ការប៉ងសម្លាប់ខ្លួន ឬធ្វើអត្តឃាដខ្លួនឯងមិនមែនជាជំងឺផ្លូវចិត្តទេ តែវាគឺជាផលវិបាកធ្ងន់ធ្ងរនៃជំងឺផ្លូវចិត្តដែលវាមិនត្រូវបានព្យាបាល។ ភាគច្រើនការប៉ងសម្លាប់ខ្លួនគឺជាប់ទាក់ទងនឹងការបាក់ទឹកចិត្ត។ ប៉ុន្តែអ្នកជំនាញនិយាយថា វាគឺជារឿងមួយដែលអាចជាការប៉ងរបស់នរណាម្នាក់ដែលមានជំងឺម្តងសប្បាយចិត្តម្តងពិបាកចិត្ត (Bipolar Disorder) ការប៉ះទង្គិចផ្លូវចិត្តខ្លាំងក្រោយជួបបញ្ហាអ្វីមួយធ្ងន់ធ្ងរ (Post Traumatic Stress Disorder, PTSD) និងការប្រើប្រាស់ថ្នាំញៀន។
ខាងក្រោមនេះគឺជាសញ្ញាមួយចំនួនដែលអាចបញ្ជាក់បានថា មនុស្សម្នាក់នោះប្រហែលជាមានបំណងចង់សម្លាប់ខ្លួន៖
មានការប្រែប្រួលផ្លូវចិត្ត ឬអារម្មណ៍ពិបាកចិត្តខ្លាំងពេក
រឿងនេះអាចកើតឡើងថា មនុស្សម្នាក់នោះធ្លាប់មានការប្រែប្រួលផ្លូវចិត្ត ឬបាក់ទឹកចិត្តរយៈពេលច្រើនថ្ងៃ ច្រើនសប្តាហ៍ ឬច្រើនខែរួចមកហើយ។
ស្ងប់អារម្មណ៍ភ្លាមៗ
តើមនុស្សម្នាក់ហាក់បីដូចជាកែប្រែអារម្មណ៍ខ្លួនឯងពីអារម្មណ៍ប្រែប្រួល ឬបាក់ទឹកចិត្តទៅជាស្ងប់អារម្មណ៍ភ្លាមៗដែរទេ? អ្នកជំនាញនិយាយថា វាអាចជាសញ្ញាមួយដែលបញ្ជាក់ថា នាង ឬគាត់ត្រូវបានកំណត់បានថា មានបំណងចង់ធ្វើអត្តឃាដខ្លួនឯងហើយ។
ដកខ្លួនចេញ
សញ្ញាមួយក្នុងចំណោមសញ្ញាជាច្រើននៃជំងឺបាក់ទឹកចិត្តគឺការដកខ្លួន។ មនុស្សម្នាក់ប្រហែលជាត្រៀមខ្លួនដើម្បីនៅឲ្យឆ្ងាយពីគ្រួសារ និងមិត្តភក្តិរបស់គេ ហើយក៏មិនចាប់អារម្មណ៍រឿងគ្រប់យ៉ាងដែលគេធ្លាប់តែចូលចិត្តទៀតដែរ។
គេងមិនលក់
សញ្ញាញឹកញាប់បំផុតមួយផ្សេងទៀតនៃការបាក់ទឹកចិត្តគឺមិនអាចគេងនៅពេលយប់លក់ឡើយ ហើយវាក៏ជារឿងមួយដែលបញ្ជាក់ថា អាចជាភាពធ្ងន់ធ្ងរមួយនៃអារម្មណ៍ផ្លូវចិត្តរបស់បុគ្គលនេះហើយ។
គេងច្រើនពេក
ក្រៅពីមិនអាចគេងបានគ្រប់គ្រាន់ អ្នកជំងឺផ្លូវចិត្តមួយចំនួនដែលប្រឈមខ្ពស់នឹងការប៉ងសម្លាប់ខ្លួនដែរនោះប្រហែលជាចំណាយពេលវេលាច្រើនក្នុងការគេងផងដែរ។
អស់សង្ឃឹម
បើសិនជាមនុស្សម្នាក់តែងតែប្រាប់អ្នកថា វាហាក់បីដូចជា មិនមានអ្វីរីកចម្រើននៅថ្ងៃអនាគត់ផងនោះ វាអាចជាសញ្ញាបញ្ជាក់ថា គាត់ ឬនាងកំពុងតែពិចារណាលើការសម្លាប់ខ្លួនហើយ។
ផ្លាស់ប្តូររូបរាងខាងក្រៅ
