របបអាហារសុខភាពល្អចាំបាច់ដើម្បីរក្សាសុខភាពរាងកាយចៀសផុតបញ្ហាផ្សេងៗ! (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ធ្លាប់ដឹងទេថាការទទួលទានត្រីសម្បូរខ្លាញ់អាចផ្ដល់អត្ថប្រយោជន៍អស្ចារ្យជាច្រើនចំពោះសុខភាពទប់ស្កាត់ជំងឺ? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីផលល្អៗនៃការរួមបញ្ចូលត្រីសម្បូរខ្លាញ់ក្នុងរបបអាហារប្រចាំថ្ងៃ ៖
១. ល្អសម្រាប់ស្ត្រីមានផ្ទៃពោះ
នៅចុងត្រីមាសដំបូង ខួរក្បាលរបស់ទារកចាប់ផ្ដើមលូតលាស់អភិវឌ្ឍកាន់តែលឿនជាងផ្នែកដទៃទៀតនៃរាងកាយ។ ដូច្នេះការទទួលទានអាហារមានផ្ទុកសម្បូរទៅដោយអាស៊ីតខ្លាញ់អូមេហ្គា ៣ និង DHA គឺសំខាន់ណាស់ដើម្បីផ្ដល់សារធាតុចិញ្ចឹមចាំបាច់បន្ថែមជួយក្នុងដំណើរការនេះ។ ហើយត្រីសម្បូរខ្លាញ់ជាប្រភពដ៏ប្រសើរនៃជាតិខ្លាញ់អូមេហ្គា ៣ និងDHA។ ទោះជាយ៉ាងណាចំពោះត្រីសាលម៉ុន អ្នកមិនគួរទទួលទានច្រើនជាង ២ ដងក្នុងមួយសប្តាហ៍ឡើយ។
២. ទប់ស្កាត់និងបំបាត់អាការៈឈឺក្បាល
ត្រីសម្បូរខ្លាញ់ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ និងវីតាមីន B2
ដែលមានប្រសិទ្ធភាពព្យាបាលទប់ស្កាត់អាការៈឈឺក្បាលគ្រប់ប្រភេទដោយកាត់បន្ថយការរលាក។
៣. ពង្រឹងសុខភាពខួរក្បាល
នោះក៏ព្រោះតែត្រីសម្បូរខ្លាញ់ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ និង អូមេហ្គា ៦ ដែលចាំបាច់ណាស់សម្រាប់បង្កើនសុខភាពខួរក្បាល។ ជាតិខ្លាញ់អូមេហ្គា ៣ និង អូមេហ្គា ៦ ក៏ជួយបង្កើតកោសិកាខួរក្បាល រួមទាំងសសៃប្រសាទផងដែរ។ ការទទួលទានត្រីសម្បូរខ្លាញ់ថែមទាំងអាចជួយសម្រួលអារម្មណ៍និងអាចធ្វើអោយខួរក្បាលស្ងប់ទៀតផង។
៤. កាត់បន្ថយហានិភ័យនៃជំងឺមហារីកសុដន់
ត្រីប្រភេទនេះជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ ដែលជួយកាត់បន្ថយការរលាកក្នុងរាងកាយ។ ហើយអ្នកសិក្សាស្រាវជ្រាវជាច្រើនជឿថា ការរលាកក្នុងរាងកាយរ៉ាំរ៉ៃបង្កើនហានិភ័យនៃជំងឺមហារីកសុដន់។
៥. ទប់ទល់ជំងឺទឹកនោមផ្អែម
ត្រីសាលម៉ុន ត្រីធូណា និងត្រីសាឌីនជាដើមសុទ្ធតែជាប្រភេទនៃត្រីដែលមានផ្ទុកសម្បូរទៅដោយអាស៊ីតខ្លាញ់អូមេហ្គា ៣ ជួយកាត់បន្ថយភាពធន់នឹងអាំងស៊ុយលីនចំពោះអ្នកជំងឺទឹកនោមផ្អែម ក៏ដូចជាអ្នកកំពុងប្រឈមមុខនឹងហានិភ័យនៃជំងឺនេះ។ ដូច្នេះដើម្បីជាការប្រសើរ ចូរទទួលទានត្រីសម្បូរខ្លាញ់ឱ្យបាន ២ ដងក្នុងមួយសប្តាហ៍។
៦. ទប់ស្កាត់បញ្ហាស្បែកស្ងួត
ចូរបន្ថែមប្រភេទត្រីសម្បូរខ្លាញ់ក្នុងរបបអាហារប្រចាំថ្ងៃរបស់អ្នកអោយបានទៀងទាត់។ ត្រីសាលម៉ុន ត្រីសាឌីន និងត្រីធូណាជាដើម គឺសុទ្ធតែជាប្រភេទត្រីដែលមានផ្ទុកសម្បូរទៅដោយជាតិខ្លាញ់សុខភាពល្អជួយផ្ដល់សំណើមដល់ស្បែក និងប្រសើរសម្រាប់សុខភាពបេះដូង។
៧. ទប់ស្កាត់ជំងឺដាច់សសៃឈាមខួរក្បាល
ត្រីសម្បូរខ្លាញ់គ្រប់ប្រភេទសុទ្ធតែជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ ជួយទប់ស្កាត់ហានិភ័យនៃជំងឺដាច់សសៃឈាមខួរក្បាល ក៏ដូចជាបញ្ហាសុខភាពផ្សេងៗទៀត។ ដូច្នេះអ្នកគួរទទួលទានត្រីសម្បូរខ្លាញ់ឱ្យបានទៀងទាត់។
៨. លើកកម្ពស់អារម្មណ៍ល្អប្រសើរ
ត្រីសម្បូរខ្លាញ់ជាប្រភពដ៏ប្រសើរនៃប្រូតេអ៊ីននិងអាស៊ីតខ្លាញ់អូមេហ្គា ៣ ដែលល្អសម្រាប់សុខភាពរាងកាយ រួមទាំងអារម្មណ៍។ ត្រីសម្បូរខ្លាញ់ក៏អាចបង្កើនកម្រិតអ័រម៉ូនរីករាយ serotonin នៃខួរក្បាលដែលប្រយុទ្ធប្រឆាំងនឹងភាពស្ត្រេស៕