ទឹកដោះគោស្រស់ជាភេសជ្ជៈល្អបំផុតមួយមិនមែនសម្រាប់តែសុខភាពឆ្អឹង សាច់ដុំ និងធ្មេញរឹងមាំប៉ុណ្ណោះទេ ប៉ុន្តែចំពោះសុខភាពរាងកាយទាំងមូល ព្រមទាំងអារម្មណ៍ផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទឹកដោះគោស្រស់មានផ្ទុកសម្បូរទៅដោយសារធាតុចិញ្ចឹមចាំបាច់និងជាតិរ៉ែដែលជាផ្នែកមួយដ៏សំខាន់នៃរបបអាហារសុខភាពល្អ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីអត្ថប្រយោជន៍នៃការទទួលទានទឹកដោះគោជាប្រចាំ ៖
១. កាត់បន្ថយស្ត្រេស ឬភាពតានតឹងក្នុងអារម្មណ៍
មួយកែវនៃទឹកដោះគោក្ដៅឧណ្ហៗអាចជួយសម្រួលសាច់ដុំនិងសសៃប្រសាទធ្វើឱ្យអារម្មណ៍ធូរស្រាលគួរឱ្យកត់សម្គាល់។ ការទទួលទានទឹកដោះគោមុនពេលចូលគេងក៏ជួយឱ្យឆាប់គេងលក់បានស្កប់ផងដែរ។ នេះក៏ព្រោះតែទឹកដោះគោផ្ដល់ឱ្យរាងកាយនូវអ័រម៉ូនមេឡាតូនីននិង tryptophan ដែលដើរតួនាទីយ៉ាងសំខាន់នៅពេលគេង។
២. គ្រប់គ្រងចំណង់អាហារ
ការទទួលទានទឹកដោះគោក្នុងកម្រិតមធ្យមអាចផ្ដល់អត្ថប្រយោជន៍ខ្ពស់ណាស់សម្រាប់អ្នកចង់ស្រកទម្ងន់។ នេះក៏ព្រោះតែទឹកដោះគោមានប្រសិទ្ធភាពគ្រប់គ្រងចំណង់អាហារជួយឱ្យឆាប់ឆ្អែតនិងឆ្អែតបានយូរ។
៣. ពង្រឹងសុខភាពបេះដូងនិងបញ្ចុះសម្ពាធឈាម
ទឹកដោះគោមានផ្ទុកជាតិប៉ូតាស្យូមដែលជួយពង្រឹងសាច់ដុំបេះដូងកន្ត្រាក់កាន់តែប្រសើរឡើង។ ជាតិរ៉ែនេះក៏ជួយគ្រប់គ្រងកម្រិតត្រឹមត្រូវនៃសម្ពាធឈាមផងដែរ។ ប្រសិនបើអ្នកព្រួយបារម្ភពីការកើនទម្ងន់ ឬកូឡេស្តេរ៉ូលមិនល្អនៅពេលទទួលទានទឹកដោះគោ ចូរជ្រើសរើសទឹកដោះគោគ្មានជាតិខ្លាញ់ ឬមានផ្ទុកជាតិខ្លាញ់ទាប។
៤. សុខភាពសក់
អាស៊ីតខ្លាញ់ល្អនិងអាស៊ីតអាមីណូក្នុងទឹកដោះគោជួយរក្សាសុខភាពសក់គួរឱ្យកត់សម្គាល់។ លើសពីនេះទៅទៀតទឹកដោះគោជាប្រភពដ៏ប្រសើរនៃជាតិកាល់ស្យូមដែលមិនត្រឹមតែចាំបាច់សម្រាប់សុខភាពឆ្អឹងនិងធ្មេញប៉ុណ្ណោះទេ ប៉ុន្តែក៏សំខាន់សម្រាប់ការលូតលាស់នៃសក់ ព្រមទាំងទប់ស្កាត់បញ្ហាជ្រុះសក់ផងដែរ។
៥. បំបាត់បញ្ហាច្រាលទឹកអាស៊ីតក្រពះ
ជាតិកាល់ស្យូមខ្ពស់ក្នុងទឹកដោះគោជួយទប់ស្កាត់ការប្រមូលផ្ដុំអាស៊ីតក្នុងក្រពះ។ ដូច្នេះកុំភ្លេចទទួលទានទឹកដោះគោស្រស់ត្រជាក់មួយកែវនៅពេលណាអ្នកមានអារម្មណ៍ថាក្រហាយៗក្នុងក្រពះ។ ទោះជាយ៉ាងណាត្រូវប្រាកដថាទឹកដោះគោស្រស់ដែលអ្នកទទួលទានគ្មានស្ករនិងសារធាតុបន្ថែមផ្សេងទៀត៕