ជំងឺខ្លាញ់រុំថ្លើមត្រូវបានបែងចែកជាពីរប្រភេទ៖ ខ្លាញ់រុំថ្លើមដោយគ្រឿងស្រវឹង និងមិនមែនគ្រឿងស្រវឹង (NAFLD)។ ជំងឺខ្លាញ់រុំថ្លើមដោយគ្រឿងស្រវឹងបង្កឡើងដោយការញ៉ាំគ្រឿងស្រវឹងច្រើនៗ។ ជំងឺខ្លាញ់រុំថ្លើមមិនមែនគ្រឿងស្រវឹង (NAFLD) គឺមិនទាក់ទងនឹងគ្រឿងស្រវឹងឡើយ។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ថ្វីបើមូលហេតុនៃជំងឺ NAFLD មិនត្រូវបានដឹងនៅឡើយ តែវាកើតឡើងញឹកញាប់លើអ្នកដែល៖

  • ធាត់ជ្រុល
  • ជំងឺទឹកនោមផ្អែមប្រភេទទី២
  • លើសកូឡេស្តេរ៉ុល
  • លើសសម្ពាធឈាម។

សម្រាប់ករណីជំងឺខ្លាញ់រុំថ្លើមប្រភេទ NAFLD គឺមិនទាន់មានថ្នាំព្យាបាលនៅឡើយទេ។ ប៉ុន្តែរបបអាហារ និងការផ្លាស់ប្តូររបៀបរស់នៅជាវិធីសាស្រ្តដ៏មានប្រសិទ្ធភាពបំផុតសម្រាប់ព្យាបាលជំងឺនេះ ដែលមានដូចជា៖

សម្រកទម្ងន់

ក្បួនណែនាំរបស់ សមាគមន៍សម្រាប់ការសិក្សាទៅលើជំងឺថ្លើមអាមេរិក (AASLD) បានឲ្យដឹងថា អ្នកជំងឺរុំថ្លើមគួរតែសម្រកទម្ងន់ពី ៣ ទៅ ៥ភាគរយនៃទម្ងន់រាងកាយទាំងអស់ដើម្បីបន្ថយជាតិខ្លាញ់ដែលរុំក្នុងថ្លើម។ ការស្រកទម្ងន់បានពី ៧ ទៅ ១០ភាគរយនៃរាងកាយ អាចធ្វើឲ្យអាការៈជំងឺណេះស្រួលបួលមកវិញខ្លះដូចជា ការរលាក ការក្រិនរបស់ថ្លើម និងសម្លាកក្នុងថ្លើម។ វិធីសាស្រ្តដ៏ល្អបំផុតគឺសម្រកទម្ងន់បន្តិចម្តងៗ។ 

ញ៉ាំកាហ្វេ

យោងទៅតាមការស្រាវជ្រាវបានឲ្យដឹងថា កាហ្វេផ្តល់នូវអត្ថប្រយោជន៍ការពារថ្លើមមួយចំនួន ជាពិសេសវាភ្ញោចទៅលើការផលិតរបស់អង់ហ្ស៊ីមរបស់ថ្លើមដែលត្រូវបានគេដឹងថា ទៅប្រឆាំងការរលាក។ ការញ៉ាំកាហ្វេទៀងទាត់ក៏ជួយបន្ថយការខូចរបស់ថ្លើមបានដែរ។ យកល្អគួរតែញ៉ាំកាហ្វេពីរទៅបីពែងក្នុងមួយថ្ងៃដើម្បីបន្ថយការប្រឈមនឹងជំងឺថ្លើម។ កាហ្វេខ្មៅគឺជាជម្រើសដ៏ល្អបំផុត ជាពិសេសមិនថែមខ្លាញ់ ឬស្ករ។ 

រស់នៅឲ្យសកម្ម

យោងតាមការស្រាវជ្រាវបានឲ្យដឹងថា NAFLD ច្រើនតែទាក់ទងនឹងការរស់នៅបែបស៊ីដេកៗ។ ការរស់នៅអសកម្មត្រូវបានគេស្គាល់ថា ជាហេតុនាំឲ្យមានជំងឺផ្សេងៗទៀតដែលទាក់ទងនឹងជំងឺ NAFLD ដូចជា ជំងឺបេះដូង ជំងឺទឹកនោមផ្អែមប្រភេទទី២ និងធាត់ជ្រុល។ យកល្អគួរតែហាត់ប្រាណក្នុងកម្រិតមធ្យមយ៉ាងហោចណាស់ ១៥០នាទីក្នុងមួយសប្តាហ៍ ឬប្រហែល ៣០នាទីក្នុងមួយថ្ងៃ រយៈពេល ៥ថ្ងៃក្នុងមួយសប្តាហ៍។

