និយាយរឿងឆ្នេរសមុទ្រ ខ្មែរយើងច្រើនតែនឹកឃើញដល់ការលេងកម្សាន្តនៅខេត្តព្រះសីហនុ ឬតាមតំបន់កោះ។ វាមិនត្រឹមតែជាកន្លែងដែលស្ងប់ស្ងាត់ ស្រស់ស្អាត និងសប្បាយចិត្តទេ ថែមទាំងអាចជួយបន្ធូរអារម្មណ៍តានតឹង ផ្តល់ភាពរីករាយទាំងផ្លូវកាយ និងចិត្តដោយបានចូលរួមជាមួយនឹងធម្មជាតិនៅជុំវិញខ្លួន។ ដូច្នេះតើអ្នកមានធ្លាប់ឆ្ងល់ទេថា ហេតុអ្វីគ្រាន់តែលេងកម្សាន្តនៅតាមឆ្នេរសមុទ្រសោះ ធ្វើឲ្យមានអារម្មណ៍ធូរស្រាលបែបនេះទៅកើត? 

តាមការស្រាវជ្រាវរកឃើញថា ខ្យល់អ័ក្រចេញពីឆ្នេរសមុទ្រផ្ទុកទៅដោយសារធាតុ អ៊ីយ៉ុងអវិជ្ជមានជាច្រើន ដែលវាជាផ្នែកមួយដ៏ល្អក្នុងការជំរុញដល់មុខងារប្រព័ន្ធភាពស៊ាំមនុស្សយើង។ ក្រៅពីនេះ វាក៏ជួយបង្កើនការបឺតស្រូបអុកស៊ីសែនក្នុងសួត បំបាត់ស្រ្តេស និងអារម្មណ៍បាក់ទឹកចិត្តតាមរយៈការបង្កើនចំនួនសារធាតុ Serotonin ក្នុងខួរក្បាល។ អ៊ីយ៉ុងអវិជ្ជមានទាំងនេះក៏ដើរតួនាទីជាអង់ទីអុកស៊ីដង់ ដែលអាចកំចាត់ចោលនូវរ៉ាឌីកាលសេរីបានយ៉ាងល្អ។ ដូច្នេះ វានឹងធ្វើឲ្យអ្នកមានអាយុវែង និងរក្សាភាពក្មេងជាងវ័យថែមទៀត។ 

ជាតិម៉ាញ៉េស្យូមត្រូវបានគេរកឃើញថា ជួយបំបាត់អារម្មណ៍នៃភាពតក់ស្លុត និងឆេវឆាវ ព្រមទាំងជំរុញដល់ភាពស្ងប់ស្ងាត់ក្នុងអារម្មណ៍ថែមទៀត។ ការហែលទឹកនៅតាមឆ្នេរសមុទ្រមិនត្រឹមតែជួយបង្គ្រប់ជាតិម៉ាញ៉េស្យូមក្នុងខ្លួនទេ តែវាក៏ជួយរក្សាអ័រម៉ូន Melatonin (ជំរុញដល់ការគេង) និង Tryptamine ដែរ ដែលជាហេតុនាំឲ្យការហែលទឹកនេះក្លាយទៅជាវិធីបំបាត់ស្រ្តេស ធូរស្រាលក្នុងសាច់ដុំ និងជួយព្យាបាលជំងឺគេងមិនលក់ទៀត។ 

អ្វីដែលជាអត្ថប្រយោជន៍បន្ថែមនោះគឺថា ការដែលមានទម្លាប់ប៉ះពាល់នឹងទឹកសមុទ្រត្រជាក់ៗ នឹងជួយបង្កើនចំនួនអ័រម៉ូនភេទ តេស្តូស្តេរ៉ូន សម្រាប់មនុស្សប្រុស និង អេស្ត្រូជែនសម្រាប់មនុស្សស្រី។ ដូច្នេះចំណង់ផ្លូវភេទនឹងកើនឡើង លទ្ធភាពនៃការមានកូនក៏ល្អជាងមុន ហើយអ្នកក៏មានអារម្មណ៍កាន់តែល្អ និងស្រស់ស្រាយខ្លាំងផងដែរ៕