ជាធម្មតាបញ្ហាអង្គែស្បែកក្បាល គឺបង្កឡើងពីរោគផ្សិតម្យ៉ាងហៅថា Malassezia ដែលលូតលាស់លើស្បែកក្បាល។ អង្គែស្បែកក្បាលមាន ២ ប្រភេទ គឺមួយកើតឡើងដោយសារការផលិតជាតិប្រេងច្រើនលើសនិងភាពស្ងួតពេកនៃស្បែកក្បាល។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ទោះជាយ៉ាងណាបញ្ហាអង្គែក៏បណ្ដាលមកពីការមិនកក់សក់ទៀងទាត់ ការប្រើប្រាស់សាប៊ូខុស និងការទទួលទានចំណីអាហារផងដែរ។ ប៉ុន្តែកុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីវិធីដ៏ងាយបំផុតកម្ចាត់អង្គែចេញពីស្បែកក្បាល ដោយចំណាយអស់តិចតែមានប្រសិទ្ធិភាពខ្ពស់ ៖
១. ប្រទាលកន្ទុយក្រពើ
មុនពេលងូតទឹក ចូរលាបទឹកប្រទាលកន្ទុយក្រពើលើសក់និងស្បែកក្បាល។ លាងសម្អាតចេញជាមួយទឹកធម្មតាជាការស្រេច។ អនុវត្តឱ្យបានយ៉ាងហោចណាស់ ២ ដងក្នុងមួយថ្ងៃ។
២. ប្រេងដូង និងទឹកក្រូចឆ្មារ
អ្វីដែលអ្នកត្រូវធ្វើ គឺគ្រាន់តែលាយប្រេងដូងចំនួន ២ ស្លាបព្រាបាយ ជាមួយទឹកក្រូចឆ្មារស្រស់ ១ ស្លាបព្រាកាហ្វេ។ កូរឲ្យសព្វ សឹមលាបម៉ាស្សាលើសក់និងស្បែកក្បាលសម្រាប់រយៈពេលពី ២ ទៅ ៣ នាទី រួចទុកចោលសម្រាប់រយៈពេលពី ២០ ទៅ ៣០ នាទី ហើយកក់សម្អាតសក់ចេញជាមួយសាប៊ូជាការស្រេច។ អនុវត្តឱ្យបានពី ២ ទៅ ៣ ដងក្នុងមួយសប្តាហ៍។
៣. ទឹកក្រូចឆ្មារស្រស់
លាបម៉ាស្សាទឹកក្រូចឆ្មារលើស្បែកក្បាល និងទុកចោលសម្រាប់រយៈពេល ១ នាទី។ បន្ទាប់មកលាយទឹកក្រូចឆ្មារស្រស់ ១ ស្លាបព្រាកាហ្វេជាមួយទឹកធម្មតា ១ ពែង។ កូរឱ្យសព្វ សឹមលាងសម្អាតសក់ជាមួយទឹកល្បាយ។ ដើម្បីទទួលបានលទ្ធផលកាន់តែប្រសើរ ចូរអនុវត្តរូបមន្តនេះមុនពេលងូតទឹកជាប្រចាំ។
៤. តែបៃតង
អ្វីដែលអ្នកត្រូវធ្វើ គឺគ្រាន់តែលាបម៉ាស្សាតែបៃតងលើស្បែកក្បាលសម្រាប់រយៈពេល ៥ នាទី សឹមលាងសម្អាតចេញជាមួយសាប៊ូនិងប្រើក្រែមបន្ទន់ដូចពេលធម្មតា។
៥. ម្ស៉ៅ baking soda
អ្វីដែលអ្នកត្រូវធ្វើ គឺផ្សើមសក់ជាមុនសិន រួចរោយម្ស៉ៅ Baking soda លើសក់ ហើយម៉ាស្សាឱ្យដល់ស្បែកក្បាល។ ទុកចោលសម្រាប់រយៈពេល ១ នាទី សឹមលាងសម្អាតចេញ។ អ្នកក៏អាចកក់សក់ចេញដូចពេលធម្មតាផងដែរដើម្បីលាងជម្រះបានស្អាតសព្វ៕