ្សេងៗឡើយ។ ទោះជាយ៉ាងណាតាមពិតទៅក្មេងៗមិនត្រឹមតែត្រូវរៀនពីសារៈសំខាន់នៃការចេះទទួលខុសត្រូវតាំងពីវ័យក្មេងប៉ុណ្ណោះទេ ប៉ុន្តែក៏ត្រូវស្វែងយល់ពីការចេះថែរក្សាខ្លួនឯងសម្រាប់ពេលធំឡើងផងដែរ៕