នៅពេលអ្នកកំពុងធ្វើលំហាត់ប្រាណឈាមមួយភាគធំត្រូវបានបង្វែរចូលទៅក្នុងបេះដូង សួត និងសាច់ដុំ។ នេះហើយជាមូលហេតុដែលសរីរាង្គមួយចំនួនដូចជាក្រពះនិងពោះវៀនមិនទទួលបានបរិមាណឈាមគ្រប់គ្រាន់ដើម្បីបំពេញមុខងាររំលាយអាហារក្នុងពេលដំណាលគ្នា។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ដូច្នេះការទទួលទានអ្វីមួយដែលតម្រូវប្រព័ន្ធរំលាយអាហារត្រូវធ្វើការខ្លាំងមុនពេលអ្នកធ្វើលំហាត់ប្រាណ គឺមិនល្អសោះឡើយ! ក៏ព្រោះអ្នកអាចជួយប្រទះបញ្ហាឈឺពោះធ្ងន់ធ្ងរបាន។ ថាតើអាហារប្រភេទណាខ្លះដែលអ្នកមិនគួរទទួលទានមុនពេលធ្វើលំហាត់ប្រាណ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារទាំងនោះ ៖
១. អាហារសម្បូរខ្លាញ់
មុនពេលហាត់ប្រាណអ្នកគួរចៀសឱ្យផុតពីអាហារចៀន បំពង ឬអាហារសម្បូរខ្លាញ់! នោះក៏ព្រោះតែអាហារប្រភេទនេះអាចផ្ដល់សម្ពាធ ឬបន្ទុកខ្លាំងដល់ក្រពះដែលនឹងបណ្ដាលឱ្យឈឺពោះ លើសជាតិហ្គាស និងរាគ។ ការទទួលទានអាហារសម្បូរខ្លាញ់ចៀនបំពងច្រើនក៏មិនល្អចំពោះសុខភាពបេះដូងនិងប្រព័ន្ធសសៃឈាមបេះដូងផងដែរ។
២. បន្លែប្រភេទ Cruciferous
ទោះបីជាបន្លែប្រភេទ Cruciferous ដូចជាផ្កាខាត់ណាខៀវ ផ្កាខាត់ណា ពន្លកផ្កាស្ពៃ និងស្ពៃក្ដោបជាដើមមានផ្ទុកសម្បូរទៅដោយជាតិសសៃ និងសមាសធាតុ sulfur ដែលជួយប្រយុទ្ធប្រឆាំងជំងឺមហារីកក៏ពិតមែន ប៉ុន្តែអ្នកមិនគួរទទួលទានបន្លែទាំងនេះនៅមុនពេលធ្វើលំហាត់ប្រាណឡើយ! ក៏ព្រោះវាអាចបង្កបញ្ហាឈឺចុកក្នុងពោះដែលជាលទ្ធផលនៃបញ្ហាពិបាករំលាយអាហារ និងការផលិតជាតិហ្គាសលើសកម្រិត។
៣. សណ្ដែកពពួក Legumes
សណ្ដែកពពួក legumes រួមមានសណ្ដែកដី សណ្ដែកខៀវ និងសណ្ដែកក្រហមជាដើមមិនគួរត្រូវបានទទួលទានភ្លាមមុនពេលហាត់ប្រាណឡើយ។ នោះក៏ព្រោះតែសណ្ដែកទាំងនេះមានផ្ទុកសម្បូរទៅដោយជាតិសសៃខ្ពស់ដែលអាចធ្វើឱ្យក្រពះពិបាកនឹងរំលាយ។
៤. ផលិតផលអាហារផ្សំឡើងពីទឹកដោះគោ
ក៏ដូចនឹងសណ្ដែកពពួក legumes ដែរផលិតផលអាហារផ្សំឡើងពីទឹកដោះគោដូចជាទឹកដោះគោ ឈីស និងយ៉ាអួរមិនគួរត្រូវបានទទួលទានមុនពេលធ្វើលំហាត់ប្រាណឡើយ! ជាពិសេសចំពោះអ្នកចាញ់ឡាក់តូស ការទទួលទានទឹកដោះគោ ឬអាហារផ្សំឡើងពីទឹកដោះគោមុនពេលហាត់ប្រាណអាចបណ្ដាលឱ្យឈឺចុករមួលក្នុងពោះខ្លាំង។
៥. អាហារហឹរ
អាហារហឹរមិនគួរត្រូវបានទទួលទានមុនពេលហាត់ប្រាណឡើយ! ពិសេសអ្នកកំពុងមានបញ្ហាច្រាលទឹកអាស៊ីតក្រពះ ឬអ្នកងាយនឹងជួបប្រទះបញ្ហានេះ។ នោះក៏ព្រោះតែអាហារហឹរអាចបង្កឱ្យអាស៊ីតក្រពះកើនឡើង ហើយអាចធ្វើឱ្យក្រហាយទ្រូងខ្លាំង៕