នេះគឺជាអារម្មណ៍ដ៏ពិបាកមួយរបស់ស្រ្តីដែលរងគ្រោះដោយសារតែរឿងនេះ ហើយវាក៏គ្មាននរណាយល់ពីអារម្មណ៍នេះក្រៅពីអ្នកធ្លាប់ជួបបញ្ហានេះឡើយ។ យ៉ាងណាមិញ នៅពេលដែលស្រ្តីធ្លាក់ឈាមរដូវច្រើនជាងធម្មតា វាពិតជាគួរឲ្យភ័យខ្លាចខ្លាំងណាស់។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)
ជាធម្មតា ឈាមរដូវដែលធ្លាក់នោះជាមធ្យមមានតែ ៣០ ទៅ៤០មីលីលីត្រប៉ុណ្ណោះ ឬមិនអាចខ្ពស់ជាង ៨០មីលីលីត្រឡើយ។ ប៉ុន្តែបើសិនជាការធ្លាក់ឈាមរដូវច្រើនជាងនេះ មានន័យថា អាចមានមូលហេតុណាមួយនៅពីក្រោយហើយ។ តើមូលហេតុទាំងនោះមានអ្វីខ្លះទៅ?
ទើបតែផ្លាស់ប្តូររបៀបពន្យាកំណើតថ្មីៗ
ការប្រើថ្នាំគ្រាប់ពន្យាកំណើតច្រើនតែអាចគ្រប់គ្រងការមករដូវបាន។ តាមពិតទៅ ការប្រើថ្នាំនេះក៏អាចជួយកាត់បន្ថយលំហូរឈាមរដូវច្រើនៗបានដែរ។ ចំពោះការដាក់កងក្នុងស្បូន អាចជួយបន្ថយលំហូរឈាមរដូវ ប៉ុន្តែបើសិនជាវាធ្វើឲ្យហូរឈាមរដូវច្រើនៗ យូរជាងបីខែក្រោយដាក់រួចនោះ គួរតែទៅជួបពេទ្យជាបន្ទាន់។
ឈានចូលដំណាក់កាលត្រៀមរ៉ាំងរដូវ
ការត្រៀមរ៉ាំងរដូវប្រហែលជាចាប់ផ្តើមនៅអាយុជាង ៣០ឆ្នាំ។ ខណៈពេលដែលវាមិនអាចកំណត់ច្បាស់ថា រយៈពេលប៉ុណ្ណាឲ្យច្បាស់លាស់នោះ ប៉ុន្តែខែដែលអ្នកត្រូវរ៉ាំងរដូវនោះ វាប្រហែលជាអាចមានការប្រែប្រួលនៃឈាមរដូវរបស់អ្នកហើយ ដែលវាជាសញ្ញាដំបូងគេ។
កំពុងប្រើថ្នាំរំលាយកំណកឈាម
ថ្នាំរំលាយកំណកឈាមដូចជា អាស្ពីរីន អាចជួយឲ្យលំហូរឈាមហូរបានល្អ ប៉ុន្តែវាក៏ធ្វើឲ្យកើនឡើងលំហូរឈាមរដូវក្នុងពេលមករដូវដែរ។ ការពិគ្រោះជាមួយគ្រូពេទ្យចំពោះរឿងនេះមានប្រយោជន៍ណាស់ដើម្បីរកមើលមូលហេតុរបស់វា។
មានជំងឺឈាម
ជំងឺឈាមក៏អាចបណ្តាលឲ្យមានលំហូរឈាមរដូវច្រើនៗខុសធម្មតាដែរ។ ទោះបីជាយ៉ាងណាក៏ដោយ ជំងឺឈាមមានច្រើនប្រភេទណាស់ ជាពិសេសជំងឺឈាមក្រកកតែម្តង។
មានដុំសាច់ក្នុងស្បូន
ដុំសាច់ក្នុងស្បូនគឺជាស្តាប់មើលទៅដូចជាគួរឲ្យខ្លាចណាស់ តែវាកើតឡើងជាញឹកញាប់សម្រាប់ស្រ្តីទូទៅ។ រោគសញ្ញាសំខាន់របស់វាគឺ ហូរឈាមរដូវច្រើនៗ ហើយពេលខ្លះមានជាមួយនឹងកំណកឈាមមកជាមួយផង។ ករណីធ្ងន់ធ្ងរខ្លាំង ដុំសាច់ក្នុងស្បូនអាចធ្វើឲ្យស្រ្តីឈឺធ្ងន់ច្រើនដងក្នុងមួយឆ្នាំៗ។ ករណីបែបនេះត្រូវតែទៅជួបគ្រូពេទ្យដើម្បីព្យាបាល។
ចង្កោមរោគសញ្ញាគីសច្រើនគ្រាប់ក្នុងក្រពេញអូវ៉ែ
ស្រ្តីដែលមានជំងឺនេះច្រើនតែមានការធ្លាក់ឈាមរដូវច្រើនៗ ព្រោះថាក្នុងដំណាក់កាលជ្រុះអូវ៉ុល ស្បូនមានការរៀបចំភ្នាសខាងក្រៅរបស់វាក្រាសជាប់រហូត ដែលជាហេតុនាំឲ្យរដូវចេះតែបន្តមកច្រើន។
មានការបង្ករោគ
ការបង្ករោគនេះក៏រាប់បញ្ចូលទាំងជំងឺកាមរោគដូចជា ជំងឺប្រមេះទឹកថ្លា ប្រមេះទឹកបាយ ឬការបង្ករោគផ្សេងៗដែលប៉ះពាល់ដោយផ្ទាល់លើស្រទាប់ស្បូន និងបង្កជាការធ្លាក់ឈាមរដូវច្រើនៗ។(អាន:ថ្នាំងងុយគេង ពេលអ្នកគួរប្រើ) បើសិនជាអ្នកធ្លាប់រួមភេទដោយមិនបានការពារ ហើយកំពុងតែចាប់ផ្តើមមករដូវខុសធម្មតាទៀតនោះ វាគួរតែដល់ពេលដែលត្រូវទៅជួបពេទ្យភ្លាមហើយ៕