ការពរទារកទើបនឹងកើតអាចជារឿងមួយគួរឲ្យរអាណាព្រោះតែខ្លាចទារកឈឺតែម្តង។ ខណៈពេលដែលអ្នកមានតួនាទីក្នុងការបំបៅដោះ និងផ្លាស់ប្តូរខោទឹកនោមរហូតដល់មានភាពជំនាញហើយនោះ តែការងូតទឹកដល់ពួកគេនៅតែជារឿងពិបាកជានិច្ច។ យកល្អ អ្នកត្រូវតែធ្វើយ៉ាងណាឲ្យទារកស្អាត និងរក្សាអនាម័យដល់គេជានិច្ច។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)បើសិនជាអ្នកមិនចង់ងូតទឹកដល់គេរាល់ថ្ងៃទេ វាក៏មិនអីដែរ។ ប៉ុន្តែ ចូរប្រាកដថា យ៉ាងហោចណាស់អ្នកក៏បានជូតសម្អាតរាងកាយគេជាមួយនឹងកន្សែងស្ងួត និងក្តៅឧណ្ហៗជាទៀងទាត់ដែរ។ ការងូតទឹកឲ្យទារករាល់ថ្ងៃទំនងជាមិនសូវជាសំខាន់ឡើយ។ ទោះបីជាយ៉ាងណាក៏ដោយ ចូរប្រាកដថា អ្នកត្រូវតែសម្អាតឲ្យបានស្អាតនៅស្បែកណាដែលមានផ្នត់ៗដូចជា តំបន់គ្រលាន ឃ្លៀក និងភ្លៅជាដើមដើម្បីចៀសវាងការបង្ករោគ និងកើតកន្ទួលរមាស់។ 

ខាងក្រោមនេះគឺជារឿងមួយចំនួនដែលអ្នកគួរចងចាំនៅពេលងូតទឹកឲ្យទារកទើបនឹងកើត

  • បើសិនជាអ្នកកំពុងតែរស់នៅកន្លែងដែលមានអាកាសធាតុត្រជាក់ ចូរចៀសវាងការងូតទឹករាល់ថ្ងៃ។ យ៉ាងណាមិញ ចូរលាងសម្អាតតំបន់ឯកជនឲ្យបានល្អផងជាពិសេសលិង្គរបស់ក្មេងតែម្តង។ 
  • បើសិនជាអ្នករស់នៅកន្លែងក្តៅ និងមានសំណើមនោះ ប្រហែលជាអ្នកត្រូវងូតទឹកឲ្យគេរាល់ថ្ងៃហើយដើម្បីរក្សាភាពស្អាត។ 
  • ចូរប្រាកដថា អ្នកបានលាងសម្អាតសក់ក្បាលរបស់ក្មេងបានយ៉ាងល្អ។ ចូរប្រើប្រាស់សាប៊ូកក់សក់កូនក្មេងផង។ 
  • មិនត្រូវត្រដុសសាប៊ូដុំលើស្បែកក្មេងផ្ទាល់ឡើយ ប៉ុន្តែអ្នកគួរតែយកសូលុយស្យុងសាប៊ូលាយជាមួយទឹកប្រើជំនួសវិញ។ 
  • ចូរប្រើប្រាស់កន្សែងស្ងួតដើម្បីជូតខ្លួនក្មេង។(អាន:ថ្នាំងងុយគេង ពេលអ្នកគួរប្រើ)
  • នៅពេលងូតទឹកឲ្យក្មេង ចូរពិនិត្យសីតុណ្ហភាពទឹកជានិច្ច តាមរយៈការជ្រលួកកែងដៃរបស់អ្នក ចៀសវាងការរលាកក្មេងដោយចៃដន្យ៕