មនុស្សមួយក្រុមដែលពោរពេញ ដោយកំហឹងចងអាឃាត បានលើកគ្នា ទៅសម្លាប់ក្រពើជិត ៣០០ ក្បាលនៅ ប្រទេសឥណ្ឌូណេស៊ី បន្ទាប់ពីបុរសម្នាក់ នៅមូលដ្ឋានត្រូវបានក្រពើសម្លាប់នេះ បើយោងតាមអាជ្ញាធរបានបញ្ជាក់កាល ពីថ្ងៃចន្ទទី១៦ ខែកក្កដា។
ប៉ូលិសនិងមន្ត្រីអភិរក្ស និយាយថា ការសម្លាប់សងសឹកនេះបាន កើតឡើងកាលពីថ្ងៃសៅរ៍ ចុងសប្តាហ៍ កន្លងទៅនៅខេត្តប៉ាពួ (Papua) បន្ទាប់ពី ពិធីបុណ្យសពបុរសម្នាក់ដែលបានស្លាប់ ដោយសារធ្លាក់ចូលក្នុងកសិដ្ឋានចិញ្ចឹម ក្រពើពេលកំពុងដើររកច្រូតស្មៅ។
សមត្ថកិច្ចបានលើកឡើងទៀតថា ជនរងគ្រោះឈ្មោះ ស៊ូហ្គីតុ (Sugito) អាយុ ៤៨ ឆ្នាំ ត្រូវក្រពើ មួយក្បាលខាំ ទាញជើង ហើយវាត់នឹងកន្ទុយរហូត ដល់ជនរងគ្រោះស្លាប់។
សាច់ញាតិជនរងគ្រោះ និងអ្នក ស្រុកបានលើកគ្នាទៅកាន់ប៉ុស្តិ៍ប៉ូលិស ដើម្បីប្តឹងផ្តល់រកយុត្តិធម៌។ ដោយចង់បញ្ចប់រឿងនេះ ភាគីម្ចាស់កសិដ្ឋាន សុខចិត្តផ្តល់សំណង។ ប៉ុន្តែអ្នកស្រុក មិនអស់ចិត្ត ឡើយ ហើយបានកាន់កាំបិត ផ្គាក់ និងប៉ែលទៅសម្លាប់ក្រពើនៅ កសិដ្ឋាននោះអស់២៩២ ក្បាលទាំងតូច ទាំងធំ។សមត្ថកិច្ចក៏នៅឯកសិដ្ឋាននោះ ដែរ ប៉ុន្តែអន្តរាគមន៍មិនឈ្នះដោយសារ តែប្រជាជនមានចំនួនច្រើនពេក។
អាជ្ញាធរនិយាយថា ខ្លួនកំពុងតែ ស៊ើបអង្កេត ហើយអាចនឹងឈានដល់ការចោទប្រកាន់បទល្មើស ព្រហ្មទណ្ឌ ៕
ប្រភព៖ rasmeinews.com