យើងទាំងអស់គ្នាច្រើនតែដឹងថា ការទល់លាមកច្រើនតែបង្កឡើងដោយរបបអាហារកង្វះជាតិសរសៃ និងញ៉ាំទឹកមិនបានគ្រប់គ្រាន់។ ប៉ុន្តែតើអ្នកមានដឹងទេថា ក្រៅពីអាហារនេះ អ្នកក៏អាចមានបញ្ហាទល់លាមកបានដែរទេ? អ្នកជំនាញជាច្រើននិយាយថា មានមូលហេតុផ្សេងៗទៀតក្រៅអាហារជាតិសរសៃ និងទឹក ក៏ធ្វើឲ្យទល់លាមកដែរដូចជា៖
ប្រើថ្នាំបំបាត់ការឈឺចាប់ជាប់
តើអ្នកមានទម្លាប់ញ៉ាំថ្នាំបំបាត់ឈឺចាប់ដូចជា Ibuprofen ឬ Aspirin គ្រប់ពេលដែលអ្នកឈឺក្បាល ឈឺសាច់ដុំ ឬសន្លាក់ដែរទេ? ដូច្នេះវាក៏មិនមានអ្វីត្រូវភ្ញាក់ផ្អើលដែរ ក្នុងការដែលអ្នកជួបបញ្ហាទល់លាមកជានិច្ចនោះ។
ប្រើថ្នាំបន្ទន់លាមកច្រើនជ្រុល
និយាយដល់ថ្នាំបន្ទន់លាមក តើអ្នកមានដឹងថា ការដែលប្រើថ្នាំបំបាត់ការទល់លាមកច្រើនពេកក៏អាចធ្វើឲ្យទល់លាមកវិញដែរទេ? នេះដោយសារតែការប្រើថ្នាំបន្ទន់លាមកច្រើនពេកធ្វើឲ្យពោះវៀនបាត់បង់សមត្ថភាពបញ្ចេញលាមកទៅខាងក្រៅ។ ការប្រើថ្នាំបន្ទន់លាមកច្រើនជ្រុលច្រើនតែឃើញលើអ្នកដែលព្យាយាមសម្រកទម្ងន់ក្នុងវិធីដែលខុស។
ប្រើថ្នាំប្រឆាំងការបាក់ទឹកចិត្ត
តើអ្នកកំពុងតែប្រើថ្នាំប្រឆាំងការបាក់ទឹកចិត្តរាល់ថ្ងៃ និងសម្គាល់ឃើញថា អ្នកមិនបានបន្ទោបង់ទៀងទាត់ទេ? មែនហើយ រឿងនេះដោយសារតែអ្នកប្រើថ្នាំហ្នឹងឯង។ អ្នកជំនាញនិយាយថា ថ្នាំប្រឆាំងការបាក់ទឹកចិត្តប្រភេទចាស់ៗត្រូវបានគេដឹងថា ធ្វើឲ្យទល់លាមក។ មានរឿងពីដែលអ្នកគួរតែធ្វើនៅពេលជួបបញ្ហានេះគឺ ទីមួយ គ្រូពេទ្យចេញថ្នាំបន្ទន់លាមកប្រើ និងទីពីរ គឺប្តូរថ្នាំផ្សេងប្រើ។
ក្រពេញទីរ៉ូអ៊ីតផលិតអ័រម៉ូនមិនគ្រប់
មានជំងឺមួយដែលក្រពេញទីរ៉ូអ៊ីតធ្វើការមិនបានល្អ ដូច្នេះវានឹងប៉ះពាល់ដល់ដំណើរការជាច្រើនរបស់រាងកាយទាំងមូល។ វាអាចធ្វើឲ្យថយចុះការងាររបស់រាងកាយជាច្រើន ហើយក្នុងនោះក៏មានចលនារបស់ពោះវៀនដែរ។
បញ្ហាក្រពះពោះវៀន
ពេលខ្លះ ការទល់លាមកកើតឡើងដោយសារតែបញ្ហាណាមួយក្នុងប្រព័ន្ធក្រពះពោះវៀន។ រឿងនេះត្រឹមត្រូវជាពិសេសនៅពេលដែលមានការចូលរួមរបស់ពោះវៀនតែម្តង ហើយក្នុងគឺជំងឺរលាកពោះវៀនតែម្តង Crohn’s Disease។ ហើយវាក៏ជាដើមហេតុនាំឲ្យទល់លាមកញឹកញាប់ដែរ។
គ្រប់គ្រងជំងឺទឹកនោមផ្អែមមិនបានល្អ
តើអ្នកដឹងថាខ្លួនឯងមានជំងឺទឹកនោមផ្អែម ហើយពិបាកក្នុងការគ្រប់គ្រងជាតិស្ករក្នុងឈាមមែនទេ? រឿងនេះក៏មិនមែនជារឿងគួរឲ្យភ្ញាក់ផ្អើលដែរ ក្នុងការជួបបញ្ហាទល់លាមក។ ជំងឺទឹកនោមផ្អែមដែលមិនអាចគ្រប់គ្រងបាននឹងធ្វើឲ្យជាតិស្ករក្នុងឈាមឡើងខ្ពស់ ខូចសរសៃប្រសាទ ហើយក៏ខូចដល់សរសៃប្រសាទរបស់ប្រព័ន្ធរំលាយអាហារដែរ៕