នៅពេលអ្នកឈឺ វាគឺជារឿងធម្មតាទេដែលអ្នកចេះតែចង់ញ៉ាំអាហារ ឬភេសជ្ជៈណាដែលធ្លាប់តែធ្វើឲ្យអ្នកមានផាសុកភាព ដោយក្នុងនោះភាគច្រើនជាកាហ្វេតែម្តង។ សម្រាប់មនុស្សមានសុខភាពល្អមួយចំនួន កាហ្វេមានឥទ្ធិពលអវិជ្ជមានតិចតួចនៅពេលញ៉ាំក្នុងកម្រិតមធ្យម។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)វាប្រហែលជាផ្តល់ប្រយោជន៍ដល់សុខភាពមួយចំនួនដោយសារតែវាសម្បូរទៅដោយអង់ទីអុកស៊ីដង់ ហើយជាតិកាហ្វេអ៊ីនរបស់វាប្រហែលជាជួយរំលាយជាតិខ្លាញ់ថែមទៀត។ ទោះបីជាយ៉ាងណាក៏ដោយ អ្នកប្រហែលជាឆ្ងល់ហើយថា តើការញ៉ាំកាហ្វេក្នុងពេលមានជំងឺមានសុវត្ថិភាពឬអត់។ ភេសជ្ជៈមួយនេះមានគុណសម្បត្តិ និងគុណវិបត្តិរបស់វាអាស្រ័យទៅតាមប្រភេទជំងឺដែលអ្នកកំពុងតែមានដែរ ដូចជា៖
ជួយឲ្យអ្នកកាន់តែមានកម្លាំង
ការញ៉ាំកាហ្វេពេលព្រឹកអាចជួយឲ្យមនុស្សភាគច្រើនលែងងងុយគេងទៀត។ តាមពិតទៅ ទោះបីជាកាហ្វេគ្មានជាតិកាហ្វេអ៊ីនក៏មានជាតិភ្ញោចបែបនេះតិចតួចដែរ។ សម្រាប់អ្នកញ៉ាំកាហ្វេភាគច្រើន វានឹងជួយបង្កើនថាមពលក្នុងខ្លួន ព្រមទាំងជាហេតុផលដែលពួកគេជ្រើសរើសវាញ៉ាំនៅពេលមិនស្រួលខ្លួន។ ឧទាហរណ៍ វាអាចជួយឲ្យមានកម្លាំងវិញបើសិនជាអ្នកយល់ថាខ្លួនឯងនឿយហត់ ប៉ុន្តែវាក៏គ្រប់គ្រាន់សម្រាប់ទៅធ្វើការ ឬសាលារៀនដែរ។ ជាមួយគ្នានេះដែរ បើសិនជាអ្នកកំពុងតែដោះស្រាយការផ្តាសាយតិចតួច កាហ្វេប្រហែលជាអាចជួយអ្នកបានដោយមិនបង្កជាផលរំខានអ្វីឡើយ។
អាចជាមូលហេតុនាំឲ្យខ្សោះជាតិទឹកក្នុងខ្លួន និងរាករូស
កាហ្វេក៏មានឥទ្ធិពលអវិជ្ជមានរបស់វាដែរ។ ជាតិកាហ្វេអ៊ីនក្នុងកាហ្វេមានឥទ្ធិពលបញ្ចុះទឹកនោម។ សម្រាប់អ្នកខ្លះ ការញ៉ាំកាហ្វេប្រហែលជានាំឲ្យខ្សោះជាតិទឹកក្នុងខ្លួន ដោយសារតែរាករូស ឬនោមច្រើនពេក។ ប៉ុន្តែការស្រាវជ្រាវខ្លះបានសម្គាល់ឃើញថា ការញ៉ាំជាតិកាហ្វេអ៊ីនកម្រិតមធ្យមពីកាហ្វេ២ ទៅ៣ពែងក្នុងមួយថ្ងៃ មិនមានឥទ្ធិពលអ្វីទៅលើតុល្យភាពជាតិទឹកក្នុងខ្លួនឡើយ។ តាមពិតទៅ អ្នកញ៉ាំកាហ្វេទៀងទាត់ ទំនងជាងាយនឹងចង់នោមបែបធម្មតាទៅហើយ ដែលមិនអាចធ្វើឲ្យមានបញ្ហាអ្វីទេ។ បើសិនជាអ្នកមានអាការៈក្អួត ឬរាករូស ឬផ្តាសាយធ្ងន់ធ្ងរ ឬពុលចំណី យកល្អគួរតែចៀសវាងកាហ្វេ ហើយជំនួសវិញនូវការញ៉ាំទឹកធម្មតាទៅ។
