ការទទួលទានថ្នាំបំបាត់ការឈឺចាប់រាល់ពេលឈឺក្បាលមិនមែនជាជម្រើសដ៏ប្រសើរចំពោះសុខភាពឡើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ក្រៅពីជះឥទ្ធិពលអវិជ្ជមានផ្សេងៗហើយនោះ ថ្នាំបំបាត់ការឈឺចាប់ក៏បង្កើនហានិភ័យនៃបញ្ហាសុខភាពគួរអោយព្រួយបារម្ភជាច្រើនផងដែរ។ ប៉ុន្តែថាតើយើងអាចបំបាត់អាការៈឈឺក្បាលបានដោយរបៀបណាទៅ? កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងវិធីព្យាបាលជំងឺឈឺក្បាលឆាប់រហ័សតាមបែបធម្មជាតិដោយគ្រាន់តែទទួលទានអាហារមួយចំនួនដូចខាងក្រោម ៖
១. យ៉ាអួរ
ភាគច្រើននៃពួកយើងប្រហែលជាមិនដឹងទេថាក្រៅពីល្អសម្រាប់សុខភាពប្រព័ន្ធរំលាយអាហារ ការទទួលទានយ៉ាអួរក៏ជួយបំបាត់អាការៈឈឺក្បាលបានយ៉ាងឆាប់រហ័សផងដែរ។ នោះក៏ព្រោះតែក្នុងករណីខ្លះការឈឺក្បាលបណ្ដាលមកពីកង្វះជាតិកាល់ស្យូមក្នុងរាងកាយ ហើយយ៉ាអួរជាប្រភពដ៏ល្អបំផុតមួយនៃជាតិរ៉ែនេះ។ ទោះជាយ៉ាងណាត្រូវប្រាកដថាអ្នកបានជ្រើសរើសទទួលទានយ៉ាអួរសុទ្ធគ្មានជាតិស្ករ ឬគ្រឿងផ្សំបន្ថែមរសជាតិ។
២. ផ្លែចេក
ក្នុងករណីខ្លះអាការៈឈឺក្បាលអាចបណ្ដាលមកពីកង្វះនៃជាតិម៉ាញ៉េស្យូមក្នុងរាងកាយ។ ហើយចេក គឺជាជម្រើសនៃផ្លែឈើដ៏ប្រសើរដែលមានផ្ទុកសម្បូរទៅដោយជាតិម៉ាញ៉េស្យូមជួយបំបាត់អាការៈឈឺក្បាលបានយ៉ាងឆាប់រហ័ស។
៣. គ្រាប់ស្វាយចន្ទី
គ្រាប់ស្វាយចន្ទីក៏មានផ្ទុកសម្បូរទៅដោយជាតិម៉ាញ៉េស្យូមផងដែរ។ ដូច្នេះលើកក្រោយនៅរាល់ពេលដែលអ្នកឈឺក្បាល ចូរសាកល្បងទទួលទានគ្រាប់ស្វាយចន្ទីមួយក្ដាប់ដៃពេញ។
៤. សូកូឡាខ្មៅ
ក៏ព្រោះតែសូកូឡាខ្មៅជាប្រភពដ៏ល្អបំផុតនៃជាតិម៉ាញ៉េស្យូមនោះអ្នកអាចទទួលទានវាមួយដុំនៅពេលឈឺក្បាល ជាពិសេសប្រសិនបើការឈឺក្បាលបណ្ដាលមកពីភាពតានតឹងក្នុងអារម្មណ៍ ឬស្ត្រេស។
៥. ផ្លែបឺរ
ជាតិខ្លាញ់សុខភាពល្អក្នុងផ្លែបឺរជួយរក្សាតុល្យភាពនៃអ័រម៉ូនទប់ស្កាត់ការរលាកដែលបង្កអោយឈឺក្បាល។ ដូច្នេះការបន្ថែមផ្លែបឺរក្នុងរបបអាហារប្រចាំថ្ងៃ គឺប្រសើរណាស់ ជាពិសេសចំពោះស្ត្រីដែលកំពុងជួបប្រទះអាការៈឈឺក្បាលដោយសារការមករដូវ។
៦. ត្រីសម្បូរខ្លាញ់
ជាប្រភពដ៏ប្រសើរនៃអាស៊ីតខ្លាញ់អូមេហ្គា ៣ និងវីតាមីន B2 ដែលមានប្រសិទ្ធភាពព្យាបាលទប់ស្កាត់អាការៈឈឺក្បាលគ្រប់ប្រភេទដោយកាត់បន្ថយការរលាក៕