ជំងឺទឹកនោមផ្អែមក្នុងពេលមានផ្ទៃពោះគឺជាផលវិបាកដែលកើតមានជាញឹកញាប់មួយសម្រាប់ស្រ្តីមានផ្ទៃពោះ ហើយបើសិនជាមិនមានការគ្រប់គ្រងជំងឺនេះទាន់ពេលវេលាទេ វានឹងប៉ះពាល់ដល់ទារកជាមិនខាន។(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ជំងឺទឹកនោមផ្អែមក្នុងពេលមានផ្ទៃពោះច្រើនតែបាត់ទៅវិញក្រោយពីសម្រាលកូនរួច ប៉ុន្តែវាអាចនឹងធ្វើឲ្យកូនកើតមកមានក្បាលធំ ពិបាកសម្រាល ប្រឈមនឹងទារកស្លាប់នៅ ៤ ទៅ៨សប្តាហ៍ចុងក្រោយ។ ចំពោះម្តាយវិញក៏ប្រឈមកាន់តែខ្លាំងនឹងជំងឺទឹកនោមផ្អែមប្រភេទទី២នៅថ្ងៃអនាគតដែរ។ យ៉ាងណាមិញ ជំងឺទឹកនោមផ្អែមក្នុងពេលមានផ្ទៃពោះអាចនឹងងាយស្រួលក្នុងការគ្រប់គ្រង ហើយជាតិស្ករក្នុងឈាមក៏អាចគ្រប់គ្រងបានដែរតាមរយៈវិធីដូចខាងក្រោមនេះ៖
ឈប់ញ៉ាំអាហារមានជាតិបឺរច្រើន
ការមានផ្ទៃពោះនឹងធ្វើឲ្យស្រ្តីឃ្លានខ្លាំង ព្រោះត្រូវចិញ្ចឹមមនុស្សពីរនាក់ក្នុងពេលតែមួយ។ ខណៈពេលដែលការញ៉ាំបឺរមានសារៈសំខាន់ចំពោះសុខភាព តែញ៉ាំច្រើនពេកគួរតែជារឿងចៀសវាងបើសិនជាអ្នកមានជំងឺទឹកនោមផ្អែមក្នុងពេលមានផ្ទៃពោះហើយ។ អ្នកក៏គួរកាត់បន្ថយការញ៉ាំអាហារឆាឬចៀនដែរ តែត្រូវញ៉ាំប្រភេទប្រេងអូលីវ និងសណ្តែកឲ្យបានច្រើនវិញ។
ញ៉ាំអាហារតិចៗយ៉ាងហោចណាស់៦ពេល
ចូរចៀសវាងការញ៉ាំអាហារច្រើនៗពីរ ឬបីពែលក្នុងមួយថ្ងៃ ប៉ុន្តែគួរតែញ៉ាំតិចៗ និងច្រើនដងវិញទើបជារឿងត្រឹមត្រូវ។ ការញ៉ាំតិចៗបែបនេះនឹងប្រាកដថា រាងកាយនឹងផ្គត់ផ្គង់ជីវជាតិជាប់រហូតដល់ការលូតលាស់របស់កូន និងបង្ការការឡើងខ្ពស់របស់ស្ករក្នុងឈាមទៀត។
កាត់បន្ថយការញ៉ាំផ្អែម
អ្នកប្រហែលជាឃ្លានរបស់ផ្អែមហើយក្រោយពីញ៉ាំបាយហើយមួយពេលៗ ប៉ុន្តែគួរតែកាត់ចិត្តសិនទៅ។ ការញ៉ាំផ្អែមអាចធ្វើឲ្យជាតិស្ករក្នុងឈាមឡើងភ្លាមៗ ដូច្នេះវានឹងប៉ះពាល់ដល់សុខភាព អ្នក និងកូនជាមិនខាន។
ហាត់ប្រាណរាល់ថ្ងៃ
ជំនឿមិនត្រឹមត្រូវមួយនិយាយថា មិនត្រូវហាត់ប្រាណក្នុងពេលមានផ្ទៃពោះឡើយ ប៉ុន្តែការហាត់ប្រាណក្នុងកម្រិតមធ្យមដូចជា ការដើររយៈ ៤០នាទីរាល់ថ្ងៃនឹងជួយគ្រប់គ្រងជាតិស្ករក្នុងឈាមបានយ៉ាងល្អ។
ធ្វើតាមការណែនាំរបស់ពេទ្យ
ស្រ្តីជាច្រើនមិនបានដឹងថាខ្លួនឯងមានជំងនេះទេ ដូច្នេះយកល្អគួរតែយល់ដឹងអំពីផលវិបាករបស់វា និងពិគ្រោះជាមួយគ្រូពេទ្យភ្លាមៗទៅ។ (អាន:ថ្នាំងងុយគេង ពេលអ្នកគួរប្រើ)ចូរចាំថា ការមិនបានគ្រប់គ្រងជាតិស្ករក្នុងឈាម អាចផ្តល់គ្រោះថ្នាក់ទាំងអ្នក និងកូនក្នុងផ្ទៃច្រើនណាស់៕