Join with Health.com.kh on Telegram

វាគឺជារឿងធម្មតាទេដែលលិង្គមានធំក្លិន។ ប៉ុន្តែបើសិនជាអ្នកយល់ថាក្លិនរបស់វាមានការប្រែប្រួល ឬក្លិនកាន់តែស្អុយទៅៗ វាអាចជាសញ្ញាមួយនៃជំងឺរបស់វាហើយ។ ជំងឺភាគច្រើនគឺមិនធ្ងន់ធ្ងរទេ ហើយអាចព្យាបាលបានដោយស្រួល។ ឧទាហរណ៍ បុរសដែលមិនបានកាត់ចុងទេ ប្រហែលជាកកកុញស្បែកនៅក្រោមស្បែកគ្របក្បាលលិង្គ។(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) រឿងនេះច្រើនតែកើតឡើងជាញឹកញាប់លើបុរសដែលកង្វះអនាម័យ និងអាចនាំឲ្យមានការបង្ករោគបាន។ ជំងឺកាមរោគក៏អាចបង្កជាក្លិនស្អុយដល់លិង្គដែរ។ ខាងក្រោមនេះគឺជាមូលហេតុញឹកញាប់មួយចំនួនដែលនាំឲ្យមានក្លិនមិនល្អដល់លិង្គ៖

អាចម៌លិង្គ

អាចម៌លិង្គឬហៅថា Smegma សម្តៅទៅលើការកកកុញនូវជាតិសំណើម ប្រេង និងកោសិកាស្បែកនៅជុំវិញដងលិង្គ។ វាច្រើនតែកើតឡើងជាញឹកញាប់នៅក្រោមស្បែកគ្រប់ក្បាលលិង្គបើសិនជាបុរសនោះមិនបានកាត់ចុងទេ។ តំបន់នៅក្រោមស្បែកគ្របក្បាលលិង្គជាធម្មតាត្រូវការជាតិសំណើមពីល្បាយខាងលើនេះ។ នៅពេលដែលអាចម៌លិង្គកកកុញច្រើនពេក ដោយសារតែញើស ឬមិនបានលាងសម្អាតលិង្គទៀងទាត់ទេ វាអាចបង្កើតជាកំណកសៗដែលមានក្លិន ហើយអាចធ្វើឲ្យបាក់តេរីលូតលាស់បាន។ 

ការបង្ករោគនៅផ្លូវទឹកម៉ូត្រ

ការបង្ករោគនៅផ្លូវទឹកម៉ូត្រឬហៅថា UTI កើតឡើងនៅពេលដែលផ្នែកណាមួយនៃផ្លូវទឹកម៉ូត្ររងការបង្ករោគដោយបាក់តេរី ឬវីរុស។ ការបង្ករោគនេះច្រើនតែបណ្តាលមកពី៖

  • សកម្មភាពផ្លូវភេទ
  • មិនបាននោមចេញពីប្លោកនោមអស់ៗ (ទល់នោម) 
  • គ្រួសក្នុងតម្រងនោម
  • ក្រពេញប្រូស្តាតរីកធំ
  • ជំងឺទឹកនោមផ្អែម
  • ដាក់សុងទឹកនោម

បើសិនជាអ្នកមានជំងឺនេះមែន លិង្គអាចនឹងមានក្លិនដូចឆ្អាបត្រីអ៊ិចឹង។ អ្នកទំនងជាងាយនឹងមានការបង្ករោគនៅផ្លូវទឹកម៉ូត្របើសិនជាអ្នកមិនបានកាត់ស្បែកគ្របក្បាលលិង្គចេញទេ។ ថ្វីបើជំងឺនេះមិនធ្ងន់ធ្ងរមែន តែបើមិនព្យាបាលទេ វាអាចនាំឲ្យមានការបង្ករោគនៅតម្រងនោមបាន។

