ការឈានទៅដល់ជីវិតមានគូ គឺជាការសម្រេចចិត្តបោះជំហានមួយដ៏សំខាន់។ ហើយការរើចូលទៅរស់នៅក្នុងផ្ទះតែមួយជាមួយគ្នា គឺជាដំណាក់កាលគួរឱ្យរំភើបបំផុតមួយចំពោះគូស្នេហ៍គ្រប់រូប។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ប៉ុន្តែថាតើអ្នកបានត្រៀមខ្លួនរួចរាល់ហើយឬនៅដើម្បីធានាបានថាការសម្រេចចិត្តរើទៅរស់នៅជាមួយគ្នានឹងមិនមានបញ្ហាអ្វីច្រើន? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីចំណុចដែលគូស្នេហ៍គ្រប់រូបគួរពិភាក្សាគ្នាមុនសម្រេចចិត្តរើទៅរស់នៅជាមួយគ្នា ​៖

១. ក្ដីរំពឹងសម្រាប់រយៈពេលវែង ​

មុនពេលដែលអ្នកសម្រេចចិត្តកសាងអនាគតជាមួយនរណាម្នាក់និងរើទៅរស់នៅជាមួយគ្នា អ្នកគួរសាងល្បងនិយាយគ្នាជាមួយដៃគូរបស់អ្នកពីបញ្ហាខ្លះៗទាក់ទងនឹងគម្រោងនាពេលអនាគតដើម្បីដឹងថាគេចូលចិត្តនិងចង់បានអ្វី ហើយក្តីស្រមៃរបស់គេដូចអ្នកដែរឫអត់? បើទោះបីអ្នកគិតថារឿងនោះជារឿងសាមញ្ញយ៉ាងណាក្តីដើម្បីជៀសវាបញ្ហានៅពេលក្រោយ ជាពិសេសគឺរឿងពាក់ព័ន្ធនឹងការរៀបការ ឫគម្រោងមានបុត្រតែម្តង។

២. រឿងលុយ

ការជជែកអំពីបញ្ហាហិរញ្ញវត្ថុ ឬប្រាក់កាស គឺជាបញ្ហាសំខាន់បំផុតមួយក្នុងចំណោមរឿងធំៗដ៏ទៃទៀតដែលអ្នកនិងដៃគូគួរតែពិភាក្សាគ្នាមុនធ្វើការសម្រេចចិត្តរួមរស់ជាមួយគ្នា។ ការពិភាក្សាអំពីបញ្ហានេះជាមុនអាចជួយឱ្យអ្នកនិងដៃគូចៀសផុតភាពខ្វែងគំនិតគ្នាដែលធ្វើឱ្យមានការមិនសប្បាយចិត្តទៅវិញទៅមកនាពេលក្រោយ។ ដើម្បីជាការប្រសើរអ្នកគួរចាប់ផ្តើមពិភាក្សាលើចំណុចថាតើនរណាជាអ្នកចំណាយ ហើយនរណាជាអ្នកសន្សំ? ហើយពិសេសនោះ គឺរឿងជួយចេញគ្នាលើថ្លៃចាយវាយប្រចាំថ្ងៃ សម្ភារៈប្រើប្រាស់ និងការបង់ថ្លៃចំណាយប្រចាំខែជាដើម។

៣. ទំនួលខុសត្រូវលើការងារក្នុងផ្ទះ ​

គ្មាននរណាម្នាក់កើតមកជាចុងភៅដៃឯក ឬចូលចិត្តបោសសម្អាតឡើយ! ប៉ុន្តែនៅពេលរស់នៅជាមួយគ្នារឿងការងារផ្ទះ គឺជៀសមិនផុតឡើយ។ ដូច្នេះដើម្បីចៀសវាងជម្លោះ ឬការអាក់អន់ចិត្តនឹងគ្នា អ្នកគួរចំណាយពេលពិភាក្សាគ្នាអំពីការបែងចែកទំនួលខុសត្រូវរបស់អ្នកទាំងពីរទៅលើការងារផ្សេងៗក្នុងផ្ទះ ឫអាចធ្វើតារាងបែងចែកការងារគ្នាថានរណាជាអ្នកជូតផ្ទះ ហើយនរណាជាអ្នកលាងចានជាដើម។