ចៀសវាងអាហារដែលថែមជាតិផ្អែម

ជាតិផ្អែមក្នុងអាហារដូចជា Fructose និង Sucrose ត្រូវបានគេដឹងថាមានជាប់ទាក់ទងនឹងការកើតជំងឺខ្លាញ់រុំថ្លើម NAFLD។ អាហារដែលជំរុញឲ្យមានជំងឺខ្លាញ់រុំថ្លើម NAFLD មានដូចជា៖

  • នំដុតដូចជា នំខេក នំដូណាត់ជាដើម
  • ស្ករគ្រាប់
  • ការ៉េម
  • ភេសជ្ជៈកំប៉ុង
  • ភេសជ្ជៈកីឡា
  • ភេសជ្ជៈប៉ូវកម្លាំង
  • ផលិតផលធ្វើពីទឹកដោះគោមានជាតផ្អែមដូចជា យ៉ាអួរផ្អែមៗ។

ទប់ស្កាត់កូឡេស្តេរ៉ុលខ្ពស់

ជំងឺខ្លាញ់រុំថ្លើម NAFLD ធ្វើឲ្យរាងកាយកាន់តែពិបាកគ្រប់គ្រងកូឡេស្តេរ៉ុលខ្លួនឯង។ រឿងនេះអាចធ្វើឲ្យជំងឺនេះកាន់តែធ្ងន់ធ្ងរ និងបង្កើនការប្រឈមជំងឺបេះដូង។ ចូរបន្ថយការញ៉ាំអាហារណាមានកូឡេស្តេរ៉ុលខ្ពស់ និងព្យាបាល NAFLD។ ខ្លាញ់ដែលគួរចៀសវាងមានដូចជា Saturated Fat និង Trans Fat។ 

ចូរព្យាយាមប្រើថ្នាំបំប៉ន អូមេហ្គាបី

ខ្លាញ់ខ្លះក៏មានប្រយោជន៍ចំពោះសុខភាពយើងដែរ។ អាស៊ីតខ្លាញ់អូេមហ្គាបីគឺជាប្រភេទខ្លាញ់ Polyunsaturated Fats ដែលមានក្នុងអាហារដូចជា ត្រីសម្បូរខ្លាញ់ និងគ្រាប់ធញ្ញជាតិមួយចំនួន។ វាត្រូវបានគេដឹងថា មានប្រយោជន៍សម្រាប់សុខភាពបេះដូង និងត្រូវបានគេណែនាំឲ្យប្រើលើអ្នកជំងឺខ្លាញ់រុំថ្លើម NAFLD។ ខ្លាញ់ប្រភេទនេះគួរតែប្រើពី ៨៣០ ទៅ៩០០០មីលីក្រាមក្នុងមួយថ្ងៃ។ ប៉ុន្តែយកល្អគួរតែពិគ្រោះជាមួយគ្រូពេទ្យសិនថា ស្ថានភាពអ្នកគួរប្រើកម្រិតប៉ុណ្ណាទើបសមស្រប។ 

ចៀសវាងសារធាតុបង្ករលាកដល់ថ្លើម

សារធាតុទាំងនេះមានដូចជា គ្រឿងស្រវឹង ថ្នាំគ្មានវេជ្ជបញ្ជា និងថ្នាំវីតាមីនឬថ្នាំបំប៉នមួយចំនួន។ អាន:ថ្នាំងងុយគេង ពេលអ្នកគួរប្រើ)ខណៈពេលដែលការញ៉ាំគ្រឿងស្រវឹងកម្រិតមធ្យមអាចមានប្រយោជន៍ដល់អ្នកមានសុខភាពល្អស្រាប់ តែវានៅតែមិនច្បាស់ថាមានប្រយោជន៍ឬអត់ចំពោះអ្នកជំងឺ NAFLD៕