ការដែលមានចំនួនកូឡេស្តេរ៉ុលខ្ពស់ ជាពិសេសកូឡេស្តេរ៉ុលអាក្រក់តែម្តង អាចបង្កើនការប្រឈមកាន់តែខ្លាំងទៅនឹងជំងឺបេះដូងបាន។ ប៉ុន្តែការហាត់ប្រាណទៀងទាត់ និងរបបអាហារផ្តល់សុខភាពអាចជួយបញ្ចុះកូឡេស្តេរ៉ុល ឬបង្ការកុំឲ្យវាឡើងលើសបានទៀត។(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ដូចយើងធ្លាប់ដឹងហើយថា របបអាហារមានឥទ្ធិពលធំមួយចំពោះកូឡេស្តេរ៉ុល និងកត្តាប្រឈមមុខផ្សេងៗទៀត ជាពិសេសនៅពេលនិយាយដល់ជំងឺបេះដូងតែម្តង។ ប្រហែលជាការញ៉ាំអាហារសម្រន់គឺជាវិធីសាស្រ្តដ៏ឆ្លាតវ៉ៃមួយក្នុងការបញ្ចូលអាហារដែលអាចបញ្ចុះកូឡេស្តេរ៉ុលអាក្រក់ និងពង្រឹងដល់សុខភាពបានហើយ។ របបអាហារផ្តល់សុខភាពក៏អាចជួយរក្សាជាតិស្ករក្នុងឈាម ការរំលាយអាហារ និងគ្រប់គ្រងទម្ងន់ទៀត។ ខាងក្រោមនេះខ្ញុំសូមបង្ហាញអាហារសម្រន់ ៤យ៉ាងដែលផ្តល់សុខភាព ហើយបញ្ចុះកូឡេស្តេរ៉ុលបានទៀត៖
ពោតលីង
ពោតលីងគឺជាអាហារគ្រាប់ធញ្ញជាតិដែលមានន័យថា វាមជាតិសរសៃខ្ពស់ដែលអាចបញ្ចុះកូឡេស្តេរ៉ុលបាន។ អាហារសម្រន់ដ៏ពេញនិយមមួយនេះផ្ទុកទៅដោយជីវជាតិដែលផ្តល់ជាប្រយោជន៍ច្រើនដល់សុខភាព។ ពោតលីងក៏មានកាឡូរីទាបដែរបើសិនជាចម្អិនវាមិនប្រើប័រ និងញ៉ាំក្នុងកម្រិតមធ្យម។ ដើម្បីកាន់តែធ្វើឲ្យពោតលីងកាន់តែផ្តល់សុខភាព ចូរចម្អិនវាជាមួយប្រេងអូលីវ។
ស្រូវអូដ
មធ្យោបាយដ៏ស្រួលបំផុតក្នុងការសម្របខ្លួននឹងរបបអាហារមានកូឡេស្តេរ៉ុលទាបនោះគឺញ៉ាំស្រូវអូដរាល់ថ្ងៃ។ វាគឺជាប្រភេទគ្រាប់ធញ្ញជាតិដែលផ្តល់សុខភាពបំផុត។ ក្រៅពីនេះ វាមិនមានជាតិ Gluten តែមានជាតិសរសៃខ្ពស់ និងអង់ទីអុកស៊ីដង់សំខាន់ៗថែមទៀត។ ការស្រាវជ្រាវបានបង្ហាញថា ការញ៉ាំស្រូវអូដអាចជួយបញ្ចុះកូឡេស្តេរ៉ុល និងជាតិស្ករក្នងុឈាម ជំរុញដល់សុខភាពពោះវៀន និងពង្រឹងដល់ការស្រកទម្ងន់។
គ្រាប់ធញ្ញជាតិ
គ្រាប់ធញ្ញជាតិជាប្រភេទ ផ្លែវ៉ុលណាត់ អាលមុន ឬសណ្តែកដីសុទ្ធតែជាជម្រើសអាហារសម្រន់ផ្តល់សុខភាពជាពិសេសអាចបញ្ចុះកូឡេស្តេរ៉ុលបានទៀតផង។ វាគឺជាប្រភពប្រូតេអ៊ីន ជាតិសរសៃដ៏ល្អ និងខ្លាញ់ប្រភេទ Monounsaturated Fat ដែលផ្តល់សុខភាពដល់បេះដូង។ ការស្រាវជ្រាវបានបង្ហាញថា ការញ៉ាំគ្រាប់ធញ្ញជាតិប្រហែលជាជួយបញ្ចុះកូលេស្តេរ៉ុលអាក្រក់ និងខ្លាញ់ Triglycerides ដែលវាទាំងពីរនេះជាភ្នាក់ងារបង្ករជាកំណកជាប់សរសៃឈាមអាក់ទែ។ យកល្អគួរតែញ៉ាំគ្រាប់ធញ្ញជាតិមួយភាគបួននៃពែងជារៀងរាល់ថ្ងៃដើម្បីរក្សាសុខភាពបេះដូង។
បន្លែ និងផ្លែឈើ
ផ្លែឈើ និងបន្លែស្រស់ៗមានកាឡូរីទាប តែពោរពេញទៅដោយជាតិសរសៃ វីតាមីន ជាតិរ៉ែ និងអង់ទីអុកស៊ីដង់ដែលអាចជួយបញ្ចុះកូលេស្តេរ៉ុលអាក្រក់ បង្ការជំងឺ និងពង្រឹងដល់សុខភាពទូទៅទៀត។ វាមានជាតិសូដ្យូម និងខ្លាញ់ទាប ដែលជាហេតុធ្វើឲ្យវាក្លាយទៅជាជម្រើសផ្តល់សុខភាពមួយសម្រាប់បេះដូង។ វាអាចធ្វើឲ្យឆ្អែតបានយូរ ផ្អែមឆ្ងាញ់ និងងាយស្រួលរក។ (អាន:ថ្នាំងងុយគេង ពេលអ្នកគួរប្រើ)ចូរព្យាយាមញ៉ាំបន្លែ និងផ្លែឈើច្រើនប្រភេទ និងចម្រុះពណ៌ទើបទទួលបានប្រយោជន៍ខ្លាំងសម្រាប់សុខភាព។ យកល្អគួរតែញ៉ាំបន្លែ និងផ្លែឈើ ៣ ទៅ ៤ពេលជារៀងរាល់ថ្ងៃ៕