៤. ការចិញ្ចឹមសត្វ

ការជជែកគ្នាជាមួយដៃគូអំពីសត្វចិញ្ចឹមថ្មីដែលអ្នកចង់យកមកឱ្យរស់នៅក្នុងផ្ទះជាមួយដែរ គឺរឿងសំខាន់មួយគួរត្រូវបានពិភាក្សា។ ជាពិសេសអ្នកគួរតែដឹងជាមុនពីចំណង់ចំណូលចិត្តរបស់ដៃគូដើម្បីជៀសវាងភាពភ្ញាក់ផ្អើល ឫការមានអារម្មណ៍មិនស្រួល។ សាកស្រមៃមើលថាដៃគូរបស់អ្នក ឫខ្លួនអ្នកផ្ទាល់ជាអ្នកចូលចិត្តចិញ្ចឹមសត្វឆ្កែ ឫឆ្មាតាំងពីតូច ប៉ុន្តែអ្នកទាំងពីរមិនអាចបន្តធ្វើអ្វីដែលខ្លួនស្រលាញ់ទៀតក៏ព្រោះតែចង់ឱ្យដៃគូរបស់អ្នកសប្បាយចិត្តនោះវានឹងធ្វើឱ្យអ្នកខកចិត្តប៉ុណ្ណា។

៥. ការនាំភ្ញៀវចូលផ្ទះ

​ទោះបីជាការរួមរស់ជាមួយមនុស្សដែលអ្នកស្រលាញ់ពេលខ្លះតម្រូវឱ្យអ្នកត្រូវបើកចិត្តទូលាយបន្តិចដើម្បីទទួលស្វាគមន៍វត្តមានមិត្តភក្តិនិងភ្ញៀវផ្សេងទៀតដែលគេនាំមកលេងផ្ទះក៏ដោយ ប៉ុន្តែដើម្បីចៀសវាងជម្លោះ អ្នកគួរធ្វើយ៉ាងណាជជែកពិភាក្សាគ្នាជាមុនសិនថាតើមិត្តភក្តិ ឫភ្ញៀវណាខ្លះដែលអ្នកទាំងពីរអាចបើកចិត្តឱ្យមកលេងផ្ទះបានដោយមិនទើសទាល់។

៦. ការគេង

​ការគេងរួមគ្នាជាមួយដៃគូ គឺជារឿងដ៏ល្អនិងសប្បាយរីករាយបំផុតដែលអ្នកអាចធ្វើជាមួយដៃគូ។ ការគេងក្បែរដៃគូរនឹងធ្វើឱ្យអ្នកមានអារម្មណ៍ថាមានសុវត្តិភាព មានភាពកក់ក្តៅក្នុងចិត្ត និងកាន់តែមានភាពស្និទ្ធស្នាលផងដែរ​។ដូច្នេះហើយទើបអ្នកគួរពិភាក្សាអំពីទម្លាប់នៃការគេងរបស់គ្នារៀងខ្លួនដើម្បីអាចដឹងថាតើអាចទទួលយកទម្លាប់ក្នុងការគេងរបស់ដៃគូបាន ឬតម្រូវឱ្យផ្លាសប្ដូរដើម្បីគ្នាឬយ៉ាងណា។

៧. ទម្លាប់ចម្លែកៗ ឬទម្លាប់ដែលធ្វើឱ្យធុញទ្រាន់

មនុស្សម្នាក់ៗមានទម្លាប់រស់នៅផ្សេងៗពីគ្នា អ្នកខ្លះចូលចិត្តក្រោកពីគេងមកលេងជាមួយសត្វចិញ្ចឹម មួយចំនួនទៀតចូលចិត្តចោលសម្លៀកបំពាក់ ឬស្រោមជើងគ្មានសណ្ដាប់ធ្នាប់ជាដើម។ ទោះជាយ៉ាងណាសម្រេចចិត្តរស់នៅក្នុងផ្ទះតែមួយតម្រូវឱ្យអ្នកចេះសម្របនិងយល់ពីគ្នាទៅលើបញ្ហាទាំងនោះ។ ដូច្នេះការពិភាក្សាគា្នជាមុនអំពីបញ្ហាទម្លាប់ប្លែកៗរៀងខ្លួននេះ ហើយគួរផ្លាស់ប្ដូរចេញ ឬយ៉ាងណាគឺជាចំណុចសំខាន់មួយចៀសវាងជម្លោះពេលក្រោយ៕