យុវជនចិត្តខ្លាំម្នាក់អាយុ ២៥ ឆ្នាំបានដុតបំផ្លាញផ្ទះរបស់ឪពុកម្តាយខ្លួននៅស្រុកការ៉ាង តេនហ្គា (Karang Tengah) ក្រុងតានហ្គើរ៉ាង (Tangerang) ប្រទេសឥណ្ឌូនេស៊ី នៅម៉ោងប្រហែល ១១ យប់ថ្ងៃសុក្រសប្តាហ៍មុន បន្ទាប់ពីឪពុកម្តាយ មិនព្រមចេញលុយការប្រពន្ធឱ្យ។
គេហទំព័រ kompas.com បានដកស្រង់សម្តីអធិការប៉ូលិសស្រុកកាលពីថ្ងៃព្រហស្បតិ៍សប្តាហ៍នេះ ថាយុវជននេះបានយកប្រេងពីម៉ូតូរបស់ខ្លួនចាក់លើសម្លៀកបំពាក់ស្ងួត។ បន្ទាប់មករូបគេបាន គូសឈើគូសបោះលើសម្លៀកបំពាក់នោះ បណ្តាលឱ្យភ្លើងឆាបឆេះដល់ផ្ទះយ៉ាងសន្ធោសន្ធៅ។
ជនល្មើសឈ្មោះ ស៊ូពីយ៉ានតូ (Supiyanto) ខាងលើនេះបានរត់គេចខ្លួនពីកន្លែងកើតហេតុបាត់ បន្ទាប់ពីដុតភ្លើងរួច។
ទោះជាយ៉ាងណា យុវជននេះត្រូវសមត្ថកិច្ចចាប់ខ្លួនបានកាលពីថ្ងៃអង្គារសប្តាហ៍នេះ នៅផ្ទះមិត្តភក្តិ របស់គេនៅកេបាយ៉ូរ៉ាន ឡាម៉ា (Kebayoran Lama) ភាគខាងត្បូងក្រុងហ្សាកាតា។
ប៉ូលិសក៏និយាយដែរថា យុវជននេះគ្មានរោគផ្លូវចិត្តទេ ហើយមូលហេតុដែលរូបគេធ្វើបែបនេះ គឺដោយសារខឹងចិត្តដែលខ្លួនគ្មានលុយការប្រពន្ធ។ ទោះជាយ៉ាងណាក៏ដោយចុះយុវជននេះនៅតែ ត្រូវប្រឈមទោសព្រហ្មទណ្ឌដែលត្រូវជាប់ពន្ធនាគារ៕
ប្រភព៖ rasmeinews.com