រដូវមកម្តងយូរៗអាចដោយសារតែរឿងនេះ (ច្រើនជាង ៧ថ្ងៃ)

ជាធម្មតា ការមករដូវនឹងកើតឡើងម្តងក្នុងមួយខែហើយរយៈពេលនៃការមករដូវនេះដែរយូរបំផុតគឺមិនលើស ៧ថ្ងៃឡើយ (អាចត្រឹម ៥ ទៅ៣ថ្ងៃប៉ុណ្ណោះ)។ យ៉ាងណាមិញ ពេលខ្លះ រដូវមនុស្សស្រីអាចមានរយៈពេលយូរជាងធម្មតា ដែលវាអាចជាសញ្ញាបញ្ជាក់ថា មានអ្វីមួយខុសប្រក្រតីចំពោះរាងកាយ។ ជាមួយគ្នានេះដែរ បញ្ហាបែបនេះអាចបញ្ជាក់ថា មានអតុល្យភាពអ័រម៉ូន ឬប្រែប្រួលចំពោះស្បូន ដែលយើងមិនអាចមិនខ្វល់មិនខ្វាយបានឡើយ។(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ដូច្នេះត្រូវតែពិគ្រោះជាមួយអ្នកជំនាញខាងរោគស្រ្តីឲ្យបានលឿនបំផុតតាមតែអាចធ្វើបានដើម្បីទទួលបានការព្យាបាល។ ទោះបីជាយ៉ាងណាក៏ដោយ មានមូលហេតុមួយចំនួនដែលច្រើនតែកើតមានជាញឹកញាប់ និងធ្វើឲ្យស្រ្តីមករដូវយូរៗដូចជា៖ 

ការហូរឈាមខុសធម្មតា

រឿងនេះត្រូវបានគេស្គាល់ថា ជាការហូរឈាមក្នុងស្បូនមិនធម្មតា ដែលវាបណ្តាលមកពីអតុល្យភាពអ័រម៉ូនក្នុងរាងកាយ។ ករណីភាគច្រើន វាបញ្ជាក់អំពីការដែលមិនជ្រុះអូវ៉ុល ប៉ុន្តែបែរជាមានការហូរឈាមចេញពីស្បូនទៅវិញ។ រឿងនេះច្រើនតែឃើញជាញឹកញាប់លើស្រ្តីស្ថិតក្នុងវ័យបន្តពូជ (១៨ ទៅ៣៥ឆ្នាំ)។ 

មានជំងឺឈាម

រឿងនេះច្រើនតែឃើញមានជាញឹកញាប់លើក្មេងស្រីវ័យជំទង់ ដូច្នេះគួរតែឲ្យពេទ្យធ្វើតេស្តឈាមដើម្បីរកមើលបញ្ហានេះទៅ។ ករណីខ្លះ អាចនឹងត្រូវការថតអេកូពោះផ្នែកខាងក្រោមទៀត។ ដូច្នេះបើសិនជាអ្នកមករដូវយូរៗក្រោយពីមករដូវជាលើកដំបូងរួច យកល្អគួរតែដល់ពេលទៅជួបពេទ្យហើយ។ 

ជំងឺក្រពេញទីរ៉ូអ៊ីត

មែនហើយ កាលណាធ្លាក់ឈាមរដូវយូរៗអាចដោយសារតែកម្រិតអ័រម៉ូនទីរ៉ូអ៊ីតថយចុះ។ ដើម្បីកំណត់រោគវិនិច្ឆ័យនេះ គ្រូពេទ្យជំនាញរោគស្រ្តីអាចនឹងណែនាំឲ្យអ្នកធ្វើតេស្តឈាមបន្ថែម។ 

ជិតរ៉ាំងរដូវ

រឿងនេះច្រើនតែកើតមានលើស្រ្តីអាយុចាប់ពី ៤៧ ទៅ៥១ឆ្នាំ។ យ៉ាងណាមិញ វាមានឱកាសច្រើនណាស់ដែលអ្នកអាចមានបញ្ហាឆាប់រ៉ាំងរដូវបែបនេះ។ យ៉ាងណាមិញ បើសិនជាអ្នកមានអាការៈធ្លាក់ឈាមរដូវក្រោយពីរ៉ាំងរដូវរួចនោះ ត្រូវតែឲ្យពេទ្យពិនិត្យរកមើលជំងឺមហារីកហើយ។ 

ដុំសាច់ក្នុងស្បូន

មូលហេតុមួយផ្សេងទៀតនៃការធ្លាក់ឈាមរដូវយូរៗគឺជាការមានដុំសាច់ក្នុងស្បូនដែលវាជាសាច់ស្លូតស្ថិតក្នុងស្រទាប់សាច់ដុំរបស់ស្បូន ហើយក៏មិនមែណមហារីកដែរ។ ម៉្យាងវិញទៀត ដុំសាច់ក្នុងស្បូនប្រភេទ ប៉ូលីពអាចជាកោសិកាលូតលាស់ជ្រុលក្នុងភ្នាសខាងក្នុងរបស់ស្បូន តែក៏មិនមែនជាមហារីកដែរ។ 

មហារីក

ការធ្លាក់ឈាមរដូវយូរជាងមួយសប្តាហ៍ ជាពិសេសស្រ្តីអាយុចាប់ពី ៤៥ឆ្នាំឡើងទៅ អាចជាសញ្ញាមួយនៃជំងឺមហារីកមាត់ស្បូន។ ដូច្នេះ អ្នកជំនាញខាងរោគស្រ្តីអាចនឹងណែនាំឲ្យថតអេកូ និង Pap Smear ដើម្បីទាត់ចោលជំងឺមហារីកស្បូន និងមាត់ស្បូន។(អាន:ថ្នាំងងុយគេង ពេលអ្នកគួរប្រើ)

ដូច្នេះ បើសិនជាអ្នកមករដូវយូរជាងមួយសប្តាហ៍ យកល្អគួរតែពិគ្រោះជាមួយពេទ្យជំនាញខាងរោគស្រ្តីដើម្បីទាត់ចោលជំងឺមហារីក និងបញ្ហារោគស្រ្តីផ្សេងៗទៀត៕