ការបង្ករោគផ្សិត

ការបង្ករោគដោយមេរោគផ្សិត កើតឡើងនៅពេលមេរោគផ្សិត Candida នៅលើលិង្គលូតលាស់ច្រើនជ្រុល។ មេរោគនេះនឹងធ្វើឲ្យមានក្លិនដូចផ្សិត។ អាការៈផ្សេងៗទៀតមានដូចជា៖

  • ឡើងក្រហម ឬរលាក
  • រមាស់ ឬក្រហាយ
  • មានកំណកសៗ
  • មានសំណើមខុសធម្មតា ពណ៌ស ឬស្បែកលិង្គទៅជារលោង។

ការបង្ករោគដោយមេរោគផ្សិតអាចកើតឡើងដោយសារតែលិង្គមិនបានលាងសម្អាតគ្រប់គ្រាន់ ជាពិសេសពេលលិង្គមិនទាន់កាត់ស្បែកគ្រប់ក្បាលចេញ។ វាក៏អាចរាលដាលតាមរយៈការរួមភេទជាមួយនឹងដៃគូរួមភេទជាមនុស្សស្រីដែលមានការបង្ករោគនេះ។ 

ការរលាកក្បាលលិង្គ

បើសិនជាស្បែកគ្របក្បាលលិង្គរងការរលាកដែរនោះ វាពិតជាងាយនាំឲ្យរលាកក្បាលលិង្គណាស់។ នេះអាចដោយសារតែ៖

  • ការរួមភេទមិនបានការពារ
  • កង្វះអនាម័យ
  • អាចម៌លិង្គកើនឡើង
  • សាប៊ូលាងខ្លួនមានក្លិនក្រអូប
  • ការបង្ករោគ
  • ជាតិទឹកកើនឡើងក្រោមស្បែកគ្របលិង្គ
  • មានអារម្មណ៍ក្រហាយៗនៅពេលនោម

ជំងឺប្រមេះទឹកបាយ

ជំងឺប្រមេះទឹកបាយគឺជាជំងឺកាមរោគមួយប្រភេទដែលឆ្លងតាមរយៈការប៉ះពាល់ទ្វារមាស រន្ធគូថ ឬមាត់របស់នរណាម្នាក់ដែលមានការបង្ករោគមួយនេះ។ វាអាចប៉ះពាល់ទៅលើលិង្គ ព្រមទាំងរន្ធគូថ និងបំពង់ក។ ជំងឺប្រមេះទឹកបាយមិនមែនតែងតែមានរោគសញ្ញាទេ។ បើសិនជាមានអាការៈវាមែន អ្នកប្រហែលជាអាចសម្គាល់ដឹងថាមានក្លិនឬអាការៈដូចខាងក្រោមនេះ៖

  • អារម្មណ៍ក្រហាយៗពេលនោម
  • ហូរទឹករំអិលពីក្បាលលិង្គពណ៌ខៀវ លឿង ឬស
  • ឈឺចាប់ ហូរឈាម ឬរមាស់នៅជុំវិញក្បាលលិង្គ ឬរន្ធគូថ
  • ឈឺចាប់ពេលបន្ទោបង់។

ប្រមេះទឹកថ្លា

ជំងឺប្រមេះទឹកថ្លាក៏ជាជំងឺកាមរោគមួយប្រភេទដែរ ដែលឆ្លងតាមរយៈការរួមភេទតាមទ្វារមាស មាត់ ឬរន្ធគូថជាមួយអ្នកដែលមានជំងឺនេះរួច។ (អាន:ថ្នាំងងុយគេង ពេលអ្នកគួរប្រើ)ជំងឺប្រមេះទឹកថ្លាមិនមែនតែងតែមានរោគសញ្ញារបស់វាទេ តែបើមានគឺមានលក្ខណៈដូចខាងក្រោមនេះ៖

  • អារម្មណ៍ក្រហាយៗពេលនោម
  • ហូរទឹករំអិលខុសធម្មតា
  • ឈឺពងស្វាស ឬហើមពងស្វាស៕