ភាគច្រើននៃពួកយើងប្រហែលជាមិនធ្លាប់ដឹងទេថាក្រៅពីយកមកញ៊ាំហើយនោះផ្លែស្ត្របឺរីក៏អាចប្រើជាគ្រឿងផ្សំថែរក្សាសម្រស់ផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) គួរប្រើប្រាស់យ៉ាងដូចម្ដេចមែនទេ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីរបៀបងាយៗក្នុងក្នុងការប្រើប្រាស់ផ្លែស្ត្រីបឺរី
១. រូបមន្តជួយឱ្យសក់ភ្លឺរលោងនិងរលាស់
អ្វីដែលអ្នកត្រូវធ្វើ គឺគ្រាន់តែកិនលាយស្ត្របឺរីទុំខ្លាំងចំនួនពី ៧ ទៅ ៨ ផ្លែជាមួយម៉ាយូណេស (mayonnaise) ១ ស្លាបព្រាបាយរហូតក្លាយជាល្បាយខាប់ៗ។ លាបល្បាយពេញសក់និងស្បែកក្បាល។ ទុកចោលសម្រាប់រយៈពេលប្រហែល ២០ នាទី សឹមកក់សម្អាតចេញជាមួយសាប៊ូដូចធម្មតា។
២. រូបមន្តធ្វើឱ្យធ្មេញសជាងមុន
ក្រៅពីប្រើប្រាស់តែសាច់ស្ត្របឺរីផ្ទាល់លាបលើធ្មេញ អ្នកក៏អាចលាយស្ត្រឹបឺរី ១ ផ្លែជាមួយម្សៅ Baking Soda រហូតក្លាយជាល្បាយខាប់ៗ សឹមលាបលើធ្មេញ។ ទុកចោលសម្រាប់រយៈពេល ១ នាទីសិនសឹមខ្ពុរសម្អាតមាត់។ ការប្រើប្រាស់ផ្លែស្ត្របឺរីដូចថ្នាំដុសធ្មេញជាប្រចាំក៏ជួយឱ្យធ្មេញសជាងមុនពីមួយពេលទៅមួយពេលផងដែរ។
៣. កម្ចាត់បញ្ហាហើមក្រោមភ្នែក
អ្វីដែលអ្នកត្រូវធ្វើ គឺគ្រាន់តែហាន់ស្ត្របឺរីស្រស់ៗជាចំណិតស្ដើងៗ រួចទុកក្នុងទូរទឹកកកឱ្យត្រជាក់បន្តិចសឹមដាក់ស្អំក្រោមភ្នែកនិងទុកចោលសម្រាប់រយៈពេល ១០ នាទី។ លាងសម្អាតចេញជាមួយទឹកធម្មតា។
៤. រូបមន្តសម្រាប់ខាត់ស្បែក
អ្វីដែលអ្នកត្រូវធ្វើ គឺគ្រាន់តែកិនស្ត្របឺរីទុំប្រហែលពី ១០ ទៅ ១២ ផ្លែឱ្យក្លាយជាល្បាយខាប់ៗ។ បន្ថែមស្ករស ១ ស្លាបព្រាកាហ្វេនិងប្រេងអូលីវ ១ ស្លាបព្រាកាហ្វេចូល។ បន្ទាប់មកកូរឱ្យសព្វ សឹមលាបម៉ាស្សាល្បាយលើស្បែកក្នុងចលនាបែបរង្វង់ថ្នមៗដើម្បីកម្ចាត់កោសិកាស្បែកងាប់ៗចេញ។
៥. រូបមន្តសម្រាប់ខាត់ជើងឱ្យទន់រលោង
លាយស្ត្របឹរីពី ៨ ទៅ ១០ ផ្លែជាមួយប្រេងអូលីវ ២ ស្លាបព្រាបាយនិងអំបិល ១ ស្លាបព្រាកាហ្វេឱ្យសព្វចូលគ្នាក្លាយជាល្បាយម៉ដ្ឋ។ លាបម៉ាស្សាល្បាយលើជើងថ្នមៗសម្រាប់រយៈពេលពី ២ ទៅ ៣ នាទី និងទុកចោលសម្រាប់រយៈពេលប៉ុន្មាននាទីសិន សឹមលាងសម្អាតចេញ ហើយប្រើប្រាស់ផលិតផលផ្ដល់សំណើមដល់ស្បែក។
៦. រូបមន្តសម្រាប់ព្យាបាលកម្ចាត់មុន
អ្វីដែលអ្នកត្រូវធ្វើ គឺគ្រាន់តែកិនស្ត្របឺរីប្រមាណ ៧ ផ្លែឱ្យក្លាយជាល្បាយខាប់ៗ រួចបន្ថែមគ្រីមជូរ ១ ស្លាបព្រាបាយចូល។ កូរឱ្យសព្វសឹមលាបលើមុខនិងទុកចោលសម្រាប់រយៈពេល ១០ នាទី ហើយលាងសម្អាតចេញជាមួយទឹកធម្មតា។ អនុវត្តឱ្យបាន ២ ដងក្នុងមួយសប្តាហ៍ដើម្បីទទួលបានលទ្ធផលកាន់តែប្រសើរ៕