ប្រឈមមុខនឹងបញ្ហាស្ត្រេស គឺមិនល្អសោះឡើយសម្រាប់មនុស្សគ្រប់រូប។ក្រៅពីប៉ះពាល់ដល់អារម្មណ៍ ស្ត្រេសរ៉ាំរ៉ៃក៏ជះឥទ្ធិពលគួរអោយព្រួយបារម្ភចំពោះសុខភាពរាងកាយទាំងមូលផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) វីធីដ៏ល្អបំផុតដើម្បីប្រយុទ្ធប្រឆាំងនឹងភាពតានតឹងក្នុងអារម្មណ៍ គឺសម្រាកអោយបានគ្រប់គ្រាន់ និងធ្វើលំហាត់ប្រាណជាប្រចាំ។ ទោះជាយ៉ាងណា ក៏នៅមានអារម្មណ៍មួយចំនួនដែលអាចកាត់បន្ថយបំបាត់ស្ត្រេសបានយ៉ាងប្រសើរ។ ថាតើអាហារអ្វីខ្លះទៅជួយបំបាត់ស្ត្រេសឆាប់រហ័ស? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឲ្យដឹងពីអាហារដែលអ្នកគួរទទួលទានទប់ទល់នឹងភាពតានតឹងក្នុងអារម្មណ៍ ៖
១. តែបៃតង
មានផ្ទុកសម្បូរទៅដោយសារធាតុប្រឆាំងអុកស៊ីតកម្មដែលប្រយុទ្ធប្រឆាំងជំងឺអារម្មណ៍។ វាមានឥទ្ធិពលលើផ្លូវចិត្ត និងរាងកាយ ដោយការទទួលទានតែបៃតងជាប្រចាំ គឺអាចផ្ដល់នូវសុខភាពល្អ និងកាត់បន្ថយហានិភ័យនៃភាពតានតឹងក្នុងអារម្មណ៍។ ប្រសិនបើអ្នកមិនចូលចិត្តតែបៃតង អ្នកអាចទទួលទានតែខ្មៅជំនួសវិញ ដោយវាមានឥទ្ធិពលល្អដូចគ្នា។ តែបៃតងជាជម្រើសនៃភេសជ្ជៈប្រសើរបំផុតសម្រាប់អ្នកជក់បារី និងទទួលទានគ្រឿងស្រវឹង។
២. តែរុក្ខជាតិ
មានតែរុក្ខជាតិច្រើនប្រភេទណាស់ដែលជួយកាត់បន្ថយកម្រិតនៃភាពតានតឹងក្នុងអារម្មណ៍ ហើយក៏អាចទប់ស្កាត់ផលប៉ះពាល់ផ្សេងៗដែលអាចកើតមានលើសុខភាពផ្លូវចិត្តនិងរាងកាយផងដែរ។ ឧទាហរណ៍តែខ្ញីនិងតែរមៀតជួយកាត់បន្ថយការរលាកដែលបង្កឡើងដោយសារស្ត្រេស។
៣. ទឹកក្រូចស្រស់
ក្រូចជាប្រភពដ៏ប្រសើរនៃសារធាតុប្រឆាំងអុកស៊ីតកម្មដែលមានប្រសិទ្ធិភាពជួយបំបាត់ស្ត្រេស។ បរិមាណនៃវីតាមីន C ក្នុងផ្លែក្រូចអាចជម្រុញប្រព័ន្ធភាពស៊ាំនៃរាងកាយទប់ស្កាត់ការទទួលរងឥទ្ធិពលពីភាពស្ត្រេសចំពោះរាងកាយ។ វីតាមីន C ក៏ប្រយុទ្ធប្រឆាំងរ៉ាឌីកាល់សេរីដែលបង្កគ្រោះថ្នាក់ ហើយត្រូវបានបញ្ចេញនៅពេលអ្នកតានតឹងក្នុងអារម្មណ៍។
៤. ទឹកដោះគោ
អ្នកដែលទទួលទានទឹកដោះគោទៀងទាត់ គឺមិនងាយនឹងប្រឈមមុខជាមួយបញ្ហាស្ត្រេសឡើយ។ ទឹកដោះគោត្រឹមតែ ១កែវមានផ្ទុកបរិមាណខ្ពស់នៃវីតាមីន ជាតិរ៉ែ ប្រូតេអ៊ីន កាល់ស្យូម និងសារធាតុប្រឆាំងអុកស៊ីតកម្ម។ ហើយសារធាតុទាំងអស់នេះមានប្រសិទ្ធិភាពកម្ចាត់រាល់រ៉ាឌីកាល់សេរីដែលបញ្ចេញដោយភាពតានតឹងក្នុងរាងកាយ។
៥. ទឹក
ចូរទទួលទានទឹកឱ្យបានច្រើនគ្រប់គ្រាន់ជាប្រចាំដើម្បីទប់ទល់ ក៏ដូចជាទប់ស្កាត់បញ្ហាតានតឹងក្នុងអារម្មណ៍! នោះក៏ព្រោះតែកង្វះជាតិទឹកក្នុងរាងកាយបង្កើនកម្រិតនៃអ័រម៉ូនស្ត្រេស cortisol៕