រាល់ការលូតលាស់ថ្មីទាំងអស់ដែលកើតឡើងលើស្បែកអាចជាមូលហេតុមួយដែលគួរឲ្យព្រួយបារម្ភ ជាពិសេសបើសិនជាវាមានការប្រែប្រួលលឿនតែម្តង។ ដូច្នេះយកល្អគួរតែទៅជួបពេទ្យជំនាញខាងរោគសើស្បែកបើសិនជាអ្នករកឃើញថាមានការលូតលាស់អ្វីថ្មីៗលើស្បែកគ្រប់យ៉ាង។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)
វាមិនដូចគ្នានឹងប្រជ្រុយលើរាងកាយឡើយ សាច់ដែលដុះលយលើស្បែក ឬហៅថា Skin Tags មិនមែនជាមហារីកឡើយ។ ប៉ុន្តែវាអាចជាការយល់ច្រឡំថា ស្បែកដែលដុះនេះអាចជាដំបៅណាផ្សេងដែលអាចជាមហារីកវិញ។ ដូច្នេះមានតែពេទ្យជំនាញខាងរោគសើស្បែកទេទើបអាចកំណត់បានថា ករណីនេះជាអ្វីឲ្យប្រាកដ។
តើអ្វីទៅជាសាច់ដុះលយលើស្បែកឲ្យប្រាកដទៅ?
សាច់ដែលដុះលយលើស្បែកនេះគឺជាសាច់ដែឡមានលក្ខណស្តើ និងមានទងរបស់វាមើលទៅមានរាងមូល។ ការលូតលាស់នៃសាច់ទាំងនេះអាចកើតឡើងនៅកន្លែងជាច្រើននៃរាងកាយ តែភាគច្រើនឃើញញឹកញាប់នៅតំបន់ដែលមានការកកិតច្រើន។ ដោយសារតែសាច់ដែលដុះលយនេះអាចចាស់ទៅតាមអាយុដែរ ដូច្នេះវាអាចទៅជាមានពណ៌ក្រហម ឬត្នោតបាន។ សាច់ដុះលយនេះច្រើនតែត្រូវបានគេរកឃើញនៅតាមកន្លែងដូចជា៖
- ឃ្លៀក
- តំបន់សុដន់
- ត្របកភ្នែក
- គ្រលាន
- ក
តើសាច់ដែលដុះលយលើស្បែកគឺជាមហារីកដែរទេ?
មិនមែនទេ សាច់នេះគ្រាន់តែជាសាច់ស្លូតដែលផ្ទុកទោដោយកូឡាជែន និងសរសៃឈាមប៉ុណ្ណោះ។ សាច់នេះមិនត្រូវការការព្យាបាលអ្វីទាំងអស់។ ប៉ុន្តែវាច្រើនតែត្រូវបានគេច្រឡំថាជាមហារីកទៅវិញ។ សាច់ដុះលយលើស្បែកនេះជាទូទៅនៅតែមានទំហំតូចខណៈពេលដែលមហារីកវិញលូតលាស់ធំទៅៗ និងច្រើនតែមានដំបៅ និងហូរឈាម។
តើនរណាខ្លះអាចនឹងដុះសាច់លយលើស្បែកនេះ?
គ្រប់គ្នាគឺអាចកើតមានសាច់នេះទាំងអស់។ នៅសហរដ្ឋអាមេរិកមានប្រជាជនប្រហែល ៤៦ភាគរយមានបញ្ហាដុះសាច់លយលើស្បែកបែបនេះ ហើយវាច្រើនតែកើតជាញឹកញាប់លើមនុស្សដែលមានបម្រែបម្រួលអ័រម៉ូនដូចជា ស្រ្តីមានផ្ទៃពោះ ព្រមទាំងអ្នកដែលមានជំងឺ Metabolic។ ខណៈពេលដែលសាច់ដុះលយលើស្បែកអាចកើតលើមនុស្សគ្រប់វ័យ តែវាហាក់បីដូចជាឃើញញឹកញាប់លើមនុស្សពេញវ័យអាយុចាប់ពី ៦០ឆ្នាំឡើងទៅ។
តើអ្នកគួរតែត្រូវកាត់សាច់ដែលដុះលយនៅស្បែកនេះចេញដែរទេ?
សាច់ដុះលយលើស្បែកកម្រនឹងបង្កជាបញ្ហាដល់សុខភាពណាស់ ប៉ុន្តែវាប្រហែលជាអាចកាត់ចោលបានបើសិនជាអ្នកបារម្ភអំពីបញ្ហារូបរាងខាងក្រៅ ឬសម្រស់ផ្ទាល់ខ្លួន។ ការមិនផ្តល់ផាសុកភាព និងការរលាកតែងតែជាហេតុផលញឹកញាប់ដែលត្រូវការកាត់សាច់នេះចេញ។(អាន:ថ្នាំងងុយគេង ពេលអ្នកគួរប្រើ) ប៉ុន្តែសាច់ដែលដុះលយនេះកម្រនឹងធ្វើឲ្យឈឺចាប់ណាស់លុះត្រាតែវាមានការកកិតជាប់នឹងស្បែកដែលផ្នត់ៗលើរាងកាយ។ គ្រូពេទ្យក៏ប្រហែលជាអាចកាត់សាច់នេះបានដែរបើសិនជាគេសង្ស័យថាវាជាមហារីកស្បែក៕