Join with Health.com.kh on Telegram

តើមាននារីប៉ុន្មាននាក់ទៅដែលមិនចង់ឱ្យសុដន់របស់ខ្លួននៅរឹងមាំ ហើយចង់ឱ្យវាយារធ្លាក់រយីករយាកនោះ? យើងអាចឆ្លើយបានភ្លាមថាគ្មានទេ បើទោះបីជាមានវ័យចំណាស់ប៉ុនណាក៏ដោយ។ មាននារីខ្លះមិនឱ្យកូនបៅដោះទេ សុខចិត្តឱ្យកូនបៅទឹកដោះគោ ដែលធ្វើឱ្យកូនប្រឈមនឹងការកើតជំងឺផ្សេងៗ ព្រោះតែចង់ថែរក្សាសុដន់របស់ខ្លួននេះ។

តាមពិតទៅសុដន់ ដែលជាសរីរាង្គមួយគ្មានសាច់ដុំទេ មានតែជាលិកាខ្លាញ់ សរសៃ និងក្រពេញបង្កើតទឹកដោះ ងាយនឹងទន់ជ្រាយណាស់ទៅតាមអាយុ។ ការនៅហាលថ្ងៃយូរ ការធ្លាក់ខ្លួនស្គម និងបញ្ហាអ័រម៉ូនមួយចំនួនក៏ធ្វើឱ្យសុដន់យារធ្លាក់ដែរ។

បើទោះជាយ៉ាងណាក្តី មានវិធី២យ៉ាងដែលនារីៗទាំងឡាយអាចអនុវត្តដើម្បីថែរក្សាភាពរឹងមាំនៃសុដន់របស់ខ្លួនបាន។

ទី១៖ អនុវត្តការហាត់ប្រាណមួយនេះ ដែលធ្វើឱ្យសាច់ដុំទ្រទ្រង់សុដន់ធ្វើការ

១- គេងសន្ធឹងនៅលើក្តារ

២- កាន់ដុំដែកទម្ងន់២គក្រនៅក្នុងដៃនីមួយៗ (អាចចាប់ផ្តើមជាមួយដុះដែក១គក្រសិនក៏បាន)

៣- លើកដៃទាំងពីរត្រង់ទៅលើ

៤- ដាក់ដៃចុះតិចៗទៅខាង រហូតដល់ក្តារ (មានរាងដូចកុប៉ាល់ហោះ)

៥- លើកដៃទាំងពីរត្រង់ទៅលើឡើងវិញ

៦- អនុវត្តបែបនេះឱ្យបាន១០ដង។

លំហាត់នេះធ្វើឱ្យសាច់ដុំដែលស្ថិតនៅក្រោមសុដន់និងនៅក្លៀកធ្វើការ ធ្វើឱ្យសុដន់រឹងមាំ។ត្រូវអនុវត្តការហាត់បែបនេះឱ្យបាន៣ដងក្នុង១ថ្ងៃៗ។ អ្នកនឹងពិនិត្យឃើញលទ្ធផលក្នុងពេល១ខែ។

ទី២៖ ប្រើប្រេងអូលីវធ្វើម៉ាស្សាសុដន់ដោយខ្លួនឯង

គេងផ្ងារនៅលើគ្រែដោយដាក់ខ្នើយកល់ខ្នងឱ្យពើងបន្តិច។ យកប្រេងអូលីវមកដាក់នៅបាតដៃទាំងពីរ ត្រដុសបាតដៃឱ្យឡើងក្តៅ រួចយកបាតដៃមកធ្វើម៉ាស្សាសុដន់តិចៗ ជារង្វង់ៗចំនួន១០ដង។ បើមានប្រេងច្រើនពេក យកក្រដាស់មកជូតចេញ តែកុំជូតឱ្យអស់៖ ត្រូវទុកប្រេងនៅលើសុដន់ ព្រោះវាជួយធ្វើឱ្យវារឹងមាំបាន។

បើសិនជាអ្នកបានធ្វើយ៉ាងនេះរាល់ថ្ងៃ ឬយ៉ាងតិចណាស់ឱ្យបាន៣ដងក្នុង១សប្តាហ៍ នោះអ្នកនឹងទទួលបានលទ្ធផលល្អជាមិនខានទេ។

អនាម័យផ្សេងទៀតដែលជួយឱ្យសុដន់នៅរឹងមាំ

មានកត្តាជាច្រើនដែលធ្វើឱ្យសុដន់ឆាប់យារធ្លាក់ទៅតាមវ័យ ដែលត្រូវជៀសវាង រួមមានការជក់បារី ការសេពសុរា ការនៅហាលថ្ងៃយូរពេក កង្វះជាតិទឹក ការឡើងធាត់ និងការប្រើអាវទ្រនាប់ដែលមិនសមស្រប។

បើតាមការសិក្សាមួយរបស់វេជ្ជបណ្ឌិតកីឡាបារាំងម្នាក់ ដែលបានតាមដាននារីៗចំនួន៣០០នាក់អស់ពេល១០ឆ្នាំ ការពាក់អាវទ្រនាប់ធ្វើឱ្យសុដន់ឆាប់ជ្រាយនិងយារធ្លាក់ទៅវិញទេ ព្រោះសាច់ដុំនៅពីក្រោមសុដន់ឥតបានធ្វើការ។ នារីៗណាដែលមិនពាក់អាវទ្រនាប់ មានសុដន់នៅរឹងមាំល្អជាង។

ប្រែសម្រួលដោយ ម៉ែន សេដ្ឋារតន៍