យោងទៅតាមសេចក្តីរាយការណ៍របស់សារព័ត៌មាន BBC News បានឲ្យដឹងថា ស្ត្រីអាយុចាប់ពី ៥០ឆ្នាំឡើងទៅគឺត្រូវបានដាក់បម្រាមអំពីភាពគ្រោះថ្នាក់នៃការមិនបានធ្វើតេស្ត Smear។ រឿងនេះបានមកពីការសិក្សារបស់អង់គ្លេសមួយដែលពិនិត្យទៅលើឥទ្ធិពលនៃការរកជំងឺមហារីកមាត់ស្បូនសម្រាប់ការអនុវត្តជាក់ស្តែង។
នៅប្រទេសអង់គ្លេស ស្ត្រីត្រូវបានគេអញ្ជើញឲ្យចូលរួមធ្វើការពិនិត្យរកជំងឺមហារីកមាត់ស្បូនជារៀងរាល់បីឆ្នាំម្តងនៅចន្លោះអាយុ ២៥ និង ៤៩ឆ្នាំ ព្រោះវាជាពេលវេលាដែលមហារីកមួយនេះអាចកើតឡើងខ្ពស់ និងជារៀងរាល់ ៥ឆ្នាំម្តងសម្រាប់ស្ត្រីអាយុចាប់ពី ៥០ ទៅ៦៥ឆ្នាំ។
ការស្រាវជ្រាវនេះបានតាមដានថាតើវាមានប្រយោជន៍ទេក្នុងការបន្តពិនិត្យរកជំងឺមហារីកមាត់ស្បូនទៀតក្រោយពីអាយុ ៥០ឆ្នាំ និងត្រូវឈប់ពិនិត្យទៀតឬអត់នៅពេលអាយុ ៦៤ឆ្នាំហើយ។ ចម្លើយដ៏ខ្លីសម្រាប់សំណួរទាំងពីរនេះគឺ Yes។
ស្ត្រីសរុប ១៣៤១នាក់អាយុពី ៦៥ទៅ៨៣ឆ្នាំត្រូវបានគេរកឃើញថាមានជំងឺមហារីកមាត់ស្បូនបែបរាលដាល ក្នុងរយៈពេល ៥ឆ្នាំក្នុងប្រទេសអង់គ្លេស និងហ្វេល។ ប្រវត្តិនៃការពិនិត្យរបស់ស្ត្រីទាំងនេះត្រូវបានគេប្រៀបធៀបជាមួយស្ត្រី ២៦៤៦នាក់ទៀតដែលមានអាយុដូចគ្នាតែគ្មានជំងឺមហារីក។ ស្ត្រីដែលមិនបានចូលរួមធ្វើតេស្តទៅតាមការណែនាំទំនងជាអាចងាយនឹងកើតជំងឺមហារីកមាត់ស្បូនរហូតដល់ ៦ដង នៅពេលពួកគេស្ថិតក្នុងអាយុដែលត្រូវធ្វើនៅពេលប្រៀបធៀបជាមួយស្ត្រីដែលបានធ្វើតេស្តរួច។
ការស្រាវជ្រាវក៏បានបញ្ជាក់ថា ការពិនិត្យនេះគឺស័ក្តិសមណាស់រហូតដល់អាយុ ៦៤ឆ្នាំ ប៉ុន្តែប្រយោជន៍វាអាចនឹងមានដែនកំណត់នៅពេលអាយុដល់ ៦៩ឆ្នាំ។ យ៉ាងណាមិញ ការពិនិត្យរកជំងឺមហារីកមាត់ស្បូនបែបនេះលើស្ត្រីវ័យចំណាយអាចនឹងផ្តល់អាយុពួកគេកាន់តែច្រើនថែមទៀតនៅថ្ងៃអនាគត់។ មានអំណះអំណាងមួយទៀតដែលថា អត្រានៃជំងឺមហារីកមាត់ស្បូនអាចមានចំនួនតិចតួចលើស្ត្រីអាយុចន្លោះ ៨០ ទៅ៨៤ឆ្នាំ៕
ប្រែសម្រួល៖ វេជ្ជ. ម៉េង សុខសៀន
ប្រភព៖ nhs.uk