ចាប់តាំងពីអ្នកជំងឺម្នាក់លែងចាប់អារម្មណ៍រឿងអនាគត់ទៀតមក គាត់ប្រហែលជាឈប់យកចិត្តទុកដាក់ទៅលើរូបរាងខាងក្រៅរបស់គាត់ទៀតដែរ ហើយខ្លះទៀតធ្វើឲ្យយើងពិតជាសម្គាល់ដឹងអំពីការប្រែប្រួលរាងកាយជាច្រើនផងដែរ។
អាកប្បកិរិយាគ្រោះថ្នាក់
ចូរប្រុងប្រយ័ត្នផងបើសិនជាមនុស្សម្នាក់នៅសុខៗស្រាប់តែធ្វើសកម្មភាពជាច្រើនភ្លាមៗដែលអាចបង្កគ្រោះថ្នាក់ដល់ខ្លួនគេ ព្រមទាំងអ្នកដទៃនៅជុំវិញខ្លួនដូចជា ការបើកបរដែលគ្មានការប្រុងប្រយ័ត្ន ឬរួមភេទដោយមិនបានការពារជាដើម។
និយាយអំពីការដាក់បន្ទុកអ្វីមួយ
គ្រប់ពេលដែលនរណាម្នាក់ដែលមានការប្រឈមខ្ពស់នឹងការធ្វើអត្តឃាដខ្លួនឯង ប្រហែលជាជឿថា គាត់គ្រាន់តែជាមនុស្សមានបន្ទុកមួយក្នុងគ្រួសារ និងមិត្តភក្តិតែប៉ុណ្ណោះ។
ប្រើប្រាស់គ្រឿងញៀន
មនុស្សជាច្រើនដែលមានជំងឺផ្លូវចិត្តចូលចិត្តប្រើថ្នាំ ឬគ្រឿងស្រវឹងច្រើនៗដើម្បីបំបាត់អារម្មណ៍ផ្លូវចិត្តពួកគេ ហើយវាក៏ត្រូវបានគេដឹងថា ជាកត្តាប្រឈមមុខមួយនៃការប៉ងសម្លាប់ខ្លួនដែរ។
កំពុងតែស្វែងរកមធ្យោបាយដើម្បីប៉ងសម្លាប់ខ្លួន
តើមនុស្សម្នាក់ដែលកំពុងតែសួរសំណួរប្លែកៗដូចជា អ្វីទៅដែលអាចធ្វើឲ្យស្លាប់ដោយមិនមានការឈឺចាប់ ឬថ្នាំអីដែលលេបហើយអាចស្លាប់ក្នុងពេលកំពុងតែគេ ដែរទេ? នេះហើយអាចជាសញ្ញានៃការព្រមានចង់សម្លាប់ខ្លួនដែលអ្នកត្រូវប្រុងប្រយ័ត្ន។
កំពុងតែត្រៀមខ្លួន
មនុស្សម្នាក់ដែលកំពុងតែមានជំងឺផ្លូវចិត្តប្រហែលជាកំពុងតែពិចារណាលើការសម្លាប់ខ្លួនហើយបើសិនជាគេកំពុងតែត្រៀមខ្លួនដូចជា ទិញអាវុធ ឬថ្នាំពុល។
និយាយប្រាប់អំពីការប៉ងសម្លាប់ខ្លួន
នៅពេលមនុស្សម្នាក់និយាយថា គាត់កំពុងតែគិតអំពីការសម្លាប់ខ្លួន អ្នកគួរតែគិតថា វាគឺជារឿងដែលធ្ងន់ធ្ងរបំផុតហើយ។ ប៉ុន្តែចូរកត់សម្គាល់ថា មិនមែនមនុស្សទាំងអស់ដែលនិយាយប្រាប់អ្នកអំពីរឿងនេះសុទ្ធតែនឹងប៉ងធ្វើវាឲ្យបានឡើយ។
តើអ្នកអាចធ្វើអ្វីបានទៅបើសិនជាដឹងអំពីរឿងនេះ?
- ចូរកុំមានអារម្មណ៍ភ័យខ្លាចក្នុងការសួរគាត់ថាតើគាត់កំពុងតែគិតអ្វីអំពីការប៉ងសម្លាប់ខ្លួនឬអត់
- មិនត្រូវទុកឲ្យគេនៅតែឯងឡើយ។ ចូរសុំជំនួយពីសមាជិកគ្រួសារ និងមិត្តភក្តិរបស់គាត់។
- ចូរយកអាវុធ ថ្នាំ និងរបស់ផ្សេងៗដែលអាចបង្កគ្រោះថ្នាក់ដល់ស្លាប់ចេញឲ្យឆ្ងាយ ព្រោះវាអាចប្រើដើម្បីធ្វើអត្តឃាដបាន
- បើសិនជាមនុស្សម្នាក់កំពុងតែព្យាបាលជំងឺផ្លូវចិត្ត ចូរឲ្យគាត់ទៅជួបពេទ្យជាទៀងទាត់៕