អាការៈវិលមុខអាចបណ្ដាលមកពីកត្តាជាច្រើនផ្សេងៗពីគ្នា គឺមិនមែនដោយសារតែជំងឺនោះឡើយជួនកាលទម្លាប់មួយចំនួនក៏បង្កបញ្ហានេះផងដែរ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថាតើមូលហេតុអ្វីខ្លះអាចបណ្ដាលឱ្យកើតមានអាការៈបែបនេះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុទូទៅបំផុតនៃអាការៈវិលមុខ ៖

១. កង្វះជាតិទឹកក្នុងរាងកាយ

ពេលខ្លះដំណោះស្រាយដ៏ល្អបំផុតនៃអាការៈវិលមុខ គឺទទួលទានទឹក ១ កែវ។ នោះក៏ព្រោះតែកង្វះជាតិទឹកក្នុងរាងកាយអាចកាត់បន្ថយបរិមាណឈាមដែលធ្វើឱ្យខួរក្បាលទទួលបានអុកស៊ីសែនតិចជាងធម្មតាបង្កអាការៈវិលមុខ។ ដើម្បីជាការប្រសើរចូរព្យាយាមទទួលទានទឹកឱ្យបានច្រើនគ្រប់គ្រាន់ពិសេសនៅពេលឈឺ។ ប្រសិនបើអ្នកឧស្សាហ៍វិលមុខទោះបីជាបានទទួលទានទឹក ២ លីត្រក្នុងមួយថ្ងៃហើយនោះចូរកុំស្ទាក់ស្ទើនឹងទៅជួបពិគ្រោះជាមួយគ្រូពេទ្យ។

២. ថប់បារម្ភ

មួយក្នុងចំណោមរោគសញ្ញាទូទៅបំផុតនៃបញ្ហាថប់បារម្ភ គឺវិលមុខ។ សាកល្បងដកដង្ហើមចេញចូលមួយៗជ្រៅៗនិងសម្រាកបន្តិច។ ប្រសិនបើអាការៈនៅតែមិនធូរស្បើយសោះនោះអ្នកគួរស្វែងរកជំនួយហើយ។

៣. ប្រតិកម្មអាឡែកស៊ី

អាឡែកស៊ីអាចបង្កការរលាកហើយជះឥទ្ធិពលដល់សម្ពាធឈាមដែលនឹងនាំឱ្យមានបញ្ហាវិលមុខ។ ចូរបញ្ឈប់ការទទួលទានអាហារមួយចំនួន ឬនៅឆ្ងាយពីសត្វ និងផ្កាដែលអ្នកប្រតិកម្មជាមួយ។

៤. ភាពចាស់នៃវ័យ

មនុស្សវ័យលើសពី ៥០ ឆ្នាំចាប់ផ្ដើមមានភាពប្រែប្រួលផ្នែកខាងក្នុងនៃត្រចៀក។ ភាពប្រែប្រួលនេះអាចបណ្ដាល​ឱ្យវិលមុខនៅពេលក្រោកឈរក្រោយពេលគេងខុសទីតាំង។ ដូច្នេះចូរព្យាយាមងើបឡើងយឺតៗ។ កុំស្ទាក់ស្ទើនឹងទៅជួបពិគ្រោះជាមួយគ្រូពេទ្យប្រសិនបើអាការៈនេះកើតមានទៀងទាត់។

៥. ជាតិស្ករក្នុងឈាមចុះទាប

ប្រសិនបើអ្នករំលងម៉ោងអាហារញឹកញាប់ ឬកំពុងកើតជំងឺទឹកនោមផ្អែមនោះជាតិស្ករក្នុងឈាមប្រហែលជាអាចថយចុះទាបខុសធម្មតាហើយ។ បន្ទាប់មករាងកាយនិងខួរក្បាលបាត់បង់នូវថាមពល ឬទទួលបានថាមពលមិនគ្រប់គ្រាន់ដែលបណ្ដាលឱ្យកើតមានអាការៈវិលមុខ។ ប្រសិនបើក្រោយទទួលទានអាហារគ្រប់គ្រាន់ហើយអាការៈវិលមុខនៅតែមិនបាត់ទៅវិញសោះ ចូរកុំស្ទាក់ស្ទើនឹងជួបពិគ្រោះជាមួយគ្រូពេទ្យ។

៦. ផលប៉ះពាល់នៃថ្នាំមួយចំនួន

ថ្នាំមួយចំនួនអាចបង្កឱ្យកើតមានអាការៈវិលមុខ ពិសេសប្រភេទថ្នាំដែលបញ្ចុះជាតិទឹកពីក្នុងរាងកាយ ឬថ្នាំបញ្ចុះទឹកនោម។ ចូរពិគ្រោះជាមួយគ្រូពេទ្យប្រសិនបើអ្នកជួបប្រទះអាការៈវិលមុខក្រោយប្រើប្រាស់ថ្នាំណាមួយ។

៧. សម្ពាធឈាមចុះទាប

ករណីភាគច្រើននៃអាការៈវិលមុខ គឺបណ្ដាលមកពីបញ្ហាសម្ពាធឈាមចុះទាប។ ដូច្នេះអ្នកមិនគួរប្រហែសចំពោះអាការៈនេះឡើយប្រសិនបើវាកើតឡើងញឹកញាប់។ ចូរធ្វើការពិនិត្យសម្ពាធឈាមឱ្យបានត្រឹមត្រូវ។

៨. គាំងបេះដូង និងដាច់សសៃឈាមខួរក្បាល

ប្រសិនបើអាការៈវិលមុខមានអមមកជាមួយនូវអាការៈឈឺទ្រូង ភាពខ្លីនៃដង្ហើម ចង្អោរចង់ក្អួត និងឈឺដៃនោះវាអាចជារោគសញ្ញានៃបញ្ហាដាច់សសៃឈាមក្នុងខួរក្បាល ឬគាំងបេះដូងហើយ។ ចូរប្រញាប់ទាក់ទងជាមួយគ្រូពេទ្យជំនាញភ្លាម៕