អាចធ្វើឲ្យដំបៅក្រពះកាន់តែរលាកថែម
កាហ្វេគឺជាអាស៊ីត ដូច្នេះវាប្រហែលជាធ្វើឲ្យរលាកក្រពះលើមនុស្សមួយចំនួនដូចជា អ្នកដែលមានជំងឺដំបៅក្រពះសកម្ម ឬបញ្ហាក្រពះពោះវៀនដែលទាក់ទងនឹងអាស៊ីតក្រពះ។ តាមការសិក្សាមួយដែលធ្វើលើអ្នកជំងឺដំបៅក្រពះ ៣០២នាក់ បានឲ្យដឹងថា ច្រើនជាង ៨០ភាគរយនៃមនុស្សទាំងអស់មានការឈឺពោះកាន់តែខ្លាំង និងអាការៈផ្សេងៗទៀតក្រោយញ៉ាំកាហ្វេរួច។ ទំនាក់ទំនងរវាងកាហ្វេ និងដំបៅក្រពះហាក់បីដូចជា ទាក់ទងនឹងរឿងបុគ្គលច្រើនជាង។ បើសិនជាអ្នកសម្គាល់ឃើញថា កាហ្វេធ្វើឲ្យកើតដំបៅក្រពះ ឬជំងឺនេះកាន់តែធ្ងន់ធ្ងរ អ្នកគួរតែចៀសវាងវា ហើយប្តូរមកញ៉ាំអ្វីផ្សេងដែលមិនសូវមានជាតិអាស៊ីត។
មានប្រតិកម្មជាមួយថ្នាំមួយចំនួន
កាហ្វេក៏អាចមានប្រតិកម្មនឹងថ្នាំមួយចំនួនដែរ ដូច្នេះអ្នកគួរតែចៀសវាងការញ៉ាំកាហ្វេបើសិនជាអ្នកកំពុងតែលេបថ្នាំទាំងនោះហើយ។ ជាតិកាហ្វេអ៊ីនអាចនឹងមានឥទ្ធិពលកាន់តែខ្លាំងនៅពេលមានវត្តមានថ្នាំ Pseudoephedrine (Sudafed) ដែលច្រើនតែប្រើដើម្បីព្យាបាលអាការៈជំងឺផ្តាសាយ។ វាក៏អាចមានប្រតិកម្មនឹងថ្នាំផ្សះដែរបើសិនជាអ្នកកំពុងតែមានការបង្ករោគដោយបាក់តេរី។ ជាថ្មីម្តងទៀត អ្នកញ៉ាំកាហ្វេជាទៀងទាត់ប្រហែលជាអាចស៊ូនឹងថ្នាំទាំងនេះបានខណៈពេលដែលកំពុងតែញ៉ាំ ព្រោះរាងកាយមានភាពស៊ាំនឹងឥទ្ធិពលទាំងនេះទៅហើយ។ ប៉ុន្តែអ្នកគួរតែពិគ្រោះជាមួយគ្រូពេទ្យសិនមុននឹងជ្រើសរើសការញ៉ាំកាហ្វេជាមួយថ្នាំទាំងអស់នេះ។ (អាន:ថ្នាំងងុយគេង ពេលអ្នកគួរប្រើ)ជម្រើសផ្សេងមួយទៀតគឺញ៉ាំកាហ្វេគ្មានជាតិកាហ្វេអ៊ីនខណៈពេលកំពុងតែលេបថ្នាំ ព្រោះជាតិកាហ្វេអ៊ីនក្នុងកាហ្វេគឺជាមូលហេតុនាំឲ្យមានប្រតិកម្មទាំងអស់នេះ៕